1 Aipoi senen imam sabeu, sipili ka talagat sirimanua, tupauddet punu tubut sirimanua masipatabbaraake sia ka Taikamanua, bule ibuluake panguruat samba buluakenen kalulut jo. 2 Buita iagai ipaatu sia sitaimaagai samba simapepepe, aipoi beri tubunia leu sun pugulaiat. 3 Ia te lulunia buita ibuluake buluakenen kalulut jo, ta sarat joda simigi, tapoi jonia leu et. 4 Samba ta anai kasei pa sikau tubunia muimam sabeu, sinogai Taikamanua le nia, kele si Aron. 5 Kisedda leu te Kristus, ta tubunia aibailiuake tubunia Imam Sabeu, Taikamanua le sipasikukua ka matania, "Togaku te ekeu! Gogoi nene akututuake ekeu." 6 Kele sikuania leu ka ruang bagei, "Ekeu te Imam teret buruburu, siripot aturan Melkisedek." 7 Ai pei le nia muririmanua ka puakkulakat, aibuluakean panindogat samba tiddoget sialei geri sabeu samba elu ka Taikamanua siooi masiarauake nia ka kamateiat, samba kalulut purereddetnia ka Taikamanua aiarepingan nia. 8 Samba kenanen Toga nia, aigelai le mureddet ka sangamberi sioriknia, 9 samba kele aikappuluake sangamberinia, bailiu nia bakkat puaragat sitaitatata ka sangamberi simareddet ka tubunia, 10 samba ioniake nia Taikamanua Imam Sabeu siripot aturan Melkisedek. 11 Pagalaiat nene maigi kuanenmai, tapoi mabesi itukolouake kalulut magulai tubumui masiarep. 12 Aipoi kenanen siripot buru, mateuan ibailiu kam guru, tapoi buita tugelaiake pei le kam minca bulat ka panandaatnia tiboiet Taikamanua; buita susu pei le nulolo kam, tapei kan simakela. 13 Aipoi senen siputotottot tapei iagai kolou puroipoat, toga sigoiso pei le poi nia. 14 Kan simakela geti ka sia sikebbukat le, kalulut amatukelengan ka tubuda, raagaian masipabaggei simaeru sikatai.
