1 Ai sara tai Parise sipuoni si Nikodemus, ia te sara utera tai Yahudi. 2 Ka sara soibo amoi nia masitagetnake Yesus, kuanangan ka matania, "Rabbi, kuagai kai guru sibara ka Taikamanua le ekeu; aipoi ta anai kasei pa siooi masigalai kerek kele sigalainu, ke ta ipaalei nia Taikamanua." 3 Aleginangan nia Yesus, "Kukua nia ka matam, kasei pa ke ta tututuake matania minca, ta iitco Purimataat Taikamanua." 4 Kuanangan si Nikodemus, "Kipa te iooi sirimanua simabaja mututu mata minca? Momoi pa isuruketnake nia minca inania, ipututu matania minca?" 5 Aleginangan nia Yesus, "Kukua nia ka matam, kasei pa ke ta tututuake matania ka oinan samba ka Ketsat, ta tuguguru nia ka Purimataat Taikamanua. 6 Sinutuakenen akkula, akkula le; sinutuakenen Ketsat, ia te ketsat. 7 Bui imakisei ka bagam kukua ka matam: buita tututuake matamui minca. 8 Muboroi le rusa ka siobania, ai le nuaarep ngangania, tapoi ta nuagai kaipa kabaraiatnia samba kaipa kasegekatnia. Kisedda leu te sangamberi siputututu mata ka Ketsat." 9 Aleginangan nia si Nikodemus, "Kipa iooi ibara nene?" 10 Aleginangan nia Yesus, "Ekeu guru ka tai Israel, ta nuagai pagalaiat nene? 11 Kukua nia ka matam: siagaimai ia te kutitiboi kai, siitcomai ia te kumumunengake kai; tapoi ta nuala kam simunengakenenmai. 12 Ke ta matonem bagamui kutiboi sibabara ka polak nene, kipa te imatotonem bagamui ke kutiboi sibabara ka sorga? 13 Ta anai beri sara sipananatara ka sorga, sarat nia le situgogorosot ka polak, ia te Togatsirimanua. 14 Kele bubuakngakena ulou si Mose ka simatangeu, kisedda te tubuakngake geti Togatsirimanua, 15 bule senen simatonem baga ka tubunia masibakkati purimanuaiat sitaitatata. 16 Kopet katet bagania ka taikapolak Taikamanua, pat akenangan Togania sisasara, bule senen simatonem baga ka tubunia ta ilalango, tapoi mubakkat le ka purimanuaiat sitaitatata. 17 Aipoi ta masiukum taikapolak aikoiniake Togania ka polak Taikamanua, masirimanuaake le. 18 Simatonem baga ka tubunia taan tuukum nia; sitaimatonem baga geti atuukumakean nia, ta poi matonem bagania ka onin Togat Taikamanua sisasara. 19 Kise le katuukum: Amoian pato ka polak, tapoi gepgep pei le raoba sirimanua bele pei pato, sikatai le poi galajetda. 20 Senen sirimanua sigalai sikatai malaga bagania ka pato; ta ioba moi ka pato, bui poi imatoila galajetnia sikatai. 21 Sigalai simaroipo geti moi le nia ka pato, bule imatoila sangamberi sigalainia siobat Taikamanua le." 22 Pasat nene ei Yesus samba sipasiuluinia ka Yudea, kuddu sia sedda sambada samba masirau sirimanua. 23 Si Yohannes ai nia masirarau ka Ainon, ka bebet Salim, maigi poi oinan sedda. Sedda te raoi sirimanua iturau sia, 24 aipoi ka teterenia nene tapei arakau si Yohannes ka bagat penjara. 25 Ia geti pajoggolorangan sipasiului Yohannes samba sara tai Yahudi pagalaiat pasibubui siripot arat Yahudi. 26 Ei sia kai Yohannes kuarangan ka matania, "Guru, siooi ka tubum ka silat Yordan, simunengakenennu pagalaiat tubunia ka matamai siburu, kineneiget ai nia masirarau, samba sangamberi sirimanua mei ka tubunia!" 27 Aleginangan nia si Yohannes, "Sirimanua geti ta momoi iala apa pa, ke ta Taikamanua masikau ka tubunia. 28 Anuarepman kam sikuaku, 'Ta Kristus aku, sikoiniakenen le aku muboiki ka matania.' 29 Sibakkat nounoget, ia te siputatalimou; suruak siputatalimou geti sipuririo masipaalei samba masiarep ngangania, maangka le bagania ke iarep ngangan siputatalimou. Oto angkat bagaku kaku, bulat asegean kineneiget. 30 Nia le memei muurau, aku geti memei le ikukurut." 31 Siooi sibara ka pata, nia le muuddutat ka sangamberi. Siooi sibara ka polak, taikapolak le nia, samba sibabara ka polak le ititiboi. Nia siooi sibara ka sorga nia le muuddutat ka sangamberi! 32 Imunengake siitconia samba siarepnia, tapoi beri sara sia silelekngake simunengakenennia. 33 Sipasilelelekngake simunengakenennia ia te siseseake roipot Taikamanua. 34 Aipoi kasei sikoiniakenen Taikamanua, nia te masititiboi tiboiet Taikamanua, aiuruakean poi Ketsatnia Taikamanua ka tubunia ta magulai. 35 Makate le bagat Ukkui ka Togania, sangamberinia aisegeakean ka kabeinia. 36 Simatonem baga ka tubut Toga, ia te masibabakkati purimanuaiat sitaitatata, tapoi sitaimatonem baga ka tubut Toga, ta iitco purimanuaiat sitaitatata, sarat golut Taikamanua le mukukuddu ka tubunia.
