YOHANNES 11

1Ai sara simabesi sipuoni si Latsarus ka Betania, laggai kudduat Maria samba sarainania si Marta. 2Si Maria, nia te amasitulaji reret Tuhan tula simasingin, alainia aikau masiposa nia. Si Latsarus simabesi nene maniura. 3Ia geti koiniakerangan samaniunia sieei ka Yesus masikua ka matania, "Tuhan, kilibet bagam, ai nia muooringen." 4Kele aiarep nia Yesus, kuanangan, "Ta kamateiat oringen nene, tapoi sibailiu katulatsanan Taikamanua le, bule imalatsat Togat Taikamanua kalulut nene." 5Yesus geti manuntu le bagania kai Marta samba ka sarainania samba kai Latsarus. 6Tapoi kele aiarep puooringen Latsarus, kuddu pei le nia rua ngagogoi ka kudduatnia. 7Pasat nene, kuanangan ka matat sipasiuluinia, "Sita kam taei minca ka Yudea." 8Kuarangan ka matania sipasiuluinia, "Rabbi, simaruei le aragele tai Yahudi masibaijuk ekeu, kineneiget mei ekeu minca ka sia?" 9Aleginangan nia Yesus, "Ta pulu rua ngajam sangagogoi? Sipueenung sinago, ta tusosoksok rerenia, iitco poi pato ka polak nene. 10Sipueenung sinoibo geti, tusosoksok le rerenia, ta poi anai pato ka tubunia." 11Ia te aikua Yesus, lepa kuanangan minca ka matada, "Si Latsarus suruakta, amaunengan nia, tapoi memei le aku kusuruake nia." 12Kuarangan sipasiuluinia, "Tuhan, ke amaunengan nia, oto mamale nia." 13Tapoi sikuat Yesus, ia te pagalaiat kauuneng kamamatei; ka bagada ka sia geti kauuneng sipeperem le sikuania nene. 14Lepa kuanangan ka matada simakolou Yesus, "Atataan si Latsarus. 15Tapoi maangka le bagaku ta anai aku sedda kalulut kam, bule imatonem bagamui. Oto sita kam taei ka sia." 16Lepa kuanangan si Tomas sipuoni Tairua ka matada saaleinia sipasiului, "Sita kam taei ka sia, bule tamatei kam sambata!" 17Kele aisege sedda Yesus aiailingan epat ngagogoi ujunia si Latsarus ka ratei. 18Betania geti malegere le nia ka Yerusalem, ai pa telu kilometer reunannia. 19Maigi sia tai Yahudi siooi masibalou si Marta samba si Maria masipusuibi bagada kalulut katatatat maniura. 20Kele aiarep kaooi Yesus si Marta, ei nia masiroroi nia; si Maria geti, ai le nia mukukuddu ka lalep. 21Kuanangan ka matat Yesus si Marta, "Ai bai ekeu se Tuhan, ta ilalango maniuku. 22Tapoi kuagai leu apa le nutiddou ka Taikamanua iaake kekeu Taikamanua." 23Kuanangan ka matania Yesus, "Tususuru le minca maniunu." 24Kuanangan ka matania si Marta, "Kuagai tususuru nia ka gogoi katusuruat ka gogoi sialu." 25Kuanangan ka matania Yesus, "Aku te katusuruat samba purimanuaiat; kasei sikatonemi aku, muririmanua le nia kenanen matei; 26samba senen sipuririmanua samba sikatonemi aku, ta mamatei nia buru. Matonem leu bagam nenda?" 27Aleginangan nia si Marta, "Oo Tuhan, matonem bagaku ekeu le Kristus, Togat Taikamanua siooi ka polak." 28Lepa aikua nene ei nia isogai sarainania si Maria, kasatnakenangan ngangania masikua, "Aian si Guru sene; aisogai ekeu." 29Arep aiarep nia si Maria, olaakenangan iei masitagetnake Yesus. 30Enan poi ta sesege Yesus ka laggai, ai pei le nia ka kudduat paailiatda si Marta. 31Sia tai Yahudi sipakudduake si Maria ka lalep masipusuibi bagania, kele araitco olat bagat Maria mutuitui, tutrangan nia, ka bagada poi mei nia ka ratei musou sedda. 