IBRANI 6

1Oto tagalakngakean kam nganturat panandaat pagalaiat Kristus, tariuriuake masiailiake simasun. Buian taoleake minca masigalakngake bongen pasibaugat paatuat ka galajet siboboi, samba bongen putoneman baga ka Taikamanua, 2ia te nganturat pagalaiat pasiraukat, pasitoneman kabei, katusuruat simamatei samba ukuman sialu. 3Masituppaiakean le tagagalaiake, ke iobaake Taikamanua. 4Aipoi sia, ke atutoroijingan paatuatda sangaminca, arananaman panguruat sorga, samba amueneuan sia ka bagat Ketsat Sipunenan, 5samba arananaman tiboiet sibara ka Taikamanua samba arananaman geget gogoi sialu sibabara geti, 6tapoi lepa siksikrangan teiteira minca, taan iagai tuoleake sia minca ka pasibaugat paatuat, aipoi arasiliktengaakean minca Togat Taikamanua ka tubuda samba rapakaila nia ka matat siberikabaga. 7Aipoi polak sipasipopotpot urat simareirei bele ka uddutnia, samba itutuake uremen simaeru ka sia sipasigagalai, rasilo uktuk sibara ka Taikamanua. 8Tapoi ke rui samba bekbekkurut le itutuake ta anai kauta nia, teleietnan le, kalepakatnia tulaboake. 9Tapoi sasaraina kilibet baga, kenanen kukua kai kisedda pagalaiat kam, matonem bagamai aian ka kam simaeru sibaraake puaragat. 10Aipoi ta sitaimaroipo Taikamanua bailiu ikalipogi galajetmui samba nuntut baga pinatoilamui ka oninia, kalulut pasikelatmui ka sia sipunenan, samba teret kineneiget ainupasisikeli kam. 11Tapoi kiddietmai, bule nupakoinong kam senemui ngamang kele nenda, imamuine pukakaronanmui teret kalepakat, 12bule ta ibailiu kam simabeili, tapoi bailiu sipasitututnake sia sipasiikep palelengan Taikamanua kalulut tonem baga samba om baga. 13Aipoi ka teteret aikau palelengan kai Abraham Taikamanua, ka tubunia le aipusuppa, ta anai poi kasei pa sisaliu beunannia, 14kuanangan, "Bulatnia kususukatnake ekeu samba kuiigiake ekeu." 15Kele aingenaake nia si Abraham ka om baga, silonangan leu siripot palelengan ka tubunia. 16Aipoi sirimanua musuppa ka onin sirimanua siabeu ka tubunia, samba suppa nenda pasiron ka tubunia, silepaake sangamberi pajoggolat. 17Kalulut ioba Taikamanua masipakoinong imakope ron tonem bagada sipasiikep palelengan pagalaiat taisisilina siteuakenenia, ronakenangan nia Taikamanua ka bagat suppa, 18bule kalulut sirua toggaiat sitaioi tusili, ka bagat nenda ta maboko Taikamanua, sita sigaba pukuneman bara ka sita patubbuiat simaron masiagoi karonietta sikuddu ka matata. 19Pukakaronan nenda ia te kele sao sitaioi tugeugeu samba simaron ka ketsatta, sisaoakenen pat aili ka teitei komang kekere, 20ka kudduat situguruna Yesus sipapa enunganta, sibailiu Imam Sabeu teret buruburu siripot aturan Melkisedek.

will be added

X\