YOHANNES 12

1Ai le enem ngagogoi ibara Paska, ei Yesus ka Betania, laggai Latsarus sisuruakenen Yesus ka simamatei. 2Galairangan pasiraumaat ka tubunia sedda, si marta masipuuku, si Latsarus te sara sipakudduake Yesus mukom. 3Lepa alanangan sitenga kilo tula simasingin bulat narwastu simakeppu saki si Maria, tulajinangan reret Yesus, kaunangan alainia masiposa; salu le lalep singinnia tula nenda. 4Kuanangan si Yudas Iskariot, sara ka talagat sipasiului Yesus -- sipasisesegeake nia geti --, 5"Angoi ta tusakiake tula simasingin nene telu ngotu ropia, samba bulagatnia tukau ka simageba?" 6Tapoi kei ikukua nene ta ukut bagania ka simageba, sipananangkou le nia, mareirei iala bulagat ka suppit siukkaakenennia. 7Kuanangan Yesus, "Obaake kam nia! Masirepdep gogoi katurateiatku le igagalai nene. 8Ai le mariuriu simageba ka bebemui, aku geti ta mariuriu ka bebemui." 9Maigi sia tai Yahudi amasiagai kababarat Yesus sedda. Oirangan leu, ta sarat kalulut Yesus, tapoi obara leu masiitco si Latsarus, sisuruakenen Yesus simamatei. 10Teuakerangan tai imam sabeu bule si Latsarus leu tumateiake; 11kalulut nia le poi maigi tai Yahudi masikaddiuake sia samba masikatonemi Yesus. 12Pato, kele araarep nia sirimanua simigi siooi mupunen aimomoi Yesus ka Yerusalem, 13alarangan rorot poula, ei sia masiroroi nia, pusogarangan, "Hosanna! kau imatulu tubunia siooi ka onin Tuhan, Rimatada tai Israel!" 14Kele aisese sara kalidei siooko Yesus, Jananginangan nia, bulat ipo kele sitususurat ka Surat sipunenan, 15"Ba maloloto okko Sion! Amoian te Rimatam, mukuddu ka teitei togat kalidei!" 16Ka panandaatnia ta raagai nene sipasiului Yesus, teret aitulatsatnakean le Yesus, ia pei repdeprangan, pagalaiat tubunia le atusuratnake ka Surat Sipunenan, samba kisedda leu aragalai ka tubunia. 17Sangamberi sirimanua sipaalei Yesus ka teteret aisogai si Latsarus ka ratei aisuruake nia simamatei masimunengake sangamberi sibabara. 18Ia te lulunia araei sirimanua simigi ka tubut Yesus, kalulut aarepda aigalai kerek nene. 19Kuarangan tai Parise pasasambada, "Anuitcoan kam, bulat siboboi le kam. Itco pei kam, sangalio polak masitut nia." 20Ka talagada sirimanua sieei manindou ka punen, ai piga pa tai Grika. 21Sia nene, mei kai Pilipus sibara ka Betsaida ka Galilea, kuarangan ka matania, "Tuan, koba kuitco kai Yesus." 22Ei si Pilipus masisegeake kai Andreas; lepa ei sia ruada masisegeake nia ka Yesus. 23Kuanangan ka matada Yesus, "Aiailingan te teterenia itulatsatnake Togatsirimanua. 24Kukua nia ka matamui: Ke ta bele ka polak ngambet bera ianau, sangambenia leu ne. Tapoi ke ianau geti buaakenangan bua simaigi. 25Simanuntu baga ka engania, ia te sipalimai nia, tapoi sitaipuletsei engania ka polak nene, ia te sipasikeli nia teret ka purimanuaiat sitaitatata. 