32Kele aisege ka bebet Yesus si Maria samba aiitco nia, purapponangan ka matat Yesus, kuanangan, "Ai bai ekeu se Tuhan, ta ilalango maniuku." 33Kele aiitco Yesus ipusou si Maria samba saaleinia tai Yahudi leu musou, magolunangan bagania pagalu sou baga. 34Kuanangan, "Kaipa anurateiake kam nia?" Aleginangan nia, "Konan Tuhan nuitco nia." 35Pusounangan leu Yesus. 36Kuarangan tai Yahudi, "Itco pei katet bagania ka tubunia." 37Tapoi ai leu ka talagada sipasikukua, "Nia sibukaake matada simapeset, ta pa momoi igalai bui ilango sinene?" 38Magolunangan bagania minca Yesus, ei nia ka ratei. Ratei nene ia te sara ngaliu siputakke bukku. 39Kuanangan Yesus, "Akkatnake kam bukku!" Kuanangan si Marta, maniu simamatei, "Tuhan, amabutean, aipoi epat ngagogoian." 40Kuanangan ka matania Yesus, "Ta akukuangan ka matam: Ke matonem bagam, ta isosoppi nuitco pulatsanan Taikamanua?" 41Lepa akkatnakerangan bukku. Teilaakenangan matania ka pata Yesus, kuanangan, "Ukkui, kukua sura kekeu, kalulut anuarepi aku. 42Kuagai mariuriu le nuarepi aku, tapoi kalulut sirimanua simigi sipuririo se, kutiboi le nia, bule imatonem bagada, ekeu le aikoiniake aku." 43Kele aikua nene, pusoganangan sabeu nganga, "Latsarus, belaake ekeu!" 44Bela aibela simamatei, rere samba kabeinia ai pei le tutatabut komang, matania aitatabbo komang poposat attinang. Kuanangan ka matada Yesus, "Buka kam tabut ka tubunia ipuenung." 45Maigi sia tai Yahudi siooi masibalou si Maria, kele araitco sigalai Yesus, Matonemnangan bagada ka tubunia. 46Tapoi ai piga pa sieei ka tai Parise masisegeake ka matada sigalai Yesus. 47Ia geti baraakenangan Rapat Sabeu tai imam sabeu samba tai Parise, kuarangan, "Kipangan le tagagalai, maigingan poi aigalai kerek sirimanua nene? 48Ke taoreake bai nia, ta isosoppi sangamberi sirimanua mutonem baga ka tubunia, oirangan leu tai Roma, rauraurangan Uman Taikamanua samba bangsata!" 49Ia geti panibonangan sara ka talagada sipuoni si Kayafas, imam sabeu ka rura nenda, kuanangan, "Ta nuagai kam apa pa, 50samba ta nupaatu kam, maeru pei le ka sita matei sara sirimanua punu tubut simigi, bui sangalio bangsata masubu." 51Tapoi kei ikukua nene ta sibara ka tubunia, kalulut imam sabeu le nia ka rura nene, poiliatnangan kamamatei Yesus punu tubut bangsa Yahudi. 52Samba ta sarat uktuk bangsa Yahudi, tapoi bule iruruake leu tatogat Taikamanua sipusasabu bailiu musara. 53Barania ka gogoi nenda pakerenangan bagada masimateiake Yesus. 54Kalulut nene taan amugejek Yesus ka simatoila ka Yudea, ikaddiuake le, ei nia ka sara laggai simalegere ka simatangeu, sipuoni Epraim, sedda le ikuddu sambada sipasiuluinia. 55Ka teteret nenda malegerengan Punen Paskada tai Yahudi, maigi sia sibara ka laggai nenda mei ka Yerusalem musuru kei bara Paska. 56Ia geti gabarangan Yesus, ai sia muririo ka Uman Taikamanua, patiborangan pasasambada, "Kipa nupaatu kam? Ta pa momoi nia ka punen?" 57Tai imam sabeu samba tai Parise geti arakauan parenta, bule kasei siagai kaipa kudduatnia, buita ipoiliat nia, bule ralaba nia.

will be added

X\