YOHANNES 2

1Ka gogoi sikatelunia, ai punen putalimogat ka laggai Kana, tobbou Galilea, ai leu sedda inan Yesus. 2Yesus leu samba sipasiuluinia arasogai ka punen putalimogat. 3Kele aisappuru anggur ka sia, kuanangan inan Yesus ka matat Yesus, "Taan anai anggur ka sia." 4Kuanangan ka matania Yesus, "Aponia kiddietnu kugalai, ina? Tapei aiaili tetereku." 5Kuanangan inania ka matada sapagugulet, "Apa apa ikua ka matamui reddet kam." 6Sedda ai enem tappaiat kudduat oinan pasibuiat siripot aratda tai Yahudi. Senen tappaiat mememen rua ele telu ngalalaisu. 7Kuanangan Yesus ka matada sapagugulet, "Kau kam oinan nene ka bagat tappaiat." Kaurangan nia pat tim. 8Lepa kuanangan ka matada Yesus, "Seilu kam, kau kam ka siuteake punen." Kaurangan leu nia. 9Kele ainanam siuteake punen oinan sibailiu anggur -- ta poi iagai kabaraiatnia, sarat sia sapagugulet sipaneneilu le siagai nia -- sogainangan siputatalimou, 10kuanangan ka matania, "Simareirei, anggur simaeru le boiki raake sirimanua, teret aipuinengan sia geti, ia pei raake anggur simagulai nanam. Tapoi anukoiri le anggur simaeru teret kise." 11Ia te kerek Yesus siboiki, sigalainia ka Kana, tobbou Galilea, masipatoila pulatsanannia. Matonemnangan bagada ka tubunia sipasiuluinia. 12Pasat nene, ei Yesus, inania, sasarainania samba sipasiuluinia ka Kapernaum, pukuddurangan sedda piga ngagogoi pa. 13Kele aimalegere Punen Paska ka tai Yahudi, panataranangan Yesus ka Yerusalem. 14Ailinangan sia ka Uman Taikamanua, airasasakiake jaui, biribiri samba merpati; samba sipasisili bulagat ai sia muuddet sedda. 15Galainangan tali lilippat, usiakenangan sangamberi tarimeu ka Uman Taikamanua, biribiri samba jaui; pakaritnangan bulagatda sipasisili bulagat, luggaakenangan mejada. 16Kuanangan ka matada sipasisasakiake merpati, "Ambit kam sangamberinia nene, ba babailiuake kam Uman Ukkuiku lalep pasakiat." 17Repdeprangan leu sitususurat ka Surat Sipunenan sipasiuluinia, "Tuturut ka umam le aikom aku." 18Alegirangan nia tai Yahudi kuarangan ka matania, "Aponia katuaggaiat nupatoila ka matamai kababarat gegem masigalai kele nene?" 19Aleginangan nia Yesus, "Ragatnan kam Uman Taikamanua, ai leu kurioake nia minca ka bagat telu ngagogoi." 20Kuarangan tai Yahudi ka matania, "Epat pulu enem ngarura ujunia aragalai Uman Taikamanua nene, momoi nugalai nia kekeu ka bagat telu ngagogoi?" 21Tapoi tubunia le sikuania Uman Taikamanua. 22Teret aitusurungan le Yesus ka simamatei, ia pei repdeprangan nia sipasiuluinia, aitiboian nene ka matada. Matonemnangan bagada ka Surat Sipunenan samba ka tiboiet siniboi Yesus. 23Ka teteret ai Yesus ka Yerusalem ka Punen Paska, maigi simatonem baga ka oninia kalulut araitco poi kerek sigalainia. 24Yesus geti ta ikatonemi sia, iagai poi sia sangamberida. 25Ta besiakenen ramunengake sirimanua ka matania pagalaiat sirimanua, iagai le poi apa sibabara ka paatuatda sirimanua.

will be added

X\