IBRANI 12

1Oto ka sita leu kalulut maigi sipasimuneng sibokko sita kele tanairusa, kau taribbaiake kam sangamberi bairanen samba jo sisaila sita, samba taomake kam pabalau ka bagat patakaiat siteuakenen ka sita. 2Ka bagat masigalaiake nene, kau takinere kam Yesus, sipalulu sita mutonem baga samba sipamuine tonem bagata. Ta aipuletsei aila, iomake masibairat siliktenga, silit angkat baga situtatarek ka Sia. Kineneiget amukuddungan nia kai kattoet uddenan purimataat Taikamanua. 3Kau imariuriu nurepdep kam nia, sipasioorik pajoggolat sabeu sibara ka sirimanua sijo sisaggangi nia, bule ta masaggo kam samba mutete paatuat. 4Ka bagat pasagganganmui masisaggangi jo, tapei abela logau ka tubumui. 5Anukalipogingan pa kam nganturat sipasikukua ka matamui kele tatoga, "Ale togaku, bui nupuarak nganturat Tuhan, samba bui nupusala ke ikiroi ekeu; 6ikikiroi le poi si Tuhan senen simanuntu bagania, samba senen togaetnia ililiso le." 7Ke nuorik kam pakiroat, aaddeakena le kam Taikamanua togania. Kaipa poi toga taipanganganturet ukkuinia? 8Ke ta bara pakiroat ka kam kele siorikda senen sirimanua, oto ta bulat bakkat toga kam, tatoga ka bebe le. 9Beri ka saukkuita ka polak, tasisilo leu pakiroat, samba tasuru sia. Ta pa sara pei tapusum ka Ukkui ka sangamberi ketsat, bule tapurimanua? 10Saukkuita ka polak piga ngagogoi le pa ranganturu sita, siripot pinaatuda kipa simaeru. Tapoi Taikamanua geti masikiroi sita sibailiu katuerukatta, bule tapusipunenan ka sita sibara ka Sia. 11Kirenangan sangamberi pakiroat ka teteret ibara, taitco nia ta angkat baga, reureu baga le. Tapoi kalepakatnia buaakenangan puroipoat sibaraake aban ka sia siubui ka bagat nenda. 12Oto ronake kam minca kabeimui simasaggo samba bokkolomui simaguluu. 13Samba roipoake kam enungietmui, bule ta tujulut rere simajegeu, tapoi male le. 14Besiake kam paaban ka sangamberi sirimanua, samba leu puririmanua sipunenan, aipoi ke ta kisedda beri sara siooi masiitco si Tuhan. 15Pagaba kam, bui bara kasei pa siareuake tubuna ka kiliu bagat Taikamanua, bui ipututu ungat simapongit sibaraake pugejaat baga samba silolitnake maigi sirimanua. 16Bui bara kasei pa sipuuumun ele sitaisuru puririmanua kele si Esau, sisakiake pukekebbunia silit sangapiring kan. 17Aipoi nuagai kam, lepa nenda, ka teteret ioba masisilo panukanan, atutataake le nia, aipoi taan anai oggak masipaeru selenia, kenanen pagalu elu ibesiake nia. 18Aipoi ta ka leleu siooi tutului anuoi kam, samba api sipujujuluu, samba pugepgeman, puineman samba talabari; 19samba nau pipiau samba nau nganga sabeu. Kalulut masiarep nganga nenda, sia sipasiaarep, tiddourangan buian sia ipatiboake. 20Aipoi taan raoom masiarep parenta nene, "Beringan tarimeu masitului leleu, buita tubaijungi nia bukku!" 21Kopet tukalotoake masiitco nene, kuanangan si Mose, "Bulat maloto aku samba mugeret tubuku." 22Tapoi ka leleu Sion le anuoi kam, ka kotat Taikamanua sipuririmanua, Yerusalem sorga, samba mupulu ribu malaika, siparururu mugora baga, 23samba ka paamian toga sikebbukat sitususurat oni ka sorga, samba ka Taikamanua sipasiuukum sangamberi sirimanua, samba paketsatketsat sirimanua simaroipo silepa paeru, 24samba Yesus, Sipatalaga pakerekat baga sibau, samba logau sosoakenen, sipaninibo sisaliu ron logau Abel. 25Pagaba kam, bui te ta nuarepi kam nia sipaninibo. Aipoi ke ta bela sia sitaioba masiarepi sipasisesegeake tiboiet Taikamanua ka polak nene, sara pei sita ke ta taarepi nia sipaninibo sibara ka sorga. 26Ka teteret nenda ngangania masipangeungeu polak, tapoi kineneiget iake palelengan masikua, "Ai pei sangaminca, ta sarat polak kupangengeungeu, tapoi samba manua leu." 27Tiboiet "Ai pei sangaminca" masipatoila pasiliat ka siooi tupageugeu kalulut sibaraakenen poi, bule sarat sitaioi tugeugeu le mulelegei. 28Oto kalulut sisilota purimataat sitaioi tupageugeu, kau takua kam sura samba manindou ka Taikamanua siripot siobat bagania, ka bagat suru samba loto. 29Aipoi Taikamanuanta ia te api sipasilalabo.

will be added

X\