YOHANNES 19

1Lepa alanangan Yesus si Pilatus, kaunangan rabobo nia. 2Tikairangan kirit rui tai tentera, kaurangan nia ka utenia. Leppeiakerangan ka tubunia leppei simabonan, 3lepa oi sia ka matania, kuarangan, "Salam, rimatada tai Yahudi!" Lepa lippatrangan nia. 4Bela minca si Pilatus, kuanangan ka matada, "Itco kam, kuambit nia ka matamui, bule nuseseake kam ta anai beri sara akusese jonia." 5Lepa bela Yesus sibara kirit rui samba leppei simabonan. Kuanangan si Pilatus ka matada, "Itco kam sirimanua nene!" 6Kele araitco nia tai imam sabeu samba sapaguguletda, pugereirangan, "Siliktengaake nia! Siliktengaake nia!" Kuanangan ka matada si Pilatus, "Alaan kam nia, siliktengaake kam nia; aipoi kaku ta anai akusese jonia." 7Alegirangan nia tai Yahudi, "Siripot surukatmai, buita tumateiake le nia, aikau poi tubunia Togat Taikamanua." 8Kele aiarep tiboiet nene si Pilatus, memei maloloto nia, 9guru nia minca ka purapanan, kuanangan ka matat Yesus, "Kaipa anubara?" Tapoi ta aialegi Yesus. 10Kuanangan ka matania si Pilatus, "Ta noba nupatiboake aku? Ta nuagai, ai gegeku kubelaake ekeu, samba ai gegeku kusiliktengaake ekeu?" 11Aleginangan nia Yesus, "Ta anai gegem ka tubuku, ke ta tuake kekeu gege sibara ka pata. Ia te lulunia sipasisesegeake aku kekeu, nia pei le abeu jo." 12Teret nenda besiakenangan si Pilatus masibelaake Yesus. Tapoi mugerei le tai Yahudi kuarangan, "Ke nubelaake nia, ta mususuruak ekeu kai Kaisar. Kasei sikau tubunia rimata, sisaggangi Kaisar le nia." 13Kele aiarep tiboiet nene si Pilatus, belaakenangan Yesus, ia geti puuddetnangan ka uddenan pasiukuman sipuoni bagat lalep bukku; ka ngangan Ibrani oninia Gabbata. 14Gogoi nenda ia te panarengan Paska, malegere bobo pulu rua tugge. Kuanangan ka matada tai Yahudi si Pilatus, "Itco kam rimatamui!" 15Pugereirangan, "Areuake nia! Areuake nia! Siliktengaake nia!" Kuanangan ka matada si Pilatus, "Kusiliktengaake rimatamui?" Alegiranngan nia tai imam sabeu, "Ta anai bagei rimatamai, Kaisar le!" 16(16a) Ia geti segeakenangan Yesus si Pilatus ka tubuda rapattake nia ka siliktenga. (16b) Alarangan Yesus, ambitrangan nia ratuitui. 17Bairatnangan siliktengania Yesus mei ka kudduat sipuoni leleu Lakkupat, ka nganganda tai Ibrani: Golgota. 18Sedda te rasiliktengaake nia samba rua sabagei, patsila tubunia, Yesus geti ka talaga. 19Suratnakenangan sara surat si Pilatus, ottotnakenangan nia ka siliktenga, kise ngangania, "Yesus tai Natsaret, Rimatada tai Yahudi." 20Maigi sia tai Yahudi sibasa surat nene, aipoi ka kudduat pasisiliktengaat Yesus malegere ka kota samba tusuratnake kangangan Ibrani, ngangan Latin samba ngangan Grika. 21Kuarangan tai imam sabeura tai Yahudi ka matat Pilatus, "Ba susuratnake, 'Rimatada tai Yahudi', tapoi sikuania le, 'Aku te Rimatada tai Yahudi.' " 22Aleginangan nia si Pilatus, "Sinuratnakenenku, akusuratnakean." 23Sia tai tentera, lepa arasiliktengaake Yesus, alarangan bibilet tubunia, rubeirangan nia epat ngarubeiat, senen tentera sangarubeiat; leppeinia leu raala. Leppei nene taisusuilangen le, sigalai le barania ka pata aili ka epe. 24Patiborangan pasasambada, "Tatabibiritnake nene, tapauktukngake le nia, kasei sibakkati nia." Ia te ipuaili sitususurat ka Surat Sipunenan, "Rarubei le bibilet tubuku, pauktuk le sia kalulut leppeiku." Ia te aragalaiake tai tentera. 25Tapoi ai le muririo ka bebet siliktengan Yesus inania, sarainan inania, si Maria sinanalep Kleopas samba si Maria Magdalena. 26Kele aiitco inania Yesus samba sipasiului kilibet bagania murio ka bebenia kuanangan ka matat inania, "Ina, ia te togam!" 27Lepa kuanangan ka matat sipasiuluinia, "Ia te inam!" Ka teteret nenda, alanangan nia sipasiului ka lalepnia. 28Pasat nene, kele aiagai Yesus atulelean sangamberinia, samba bule ipuaili sinibooi Surat Sipunenan, kuanangan, "Maoggouan aku." 29Sedda ai sara kudduat suat anggur simalaga. Somakerangan romon ka anggur simalaga nenda, kokkokngakerangan nia ka buttet manggea, kaurangan nia ka ngungun Yesus. 30Lepa ailo anggur simalaga Yesus, kuanangan, "Atulettungan!" Lukkukngakenangan utenia, sege isegeake engania. 31Kalulut panarengan poi gogoi nenda, samba bui ikuddu tubuda ka siliktenga ipot gogoi Sabbat -- bulat abeu poi Sabbat nene -- tiddourangan kai Pilatus tai Yahudi bule rabakbakngake rereda siniliktengaakenen, samba ragorosoynake tubuda. 32Ia geti oi sia tai tentera, bakbakngakerangan reret siboiki samba reret nenda sara alei Yesus tusiliktengaake. 33Tapoi kele araoi ka Yesus, itcorangan atataan nia, taibakbakngakerangan rerenia; 34tapoi sara ka talagat tai tentera masipunuake sosoat ka usunia, belanangan logau pagalu oinan. 35Tubut sipasiitco sibabara nene masimunengake nene samba sineseat le simunengakenenia, samba iagai sibulatnia sikuania, samba bule kam leu matonem bagamui. 36Aipoi aibara sangamberinia nene, bule ipuaili sitususurat ka Surat Sipunenan, "Beri sara tolatnia tubakbakngake." 37Ai leu ruang bagei sipasikukua, "Raiitco leu gati nia sipununda." 38Pasat nene ei si Yosep sibara ka Arimatea masitiddou kai Pilatus bule igorosotnake tubut Yesus. (Si Yosep nene ia te sipasiului Yesus, tapoi simalipput le, maloto poi nia ka tai Yahudi.) Panindogatnia nene iobaake si Pilatus. Einangan leu gorosotnakenangan tubut Yesus. 39Si Nikodemus leu ia te sieei siburu ka Yesus sinoibo, amoi nia. Ambitnangan tula mur pagalu tulat simoite, ai telu pulu kilogram sanenia. 40Alarangan tubut Yesus tabutrangan nia komang juto, kaurangan simasingin siripot arat pasiraratei ka tai Yahudi. 41Ka legeret kuddut pasisiliktengaat Yesus ai sara mone. Ka mone nene ai sara ratei sibau, beri pei rateiakera sirimanua ka bagania. 42Kalulut gogoi panarengan poi ka tai Yahudi, malegere pei bagei ratei nene, galakngakerangan tubut Yesus sedda.

will be added

X\