YOHANNES 20

1Ka gogoi Menggui simancep, mainem pei le, ei si Maria Magdalena ka ratei. Itcona le atuakkatnan bukku takket ratei. 2Pabalaunangan leu iei kai Simon Petrus, samba ka sipasiului sara kilibet bagat Yesus, kuanangan ka matada, "Araalaan si Tuhan ka ratei, ta kuagai kaipa aragalakngake nia." 3Bela nia si Petrus samba sipasiului sara raei ka ratei. 4Apabalau le sia ruada, tapoi sipasiului sara le manangka kai Petrus, nia le asege boiki ka ratei. 5Loggouakenangan ka baga, itconangan komang sigalakngakenen, tapoi ta atubuluk nia ka baga. 6Oi si Simon Petrus sipasitutut ka teitei, buluk nia ka ratei. Itconangan komang situgagalak sedda, 7samba poposat attinang, tabut utenia, tapoi ta anai palelegere ka komang tabut, ka kudduat bagei le, ai kaleleulekat. 8Lepa buluk leu sipasiului sara, sipuboboiki sege ka ratei, itconangan nia, matonemnangan bagania. 9Teret sedda enan tapei raagai kolou Surat Sipinenan sipasikukua tususuru le nia minca ka simamatei. 10Lepa toili sia sipasiului ka lalepda. 11Si Maria geti ai le nia muririo ka bebet ratei, ai nia musosou. Ai nia musosou, lukkukngakenangan utenia ka ratei, 12itconangan rua malaika sipuleleppei simabulau, ai sia mukukuddu sara isit ute, sara isit rere katugalangan tubut Yesus. 13Kuarangan ka matania, "Ina, musosou kodda ekeu?" Kuanangan ka matada, "Araalaan si Tuhanku, ta kuagai kaipa aragalakngake nia." 14Kele aikua nene, pitsanangan ka teitei, itconangan Yesus ai nia muririo sedda, tapoi ta iagai Yesus le nenda. 15Kuanangan ka matania Yesus, "Ina,musosou kodda ekeu? Kasei nugagaba?" Ka bagania le te sipuuku mone le nia, kuanangan ka matania, "Tuan, ekeu bai aiala nia, kua ka mataku kaipa anugalakngake nia, kuei kuala nia." 16Kuanangan ka matania Yesus, "Maria!" Beliuakenagan tubunia si Maria kuanangan ka matat Yesus ka ngangan Ibrani, "Rabbuni!" (Tibonannia Guru.) 17Kuanangan ka matania Yesus, "Ba rarape aku, tapei poi atusakai aku ka Ukkui. Kenan le ka sasarainangku, nukua ka matada, tusasakai le aku ka Ukkuiku, samba Ukkuimui, ka Taikamanuangku, samba Taikamanuamui." 18Einangan leu si Maria Magdalena masisegeake ka matada sipsiului, iitcona si Tuhan samba kukuana sangamberinia nene ka matania. 19Kele aimasoibo ka gogoi Menggui nenda, ai kalelekerat matatbaliu kudduatda sipasiului Yesus, lotora ka tai Yahudi, oinangan Yesus rio ka talagada, kuanangan ka matada, "Aban ka kam!" 20Lepa aikua nene, paitconangan ka matada kabeinia samba usunia. Maangkanangan bagada sipasiului araitco si Tuhan. 21Kuanangan minca ka matada Yesus, "Aban ka kam! Kele kokoiniakena aku Ukkui, kiseda leu kukoiniake kam." 22Lepa aikua nene, ulupmakenangan engania ka tubuda, kuanangan, "Silo kam Ketsat Sipunenan! 23Ke nuappeake kam joda sirimanua, tuappenangan leu; samba ke ta nuappeake kam joda sirimanua, taituappenangan leu." 24Si Tomas geti sara ka sipasiului sipulurua, sipuoni leu Tairua, ta anai nia sambada aioi Yesus sedda. 25Kuarangan sipasiului sabagei ka matania, "Akuitcoan kai si Tuhan"' Kuanangan ka matada, "Ke tapei kuitco balak sipattakat, ke tapei kukau singongaiku ka balak sipattakat nenda samba kukau kabeiku ka usunia, ta matotonem bagaku." 26Pasat balu ngagogoi parururangan minca sipasiului Yesus ka lalep nenda, samba si Tomas leu ai nia. Ai kalelekkerat matatbaliu, oinangan Yesus rio ka talagada, kuanangan, "Aban ka kam!" 27Lepa kuanangan ka matat Tomas, "Kau se singongainu, itco kabeiku, totoiake kabeinu nuusuake nia ka usuku. Buian imagoa bagam, kauan imatonem bagam." 28Aleginangan nia si Tomas kuanangan, "Tuhanku! Taikamanuangku!" 29Kuanangan ka matania Yesus, "Anuitcoan poi aku, matonemnangan bagam. Mauktuk te sia simatonem baga, kenanen ta iitco." 30Maigi pei le bagei kerek sigalai Yesus ka matada sipasiuluinia, ta atusuratnake ka buko nene. 31Tapoi sangamberinia nene aitusuratnake, bule imatonem bagamui, Yesus ia te Kristus, Togat Taikamanua, samba bule kalulut tonem baga bara ka kam purimanuiat ka bagat oninia.

will be added

X\