IBRANI 13

1Kau imariuriu nuntut bagamui ka sasaraina. 2Bui nukalipogi kam masirauma sirimanua, aipoi kalulut pasirarauma, pat bara sabagei taiaagaietda raumarangan samalaika. 3Repdep kam sia sipenjaraakenen, addeake kam tubumui kele sambamui tupenjaraake. Samba repdep kam sia pinaorei, aipoi beri kam leu ai pei le kam muririmanua ka polak. 4Suru kam sangamberimui putatalimou samba bui nupalolit kam pereman; aipoi sipuuumun samba sipaeelet iuukum le sia Taikamanua. 5Bui numaalau kam baga ka bulagat; kipa teret sibabara iangan te nupusasanangi kam. Aikuangan poi Taikamanua, "Bulat ta kuooreake ekeu samba bulat ta kukakaddiuake ekeu." 6Ia te lulunia tonem le bagata masikua, "Si Tuhan le sirom aku; ta maloloto aku. Apate momoi ragalai sirimanua ka tubuku?" 7Repdep kam sia siuteake kam, sipasititiboi tiboiet Taikamanua ka kam. Lelekngake kam kalepakat purimanuaiatda samba ului kam tonem bagada. 8Yesus Kristus geti ia leu ne nia sokat, kineneiget samba teret buruburu. 9Bui ipepeake kam sene ngamata nganturat pabageibagei. Aipoi kiliu bagat Taikamanua le simaeru masironake paatuat, ta kalulut komen. Sia situtnake aturan komen kele nenda ta anai uktukda. 10Ka sita ai meja pasibuluat samba sia sipugagalai ta momoi rakom apa pa ka bagania. 11Aipoi tubut tarimeu, silepa ala logaunia iambit nia imam sabeu ka kudduat sipunenan simakope sibailiu buluakenen pasiappet jo, tulabo ka gerat sapou. 12Ia leu te lulunia, Yesus ka bebe le, ta ka bagat kota aipasiorik ikau logaunia masipalina bangsania. 13Oto sita kam tatagetnake nia ka gerat sapou taorik kam nia sambata paloloiat ka tubunia. 14Ta poi anai sene laggaita simariuriu; laggai sibabara le gabaetta. 15Oto kau imariuriu tabuluake kam pusurakat ka Taikamanua ka onin Yesus, ia te buat bibo silatsatnake oninia. 16Samba bui nukalipogi kam masigalai simaeru samba masikau paroman, buluakenen kele nene poi obaket bagat Taikamanua. 17Reddet kam sia siuteake kam samba tut kam sia; airapasisikeli poi ketsatmui, samba sia leu masiaalegi ka Taikamanua. Bule ka angkat baga ragalaiake nia, bui ka puhohoihoi; aipoi nenda ta mauuktuk kam. 18Tiddouake kam kai simariuriu. Aipoi matonem bagamai maeru le bagai bagamai, kalulut sarat simaeru le koba kuparaboatnake kai. 19Kutiddou simakope nutiddouake kam aku, bule imaruei itoiliake aku Taikamanua ka kam. 20Ia geti Taikamanuan paabanan, sipasiririmanuaake minca Tuhanta Yesus, ia te Sipasijajago Sabeu ka sangamberi biribiri kalulut logau pakerekat baga sitaitatata, 21bule nia le masipatarek kam ka sangamberi simaeru nugalai kam obaket bagania, samba mugalai ka bagata apa sipasesese ka matania kalulut Yesus Kristus. Ka tubunia le pulatsanan teret buruburu! Amen. 22Kutiddou ka kam, sasaraina, bule nusilo kam ka erut baga nganturat nene, ta le poi mananta suratku nene ka kam. 23Bule nuagai kam nia, sarainanta si Timoteus, abelangan nia ka penjara. Segena le, oi kai ruamai masibalou kam. 24Segeake kam salammai ka sautemui samba ka sangamberi sipunenan. Salam ka kam sibara ka sasaraina ka Italia. 25Kiliu bagat Taikamanua masipaalei kam sangamberimui.

will be added

X\