YAKOBUS 4

1Kaipa kabaraiatnia pasaggangan samba pagolukat ka talagamui? Ta pa sibara ka pubotbonan sipauukele ka bagat tubumui? 2Ainubebesiake kam, tapoi ta babara, lepa pasimateimuian. Mututu kam baga, tapoi ta sesege kam ka besiakenenmui, lepa pajoggolomuian samba pagolumuian. Ta babara apa pa ka kam, kalulut ta maninindou kam. 3Ele kenanen manindou leu kam, tapoi ta nusisilo kam apa pa, kalulut masele panindogatmui; aipoi sinindoumui nenda, ka pubotbonan tubumui le nusasappuruake kam nia. 4Kam sipaeelet! Ta nuagai kam, pasuruangan ka taikapolak nene, pasaggangan ka Taikamanua le? Oto kasei sibailiuake tubunia suruak taikapolak nene, aibailiuakean tubunia saggak Taikamanua. 5Ele ka bagamui siboboi le sikuat Surat Sipunenan, "Ketsat sikudduakenen Taikamanua ka bagata, maron puoobania." 6Tapoi abeu pei le kiliu baga sipanguruatnakenennia ka sita. Ia te lulunia aikua Surat Sipunenan, "Isasaggangi le Taikamanua simabuak paatuat, simaepe paatuat geti ikikiliu le." 7Oto pusum kam ka Taikamanua, saggangi kam Sanitu, kaddiuakenangan kam. 8Legeri le kam Taikamanua, legerinangan leu kam. Linaake kam kabeimui, kam sirimanua sijo! Linaake kam paatuatmui, kam simarua paatuat! 9Seseake kam kalilimaimui, pureureu kam baga samba pusou kam; gagamui kau ibailiu soumui samba angkat bagamui bailiu reureu bagamui. 10Paepe kam tubumui ka matat Tuhan, buakngakenangan kam geti. 11Ale sasarainangku, bui nupatiboi kam pasasambamui! Sitiboi sarainania, ele siseleake nia, ia te sipaloloi surukat ele siseleake surukat. Ke nuseleake surukat, oto ta sipasirereddet surukat ekeu, sipasiukum surukat le. 12Sarat sara Sipasiaake surukat samba Sipasiukum, ia te nia simagege masiarauake samba masilangoake. Kasei te ekeu, iooi nuseleake pasambamui sirimanua? 13Arep kam, kam sipasikukua, "Gogoi nene ele mancep mei kai ka laggai anu, kuddu kai sedda pasaki samba masigaba bulagat." 14Apa sibabara ka purimanuaiatmui mancep tapei nuagai kam. Aipoi purimanuaiatmui samba le kele kujuk sitaimauju tuitco, lepa tata. 15Siripokatnia kise le nukukua kam, "Ke iobaake bai si Tuhan samba murimanua kai, galaimaian nene samba nenda." 16Kise nuumunake le kam tubumui ka buak paatuatmui. Pasiuumunmui tubu kele nene, katai le. 17Oto siagai masigalai simaeru, tapoi ta igagalaiake, bailiu jo le ka tubunia.

will be added

X\