IBRANI 9

1Kirenangan pakerekat baga siboiki ai leu aturan panindogat samba kudduat sipunenan sigalai sirimanua. 2Aipoi ai atutarekngake sapou; bilik ka mata ai ka bagania reret alito samba meja, samba roti buluakenen. Bilik nene tuoniake kudduat sipunenan. 3Ka beliu komang kekere sikarua ai minca bilik oniakenen sipunenan simakope. 4Sedda ai kudduat pasilabokat kumanyang sigalai ka mas, samba peti pakerekat baga, sangalionia tuloplopi mas; ka bagania ai bulibuli mas kudduat manna, tuturat Aron sipusisinula, samba sirua lei bukku pasisuranan pakerekat baga, 5ka uddutnia ai rua tularat kerubim pulatsanan sikunemi takket peti paabanan. Tapoi pagalaiat nene, kineneiget tapei iagai tatiboi nia pasasara. 6Kisedda te ragalai kudduat sipunenan. Sia tai imam mariuriu le ratuguru ka bagat sapou ka bilik siboiki masigalaiake pasikelatda. 7Ka bagat bilik sikaruania geti sarat imam sabeu le tuguguru sangaminca sangarura, samba buita iambit logau buluakenennia kalulut tubunia samba kalulut seleda sabangsania taiaagaietda. 8Ka bagat nene te ipatoila Ketsat Sipunenan, taitububukana pei le enungan ka kudduat sipunenan ujut ai pei le sapou siboiki. 9Sibailiu pasikat tetere kineneiget te nene; tibonannia panguruat samba buluakenen sibuluakenen, ta momoi masisutnake bagai bagada sipasibubuluake, 10sangamberinia nenda poi samba komen, loket samba sene ngamata pasibuiat, sarat puroipoat putubuat le, teret aili tetere pasibaugat. 11Tapoi amoian Kristus, Imam Sabeu katuerukat ka gogoi sibabara. Sapou simabeunan samba simasun eru le aienungi, ta sigalai kabei sirimanua, -- tibonannia ta tuaaddeake nia sibaraakenen, -- 12samba sangaminca le teret buruburu aiguruki kudduat sipunenan ta masiambit logau kambing simanteu samba logau togat jaui, logaunia le aiambit, masibaraake panebuiat teret buruburu. 13Aipoi ke logau kambing simanteu samba logau jaui simanteu samba abut togat jaui sinosoakenen ililinaake sia simalolit, bailiu malina sia ka uddut, 14sara pei logau Kristus; kalulut Ketsat sitaitatata aibuluakean tubunia si ta loloiet ka Taikamanua, ipalilina bagai bagata ka galajet siboboi, bule tasuru Taikamanua sipuririmanua. 15Kalulut nene, bailiu nia Sipatalaga pakerekat baga sibau, bule sia sinogai momoi raikepmake rubeiat sitaitatata sinibalaakenen, amateian poi nia masitebui sangamberi pinasabau sigalaiakenen ujut pakerekat baga siboiki. 16Aipoi kaipa ai surat palelengan, sedda buita ai tusegeake pagalaiat kamateiat sigalai surat palelengan nenda. 17Aipoi surat palelengan, teret amateian le sigalai palelengan ia pei riuriuake; ai pei le geti muririmanua sigalai palelengan tapei tuririuriuake. 18Ia te lulunia pakerekat baga siboiki buita sialei logau itugalaiake. 19Aipoi lepa aitiboi si Mose sangamberi patonekat Surukat ka sangamberi bangsa Israel, alanangan logau togat jaui samba logau kambing simanteu samba oinan, samba bulu simabonan samba romot hisop, lepa sosokinangan nenda buko samba sangamberi bangsa Israel, 20kuanangan, "Nene te logau pakerekat baga sinegeakenen Taikamanua ka kam." 21Samba sapou leu samba sangamberi pugalai sipunenan isosoki leu logau. 22Tukuangan le nia sangamberi apa pa, siripot Surukat Yahudi logau le tukakau masipalina, ke ta anai pasipiliat logau ta anai katuappekat jo. 23Oto sangamberi sitularatnake apa pa sibabara ka sorga buita tulinaake kisedda, tapoi bulat bibilet sorga geti, buita buluakenen simakope eru le bele pei nenda. 24Aipoi ta ka kudduat sipunenan sigalai kabei sirimanua aituguru Kristus, tularat ka sibulatnia le poi nene; tapoi bulat ka sorga le aiei bailiu nia kineneiget Sipatalaga ka matat Taikamanua punu tubuta. 25Ta bule ibuluake tubunia mareirei, kele imam sabeu senen rura tuguru ka sipunenan simakope masiambit ta logaunia. 26Aipoi ke kisedda bai, buita mareirei ipasiorik barania ka pasibaraat polak. Tapoi sangaminca le ipatoila tubunia ka kalepakat tetere masiposa jo kalulut bubuluakena tubunia. 27Makere kele siteuakenen ka sirimanua sangaminca le matei, lepa nenda, ukumanan le, 28kisedda leu te Kristus, sangaminca le aibuluake tubunia masibairat jot sangamberi sirimanua. Lepa nenda patoilanangan tubunia minca, taan masibairat jo, masipanguruatnake puaragatnan le ka sia sipasingengenaake nia.

will be added

X\