YAKOBUS 2

1Ale sasarainangku, kam sikatonemi Yesus Kristus, Tuhanta simalatsat, bui nuiggat kam sirimanua kalulut masiitco tubu. 2Ke tuguru bai sara sirimanua ka parurukatmui sibara sipsip mas samba leppei simalainge, lepa oi leu sara simageba sipuleleppei sikatai, 3roroimuian sipakei leppei simalainge nenda, kuamuian ka matania, "Uddetnake ekeu sene ka simaeru!" Ka simageba geti nukua kam, "Rioake ekeu sedda!" ele, "Uddetnake ekeu ka bagat lalep, ka bebet kalak rereku!" 4Ta anugalaian kam paigganan ka pasasambamui samba nukau kam tubumui sipasiukum sipupaatuat sikatai? 5Arep kam sasarainangku kilibet baga! Ta aipilingan Taikamanua sia simageba ka polak nene ramakayo ka bagat tonem baga, samba bailiu sipasiikep purimataat sinibalaakenennia ka sia sipununtuki nia baga? 6Tapoi nupaloloi le kam simageba. Ta sia simakayo sipajo kam samba sipagirit kam ka pasiukuman? 7Ta sia poi sipasiaasa Oni simaeru, sibailiuake kam bakkat Taikamanua? 8Ke bulatnia nugalaiake kam surukat purimataat sitususurat ka Surat Sipunenan, "Pununtuki baga aleinu sirimanua kele tubum," anugalaian kam simaeru. 9Tapoi ke nuiggat le kam sirimanua, amajongan kam, ukumnangan kam surukat lulut pasasabaumui nia. 10Kasei sireddet sangamberi surukat, tapoi ipasabau sara, amaselengan nia ka sangamberinia. 11Aipoi nia sipasikukua, "Bui nupaelet," nia leu masikua, "Bui nupamatei." Ke ta bai paelet ekeu, tapoi pamatei, sipasabau surukat leu et ekeu. 12Oto ke manibo samba nugalai kam apa pa, repdep kam, ukumakenen surukat sipasiuujaake sirimanua te kam. 13Aipoi ukuman si ta katet baga le kaunen ka tubuda sitaigalai katet baga. Tapoi katet baga le mamamanang ka ukuman. 14Apa kauta nia, sasarainangku, ke ai sipasikukua matonem bagania, tapoi ta anai pasigagalaiake? Momoi pa tonem baga kele nenda masiarauake nia? 15Ai bai sara sarainanta ele maniuta si ta leppei samba simagulai kan senen gogoi, 16samba ai sara ka talagamui masikua, "Kenanan ka erut baga, pakei leppei simakeppu samba pukom teret ektek!", tapoi ta anai ikau apa pa besiakenen ka tubunia, apa kauta nia? 17Kisedda leu te tonem baga: Tonem baga ke ta sialei pasigagalaiake, simamatei le tonem baga nenda. 18Ele ai sipasikukua, "Kekeu ai tonem baga, kaku ai pasigagalaiake," kualegi nia, "Pakoinong kaku tonem bagam sitaialei pasigagalaiake, kupakoinong kaku tonem bagaku sialei pasigagalaiake." 19Matonem bagam sara le Taikamanua? Maeru nenda. Tapoi beri sanitu matonem bagada samba mugeret tubuda. 20Ale sirimanua taiagai paatuat, noba nuseseake nia kineneiget pagalaiat tonem baga sitaialei pasigagalaiake, tonem baga si ta baga le? 21Kai Abraham, ukkuita, ta pa kalulut sigalaiakenennia aiparoipo nia Taikamanua, ka teteret aibuluake togania si Isak ka pasibuluat? 22Itco pei, tonem baga samba pasigagalaiake samba ipugalai, samba kalulut pasigagalaiake le imamumuine tonem baga. 23Sedda te ipuaili siniboi Surat Sipunenan sipasikukua, "Matonemnangan bagat Abraham ka Taikamanua, addeakenangan ka tubunia Taikamanua puroipoatnia." Ia te lulunia tuoniake si Abraham, "Suruak Taikamanua." 24Oto anuitcoan kam, kalulut pasigagalaiake le tuparoroipo sirimanua, ta sarat tonem baga. 25Kisedda leu et si Rahab, sinanalep sijo; ta kalulut sigalainia atuparoipo nia, ka teteret aisilo ka lalepnia tai Israel sipananaiko, samba aibelaake sia ka enungan bagei? 26Aipoi kele tubu si ta ketsat, simamatei le; kisedda leu tonem baga sitaialei pasigagalaiake, simamatei le tonem baga nenda.

will be added

X\