YOHANNES 21

1Pasat nene patoilanangan minca tubunia Yesus ka sipasiuluinia ka bebet koat Tiberias. Kise le aipatoila tubunia: 2Sedda ai sia parururu si Simon Petrus, si Tomas sipuoni Tairua, si Natanael tai Kana ka tobbou Galilea, tatogat Sebedeus samba rua sipasiuluinia bagei. 3Kuanangan ka matada si Simon Petrus, "Mei aku masiiba." Kuarangan ka matania, "Moi kai sambata." Eirangan leu, janang ka abak; tapoi sangasoibonia nenda beri sangamuneng araala. 4Kele aimapato, oi Yesus murio ka kapi; tapoi sipasiului ta raagai nia. 5Kuanangan ka matada Yesus, "Kam tatoga, ai leu iba anuala kam?" "Ta anai," nganganda. 6Kuanangan ka matada, "Bele kam jarikmui isit kai kattoet abak, ta isosoppi ibara." Ia geti belerangan nia, tapoi taan amoi aratiktik nia, igit iba. 7Kuanangan sipasiului kilibet bagat Yesus ka matat Petrus, "Si Tuhan te nene." Kele aiarep nia si Petrus si Tuhan le nia, puleppeinangan, (Taipuleleppeian le poi nia) puteipunangan ka koat. 8Sipasiului sabagei geti amuabak le sia, ratiktik jarik sibara iba; taan poi areu sia ka kapi, ai le sangotu meter reunannia. 9Kele aratusakai ka kapi, itcorangan bot api, ka uddutnia ai iba samba roti. 10Kuanangan ka matada Yesus, "Ake kam se iba bagei sialamui kineneiget." 11Tusakainangan si Simon Petrus ka abak, tiktiknangan jarik ka kapi. Sukkara le iba sabeu, sangotu lima pulu telu ngamuneng iginia. Kenanen kise iginia, ta amabirit jarik. 12Kuanangan ka matada Yesus, "Konan kam mukom." Ta anai sia sipasiului simaeme masinounou nia, "Kasei ekeu?" Araagaian poi si Tuhan le nia. 13Oi Yesus alanangan roti, kaunangan nia ka sia, kisedda leu iba. 14Ia te katelu ngamincania ipatoila tubunia Yesus ka matada sipasiuluinia lepa aitusuru ka simamatei. 15Lepat komanda kuanangan ka matat Petrus Yesus, "Simon togat Yohannes, manuntu leu bagam kaku bele pei nuntut bagada tainene?" Aleginangan nia si Petrus, "Oo Tuhan, nuagai le nuntut bagaku kekeu." Kuanangan ka matania Yesus, "Oto jago togat biribiriku." 16Kuanangan minca ka matania Yesus ipurua ngaminca, "Simon togat Yohannes, manuntu leu bagam kaku?" Aleginangan nia si Petrus, "Oo Tuhan, nuagai le nuntut bagaku kekeu." Kuanangan ka matania Yesus, "Oto jago biribiriku." 17Kuanangan ka matania Yesus katelu ngamincania, "Simon togat Yohannes, manuntu leu bagam kaku?" Mareureunangan bagania si Petrus, telu ngamincaan poi aikua ka matania Yesus, "Manuntu leu bagam kaku?" Kuanangan ka matania, "Tuhan, nuagai le sangamberinia, nuagai le nuntut bagaku kekeu." Kuanangan ka matania Yesus, "Oto jago biribiriku. 18Kukua nia ka matam: Sibau tubu pei le ekeu, ekeu le aiappara tengam, kaipa noba ei. Tapoi amabajaan geti ekeu, totoiakenungan kabeinu, sabageian le iaappara tengam, taroakerangan ekeu ka taioobaketnu." 19Ikukua nia nene Yesus, masipoiliat pagalaiat kamateiat Petrus masilatsatnake Taikamanua. Lepa aikua nene, kuanangan ka matat Petrus, "Tut aku!" 20Kele aipitsa teiteinia si Petrus, itconangan sipasiului kilibet bagat Yesus aitutut sia, ia te sipasiului sipukukuddu ka bebet Yesus ai sia mukokom sambada samba sipasikukua, "Tuhan, kasei nia sipajo ekeu?" 21Kele aiitco nia si Petrus, kuanangan ka matat Yesus, "Tuhan, kipa ka sia kai nene?" 22Kuanangan ka matania Yesus, "Koba bai ipurimanua teret oi aku, apanannu nupuuku nia? Kekeu geti, tut le aku!" 23Mararatnangan tebai katuareman nene ka sia sasaraina, sipasiului nene ta mamatei nia. Oto ta aikua Yesus ka matania taimamateinia; kise le aikua, "Koba bai ipurimanua teret oi aku, apanannu nupuuku nia?" 24Sipasiului nene te sipasimumunengake sangamberinia nene, samba amasisuratnake nia; samba taagai sibulatnia le simunengakenennia. 25Maigi pei le bagei sigalai Yesus. Tusuratnake bai nia pasasara, kupaatu sangalio polak nene ta mememet kudduat buko suratnakenen nenda.

will be added

X\