YOHANNES 9

1Aimueenung Yesus, itconangan sara simapeset barania ka pututukat matania pei le. 2Nounourangan nia sipasiuluinia, kuarangan, "Rabbi, kasei le aigalai jo, sinene ele eppunia, aipututu matania simapeset?" 3Aleginangan nia Yesus, "Ta kalulut jonia ele jot eppunia, tapoi bule imatoila le ka tubunia galajet Taikamanua. 4Ai pei le matatago buita tagalai galajet sipasikokoiniake aku; babara poi soibo, sedda taan anai kasei pa momoi mugalai. 5Ujuku ka polak nene, aku te alitoda taikapolak." 6Kele aikua nene Yesus lujinangan polak igalai simalotte ka lujinia, lokotnakenangan lotti ka matat simapeset, 7kuanangan ka matania, "Kenan nubui matam ka kolam Siloam." (Siloam tibonannia 'Sikoiniakenen'.) Einangan leu et ibui matania. Toilina le amaitcoan matania. 8Ia geti kuarangan pabebeakenennia lalep samba sia sipasiitco nia siburu ipasibiddeu, "Ta nia ne simareirei mutukku masibiddeu?" 9Sabagei masikua, "Oo, nia te." Tapoi sabagei masikua, "Taa, keret tubuda le." Tapoi tubunia geti masikua, "Bulatnia aku." 10Kuarangan ka matania, "Kipa pagalaiatnia aimaitco matam?" 11Aleginangan nia, "Sirimanua sipuoni Yesus, aigalai lotte, lepa lokotnakenangan nia ka mataku, kuanangan, 'Kenan nubui matam ka kolam Siloam.' Lepa ei aku; lepana le akubui mataku, maitconangan mataku." 12Kuarangan ka matania, "Kaipa nia sirimanua nenda?" Kuanangan, "Ta kuagai." 13Lepa ambitrangan sirimanua simapeset siburu nenda ka matada tai Parise. 14Tapoi gogoi Sabbat le sigalaina lotte Yesus samba aialeake matat simapeset. 15Nounourangan nia minca tai Parise kipa aimaitco matania. Kuanangan ka matada, "Polak simalotte le ailokotnake ka mataku, lepa buikungan mataku, maitconangan mataku." 16Kuarangan tai Parise sabagei, "Ta ka Taikamanua aibara sirimanua nenda, ta koi aisuru gogoi Sabbat." Tapoi sabagei masikua, "Kipa te iooi igalai kerek kele nene sirimanua sijo?" Pajoggolorangan sangamberida. 17Lepa kuarangan minca ka matat simapeset nenda, "Kekeu geti kipa nukua pagalaiat sirimanua nenda kalulut aialeake matam?" Aleginangan nia, "Nabi le nia." 18Tapoi tai Yahudi ta matonem bagada pupepesetnia siburu, samba kineneigetnan le aimaitco matania, pat sogairangan eppunia, 19nounourangan sia, "Ia leu ne togamui sikuamui mututu mata simapeset? Oto kipa le aimaitco matania kineneiget?" 20Alegirangan nia saeppunia, "Kuagai kai nia, togamai; samba tutunangan matania mapeset. 21Tapoi kipa aimaitco matania kineneiget, ta kuagai kai. Samba kasei aibukaake matania ta kuagai leu kai. Nounou le kam nia, abeuan nia, aiagaian itiboi pagalaiat tubunia." 22Lulunia arakua kise saeppunia, lotora ka tai Yahudi, apakereat poi bagada tai Yahudi, kasei masimunengake nia Kristus, tukekele le nia ka Uman Taikamanua. 23Ia te lulunia arakua saeppunia, "Nounou le kam nia, abeuan nia." 24Lepa sogairangan minca sirimanua simapeset siburu kuarangan ka matania, "Munengake ka matat Taikamanua, pububulatnia sikuam; kuagai poi kai sijo le sirimanua nene." 25Aleginangan nia kuanangan ka matada, "Ele sijo pa nia, ta kuagai. Sarat nene le kuagai, simapeset aku siburu, kineneiget amaitcoan mataku." 26Kuarangan ka matania, "Aponia aigalai ka tubum? Kipa aigalai aibukaake matam?" 27Kuanangan ka matada, "Akukuangan ka matamui, tapoi ta nuaarepi kam. Nunonounou kodda kam minca? Noba ibailiu kam sipasiuluinia?" 28Asarangan nia kuarangan, "Ekeu le sipasiuluinia, kai geti sipasiului Mose le kai. 29Pagalaiat si Mose, akuagaian kai aipatiboake nia Taikamanua, sinene geti ta kuagai kai kaipa aibara." 30Pele ngangan sirimanua nenda ka matada, "Kipa te galainia ta nuaagai kam kaipa aibara, tapoi aibukaan mataku. 31Ataagaian kam, ta iaarepi sirimanua sijo Taikamanua, sikalotoake nia samba sigalai siobat bagania le ia te iaarepi. 32Baranangan ka panandaat polak, ta atuarep ai sirimanua sibukaake matat simapeset ka pututukat mata. 33Ke ta bai ka Taikamanua aibara sirimanua nene, ta momoi igalai apa pa." 34Alegirangan rakua ka matania, "Ka bagat jo le anupututu mata, nupangangantoman pei le kai?" Kekelerangan nia ka uma parurukat. 35Kele aiarep Yesus kekekeleda nia, paseseakenangan nia kuanangan ka matania, "Matonem leu bagam ka Togatsirimanua?" 36Aleginangan nia, "Kasei nia, Tuhan, bule kukatonemi nia?" 37Kuanangan ka matania Yesus, "Anuitcoan nia, sipatiboake ekeu, ia te nia." 38Kuanangan, "Matonem bagaku Tuhan!" Lepa purapponangan ka matat Yesus. 39Kuanangan Yesus, "Masiukum le akuoi ka polak, bule imaitco matada simapeset, imapeset matada simaitco mata." 40Piga pa tai Parise sikuddu sedda araarep sikuat Yesus, lepa kuarangan ka matania, "Taleu mapeset le kai ka kai?" 41Kuanangan ka matada Yesus, "Simapeset bai kam, ta majo kam. Tapoi anukua poi kam, 'Maitco matamai,' oto kuddu le ka tubumui jomui."

will be added

X\