IBRANI 4

1Oto kau tamaloto kam, bui bara beri sara ka talagamui situkakaddiu, kenanen palelengan tuguru ka puariatnia ai pei le muririuriu. 2Aipoi ka sita leu atupaarepman Katuareman Simaeru makere kele ka sia; tapoi tiboiet siarepda ta arapuuktungi, kalulut ta sialei tonem baga ka sia sipasiaarep. 3Aipoi sita simatonem baga, tuguguru ka kudduat puariat kele sikuat Taikamanua, "Bailiu pusuppakungan ka goluku: Taan tuguguru sia ka kudduat puariatku," kenanen alepaan galajetnia barania ka pututukat polak. 4Aipoi pagalaiat gogoi sikapitunia aikua ka sara ruang kise, "Ka gogoi sikapitunia puarinangan Taikamanua ka sangamberi galajetnia." 5Samba ka pagalaiat nene tusurat minca, "Ta tuguguru sia ka kudduat puariatku." 6Oto makolou ai pei le sia sipulelegei situguguru ka puariat nenda, sia geti sipuboboiki masiarep Katuareman Simaeru ta atuguru kalulut taimareddetda. 7Ia te lulunia itetereake minca sara gogoi, ia te "gogoi nene," sikuania kai David pasat piga pa burunia kele sikuania ka panandaatnia, "Gogoi nene, ke nuarep kam ngangania, ba kekelaake kam paatuatmui!" 8Aipoi ke aitaroakean bai sia si Yosua ka kudduat puariat, taan leu ikukua Taikamanua pasat nenda pagalaiat gogoi bagei. 9Oto ai pei le Sabbat puariat ka bangsat Taikamanua. 10Aipoi situguguru ka puariat Taikamanua, muari leu nia ka galajetnia, kele Taikamanua muari ka galajetnia. 11Oto kau tabesiake kam tuguru ka puariat nenda, bui bara kasei pa sibebele kalulut masitutnake taimareddet nenda. 12Sipuririmanua le tiboiet Taikamanua samba mabaje samba makope lauru, bele pei palittei, samba makeru ikokom, pat pasaraakenangan enga ka ketsat, pauilakat ka unou tolat, samba iagai masipabaggei sibongan baga samba isiat paatuat. 13Ta anai beri sara sibaraakenen simalilipput ka matania, aipoi sangamberinia le bulutut samba matoila ka matania; ka tubunia le tapasialegi. 14Aian poi ka sita Imam Sabeu Sipulubeunan, sigejengi sangamberi sorga, ia te Yesus, Togat Taikamanua, oto kauan imaron taukkaake pasimunengan tonem bagata. 15Aipoi Imam Sabeuta ta sitaiagai masiorik pugulaiatta; silepa sibo le nia, ka bagat sangamberinia makere kele sita, sarat jo le ta anai. 16Oto kauan ka emen baga talegeri kam uddenan pukilibat baga, bule tasilo puuktungan samba tasese kiliu baga, ibara paroman ka sita ka teterenia.

will be added

X\