YOHANNES 18

1Lepa aikua nene Yesus, bela nia samba sipasiuluinia ei sia ka silat oinan Kidron. Sedda ai sara mone, sedda te aiei Yesus sambada sipasiuluinia. 2Tapoi iagai le si Yudas sipajo nia kudduat nene, mareirei poi iei Yesus samba sipasiuluinia paruru sedda. 3Alanangan tai tentera si Yudas, samba sapaguguletda tai imam sabeu samba tai Parise oi nia sedda sibara oong, alito samba pamatei. 4Iagaian poi Yesus sangamberi sipuaaili ka tubunia, bela nia, kuanangan ka matada, "Kasei nugagaba kam?" 5Alegirangan nia, "Yesus tai Natsaret." Kuanangan ka matada, "Aku te nia." Ai leu si Yudas sipajo nia muririo sambada. 6Kele aikua ka matada, "Aku te," siksikrangan tubuda, bele sia ka polak. 7Nounounangan sia minca, "Kasei nugagaba kam?" Kuarangan, "Yesus tai Natsaret." 8Aleginangan nia Yesus, "Akukuangan ka matamui, aku te. Ke aku nugagaba kam, oto obaake kam ratuitui tainene." 9Kisedda teipuaili siniboinia, "Ka sangamberida siakenu kaku, beri sara simalilimai." 10Oto si Simon Petrus, ai poi lanjaunia, oppatnangan lanjaunia, teteakenangan nia ka pagugulet imam sabeu seppirinangan talingania sikattoet. Onin pagugulet nenda si Malkus. 11Kuanangan Yesus kai Petrus, "Kau minca ka sakbuk lanjaunu! Pulokat siaket Ukkui kaku, ta pa kulolo?" 12Ia geti sia tai tentera samba utera samba paguguletda tai Yahudi, labarangan Yesus kaberangan nia. 13Lepa taroakerangan nia boiki kai Hannas, ia te talikut Kayafas, imam sabeu ka rura nenda. 14Si Kayafas te sipasikukua ka tai Yahudi, "Maeru pei le matei sara sirimanua punu tubuda sangamberi bangsa." 15Tapoi itut le Yesus si Simon Petrus samba sara sipasiului bagei. Sipasiului nene sipaagai le sia imam sabeu, oto guru nia samba Yesus ka gerat lalep imam sabeu, 16si Petrus geti ai le nia muririo ka bebet matatbaliu gugurukat. Lepa bela sipasiului nenda sipaagai kai imam sabeu, patiboakenangan sinanalep sipasijajago matatbaliu, ambitnangan si Petrus ka baga. 17Kuanangan sinanalep sipasijajago matatbaliu ka matat Petrus, "Ta ekeu poi sara sipasiului sirimanua nene?" Aleginangan nia si Petrus, "Ta aku." 18Sia sapagugulet samba sipsijajago Uman Taikamanua ararusuian api purakaet, maleppet poi ka teteret nenda, puriorangan muraka ka api. Si Simon Petrus leu ai nia muririo muraka ka bebera. 19Ia geti taddaakenangan imam sabeu masipaiseki Yesus pagalaiat sipasiuluinia samba ngantomannia. 20Aleginangan nia Yesus, "Ka simatoila le akupanibo ka matada taikapolak. Mariuriu le aku mungantoman ka uma parurukat samba ka Uman Taikamanua, ka parurukatda tai Yahudi; ta anai akupanibo ka simalipput. 21Nunonounou kodda aku? Nounou le sia siarep tiboietku; raagai le siniboiku ka matada." 22Kele aikua nene Yesus, lippatnangan nia sara sipasijajago sipuririo sedda, kuanangan, "Kisedda ne nualegi ngangan imam sabeu?" 23Kuanangan ka matania Yesus, "Sikatai bai akutiboi, oto munengake katainia; tapoi simaroipo geti akutiboi, angoi nulippat aku?" 24Lepa koiniakenangan nia si Hamas situkakabe kai Imam Sabeu Kayafas. 25Si Simon Petrus geti ai pei le nia muririo muraka. Kuarangan ka matania sirimanua sikuddu sedda, "Ta ekeu leu sara sipasiuluinia?" Aipakele le si Petrus kuanangan, "Ta aku." 26Kuanangan sara pagugulet imam sabeu, saepput siseppirit Petrus talingania, "Ta akuitcoan ekeu sambamui ka mone?" 27Pakelenangan nia minca si Petrus; lepa putokkinangan gougou. 28Mamancep pei le taroakerangan Yesus ka purapanan barania kai Kayafas. Sia geti ta atuguru sia ka purapanan, bui ramalolit, bule ioi rakom Paska. 29Ia geti bela si Pilatus itagetnake sia kuanangan, "Aponia panganduatmui ka sirimanua nene?" 30Alegirangan rakua ka matania, "Ta bai sigalai jo sirimanua nene, ta kunganganduake kai nia kekeu." 31Kuanangan ka matada si Pilatus, "Ambitnan kam nia, ukum kam nia siripot Surukatmui." Kuarangan ka matania tai Yahudi, "Rakekera le kai masimateiake sirimanua." 32Kisedda te ipuaili tiboiet Yesus sikuania masipoiliat pagalaiat kamateiatnia. 33Ia geti guru nia minca si Pilatus ka purapanan, sogainangan Yesus, kuanangan ka matania, "Ele, rimatada tai Yahudi leu ekeu?" 34Aleginangan nia Yesus, "Sibara ka paatuatnu le sikuam nene? ele sabagei le aikua nia ka matam pagalaiat tubuku?" 35Aleginangan nia si Pilatus, "Tai Yahudi pa aku? Bangsam le samba tai imam sabeu amasinganduake ekeu kaku; aponia anugalai?" 36Aleginangan nia Yesus, "Ta sibara ka polak nene puririmataku. Ke sibara ka polak bai puririmataku, ta isosoppi rapasaggak sapaguguletku, bui itusegeake aku ka tai Yahudi; aipoi puririmataku ta sibara se." 37Kuanangan ka matania si Pilatus, "Oto rimata leu ekeu?" Aleginangan nia Yesus, "Kele sikuam, rimata te aku. Ia te aiputu mataku samba akuoi ka polak, bule kumunengake pubulanan. Senen sibara ka pubulanan iaarepi le ngangangku." 38Kuanangan ka matania si Pilatus, "Aponia pubulanan?" 38Kele aikua nene bela nia minca si Pilatus ka tai Yahudi, kuanangan ka matada, 'Ta anai beri sara akusese jonia. 39Tapoi amuaratnan ka punen Paska kubelaake ka kam sara sirimanua. Kipa noba kam kubelaake ka kam rimatada tai Yahudi?" 40Pugereirangan minca kuarangan, "Ta sinene, si Barabbas le." (Si Barabbas geti sipasimamatei sirimanua le nia.)

will be added

X\