1 Sibara kaku Yudas, pagugulet Yesus Kristus samba sarainan Yakobus, masiailiake sia sinogai, kilibet bagat Taikamanua Ukkui, samba pinasikeli ka bagat Yesus Kristus: 2 Bule imasun ka kam katet baga, aban samba nuntut baga. 3 Sasarainangku kilibet baga, bulat akubesiakean masigalai surat ka kam pagalaiat puaragatta sangamberita, itutubbui le aku kusuratnake surat nene ka kam masinganturu kam, bule imariuriu nupaukeleake kam masijago tonem baga sinegeakenen ka sia sipunenan. 4 Aipoi taiaagaiet, aian piga pa sirimanua sipugugurui tuguru ka talagamui; sirimanua nenda siburunangan atusuratnakean ka Surat Sipunenan katuuukumda. Sirimanua sikatai le sia, sipabailok katet bagat Taikamanuanta ka pubotbonanda, samba masiputata Uteta sisasara samba Tuhanta, Yesus Kristus. 5 Kenanen anuagaian kam sangamberinia, tapoi koba pei le kuparepdep kam pagalaiat bebelaakena bangsania si Tuhan ka laggai Misir, tapoi lepa subuakenagan sia minca sitaimatonem baga. 6 Samalaika leu sitaipasikeli puukuketda, tapoi rakaddiuake le kudduatda, ikabe le sia Taikamanua palenggui sitaimakakatai ikau sia ka kudduat ka baga simagepgep teret ka gogoi pasiukuman sabeu, 7 kele Sodom samba Gomora samba laggai ka bebenia, sigalaiake kele sigalaira samalaika masigalaiake puumunan samba masitut pubotbonan tubu sikatai, araorikngan paoreat api sitaipepee sibailiu repdemen ka sangamberi sirimanua. 8 Kenanen kisedda sia simapangamutet nene rapalolit leu tubuda samba rapaloloi geget Taikamanua samba raasa siputubu simalatsat ka sorga. 9 Beringan si Mikhael, utera samalaika, ka teteret arapagolu Sanitu rapaukeli tubut Mose simamatei, ta maeme nia masiukum Sanitu ka tiboiet paasakat, kuana le, "Ai leu iukum ekeu si Tuhan." 10 Tapoi sia geti raasa le sangamberi sitaiaagaietda; tapoi siagaira nenda, agai sibara ka katukelat kele tarimeu si ta paatuat, ia te sikau sia makatai. 11 Paan te ka sia, aratutnake poi enungan Kain samba kalulut bulagat, ratutnake pupepeat Bileam, samba masubu sia kalulut pukelakat paatuat kele si Kora. 12 Sibailiu pulolinan le sia ka bagat punen pukomanmui, ta anai ailada masiemu samba sarat tubuda le rapasisikeli. Kele tanairusa si ta urat siboroiakenen rusa le sia; kele loina taipububua kenanen ka rura pubuaiat, loina sitububurau ungat, samba bulat amateian. 13 Kele onun koat sipujajaa le sia, sibubutnake galai tubu katuailaatda; kele panyanyat sipugegejek; ka sia nene amatarekngan kudduat ka pugepgeman teret buruburu. 14 Pagalaiat sia nene leu aisibalaakean si Henokh, reddenan sikapitunia barania kai Adam, aikua, "Momoi te si Tuhan sambada sipuriribu malaikania sipunenan, 15 masiukum sangamberi sirimanua samba masiorakngake ukuman ka sangamberi sirimanua sikatai kalulut sangamberi katai sigalaira samba kalulut sangamberi tiboiet paloloiat siniboira sirimanua sijo sikatai ka tubut Tuhan." 16 Sarat mungungu le sia samba muhoihoi pagalaiat tubuda; ngungunda masitiboake si ta paraboat samba raumunake sirimanua bule ibara uktukda. 17 Tapoi kam geti sasarainangku kilibet baga, repdep le kam sikuada siburu ka kam tai apostel Tuhanta, Yesus Kristus. 18 Arakuangan poi ka matamui, "Kei bara gogoi kalepakat polak, momoi te sipagegegei sipuririmanua masitutnake pubotbonan pukataikatda." 19 Sibaraake pasaraat le sia, situturi siobat polak, si ta anai Ketsat Taikamanua. 20 Tapoi kam geti sasarainangku kilibet baga, paeru le kam tubumui ka bongen putoneman bagamui bulat simalina samba panindou kam ka bagat Ketsat Sipunenan. 21 Pasikeli kam tubumui murimanua ka bagat nuntut bagat Taikamanua ka bagat ai kam masingengena katet bagat Tuhanta, Yesus Kristus, sikau kam ka purimanuaiat sitaitatata. 22 Patoila kam katet bagamui ka simaingo paatuat; 23 arauake kam sia nutiktik kam sia rabela ka api. Ka sabagei patoila kam katet bagamui sialei loto, tapoi kasitsitnake le kam leppeira silolitnakenen pubotbonan joda. 24 Oto ka tubunia, simagege masipasikeli bui nubele kam samba siambit kam si ta loloiet samba sut gorat baga ka matat pulatsanannia, 25 Taikamanua sisasara, Sipaarau sita kalulut Yesus Kristus, Tuhanta, ka tubunia le pulatsanan, pubeunanan, puroron samba gege, barania ka tetere siburu teret kineneiget samba teret buruburu. Amen.