26Kasei sioba mupagugulet ka tubuku, kau itut aku; kaipa aku sedda leu paguguletku. Kasei sioba mupagugulet ka tubuku umunakenen Ukkuiku te nia." 27"Mareureu bagat Ketsatku kineneiget, kipa pa kukukua? Kukukua pa, "Ukkui, romake aku ka jam nene'? Taa, lulut nene le poi akuoi ka jam nene. 28Ukkui, latsatnake onim!" Maarepnangan nganga sibara ka manua masikua, "Akulatsatnakean, ai leu kulatsatnake nia minca." 29Kele araarep nene sirimanua simigi sipuririo sedda kuarangan, "Leleggu le nenda!" Sabagei masikua, "Ai le ipatitiboake nia sara malaika@" 30Kuanangan ka matada Yesus, "Ta kalulut aku aibara nganga nene, kalulut kam le. 31Kineneiget aiailingan teterenia katuukuman ka taikapolak; keneneigetnan te tukekele rimatada taikapolak. 32Samba ke atubuakngakean aku ka polak, tiktikkungan sangamberi sirimanua ka tubuku." 33Ikukua nia nene, ia te masipoiliat pagalaiat kamateiatnia. 34Kuarangan ka matania sirimanua simigi, "Siarepmai geti ka surat Surukat, riuriu le ipurimanua Kristus teret buruburu; kipa te nukukua tububuakngake te Togatsirimanua? Kasei nia Togatsirimanua nenda?" 35Kuanagan ka matada Yesus, "Taan mauuju ikuddu ka kam pato. Oto puenung kam ka teteret ai pei le pato ka kam, bui isaksak kam gepgep; aipoi sipueenung ka gepgep, ta iagai kaipa ieei. 36Ujut ai pei le pato ka kam, kau imatonem bagamui ka pato, bule ibailiu kam tatogat pato." Lepa aikua nene Yesus, tui nia iareuake tubunia ka matada. 37Kenanen kise iginia aigalai kerek Yesus ka matada, tapoi ta matonem bagada ka tubunia. 38Kisedda te ipuaili siniboi nabi Yesaya sipasikukua, "Tuhan, kasei amatonem baga ka ngantomanmai? Kasei ka tubu atupatoila geget Tuhan?" 39Ia te ta iooi ramatonem baga, aikua poi minca si Yesaya, "Aikua Taikamanua, 40'Akupesetnakean matada, samba akukelaakean paatuatda, bui imaitco matada samba bui raagai masipaatu, bui rabauake paatuatda, bui kualeake sia.' " 41Ia te aitiboi si Yesaya, aiitcoan poi pulatsanan Yesus samba aitiboian pagalaiat tubunia. 42Kenanen kisedda, maigi leu siabeu ka tai Yahudi masikatonemi Yesus, tapoi ta rapatoila kalulut tai Parise bui rakekele sia ka uma parurukat. 43Umun sibara ka sirimanua pei le poi raoba bele pei umun sibara ka Taikamanua. 44Lepa pusoganangan Yesus, kuanangan, "Sikatonemi aku, ta aku aikatonemi, sipasikokoiniake aku le aikatonemi. 45Samba sipasiitco aku, sipasikokoiniake aku le aiitco. 46Sibailiu patora le aku akuoi ka polak, bule sangamberi sikatonemi aku ta mukukuddu ka gepgep. 47samba sipasiaarep tiboietku, tapoi ta ireddet, ta aku iuukum nia, ta poi masiukum taikapolak akuoi, masiarauake le. 48Simamin baga ka tiboietku samba sitaisilo tiboietku, aian siukumake nia; tiboiet siniboiku, ia te iuukumake nia ka gogoi sialu. 49Aipoi ta sibara ka teu bagaku kutitiboi, Ukkui sipasikokoiniake aku le amasipatone kaku, apa kuanenku, samba apa segeakenenku. 50Samba kuagai, patonekatnia ia te purimanuaiat sitaitatata. Oto apa siniboiku, siripot sikuat Ukkui ka mataku le kutitiboi."

will be added

X\