IBRANI 11

1Tonem baga ia te masibulatnake karoniet, masimunengake sitaiiitcoket. 2Kalulut tonem baga poi taikebbukatta siburu bailiu tumunengake sia. 3Kalulut tonem baga, agaitangan polak nene sibaraakenen tiboiet Taikamanua le; oto sangamberi simaiitco, sibara ka sitaimaiitco le. 4Kalulut tonem baga, ibuluake si Abel ka Taikamanua buluakenen simakaeru bele pei buluakenen Kain. Nenda te masimunengake simaroipo le nia, ioba poi Taikamanua buluakenennia, samba kalulut tonem baga, kenanen amateian nia, ai pei le nia maninibo. 5Kalulut tonem baga, si Henokh tuakkat ka sorga, bui iitco kamateiat, samba ta atusese nia, aiakkatnakean poi nia Taikamanua ka sorga. Aipoi enan tapei tuakkat nia aian pasimunengan ka tubunia obana nia Taikamanua. 6Si ta tonem baga geti ta iooba nia Taikamanua. Kasei poi silegeri Taikamanua, buita ikatonemi kababarat Taikamanua, samba senen sipasigagaba nia ikakau upania Taikamanua. 7Kalulut tonem baga, lelekngakenangan si Noak nganturat Taikamanua pagalaiat sibabara ka sitaiiitcoket pei le. Lotonia, reddetnangan masigalai kinapat katuaragatda sangalalepnia; samba kalulut tonem baga, ukumnangan taikapolak, samba bailiu nia sipasiikep puroipoat siripot tonem bagania. 8Kalulut tonem baga, mareddetnangan si Abraham, ka teteret aisogai nia Taikamanua ipujaujau ka laggai sibailiu ikepmakenennia; pujaujaunangan leu et ka kudduat taiaagaietnia pei le. 9Kalulut tonem baga, kuddujinangan polak palelengan, musitoi ka polakda sasareu; kuddu nia sedda ka sapou, samba sia si Isak, samba si Yakob, sibailiu sipasiikep palelengan nenda leu et. 10Aipoi ai le ingengenaake kota sipubobongen simaron, sitularani samba sirioakenen Taikamanua. 11Kalulut tonem baga leu si Sara, aioi aipusuruket, kenanen aisabauan rurania, kalulut iaddeake Taikamanua sikau palelengan katoneman le. 12Ia te lulunia sibara ka sara sirimanua, momoi tukua amateian tubunia, mututu sapunuteteu kele panyanyat ka manua samba ngai ka bebet koat, sitaioi tuadde iginia. 13Sangamberida nene amateian sia ka tonem baga, ta arasilo sinibalaakenen, ka sareunan le araitco nia samba raroroi nia samba raseseake sitoi le sia samba sipueekpak ka polak nene. 14Aipoi sia sipasikukua kisedda masipatoila ai le sia masigagaba bakkat laggai. 15Samba ke bai rarepdep polak kabaraiatda sikaddiuakenenda, metnangan iaili tetere ratoili. 16Tapoi kineneiget laggai simakaeru le rabebesiake, ia te ka sorga. Ia te lulunia ta maila Taikamanua itukua nia Taikamanuanda, aitarekngakean poi ka sia sara kota. 17Kalulut tonem baga, buluakenangan si Isak si Abraham ka teteret aisibo nia Taikamanua. Aisiloan tebai palelengan, matarek nia masibuluake togania sisasara, 18kenanen aikuangan Taikamanua ka matania, "Sibara kai Isak le oniakenen punuteteunu." 19Ipaatu poi momoi le isuruake simamatei Taikamanua. Oto momoi tukua sibara ka simamatei le aisilo minca si Isak si Abraham. 20Kalulut tonem baga leu kai Isak aisukatnake si Yakob samba si Esau sipuaaili ka gogoi sibabara. 21Kalulut tonem baga kai Yakob, kei matei nia, sukatnakenangan ruada togat Yosep, lepa panindounangan aiaaddaiji utet tuturania. 22Kalulut tonem baga, malegerengan le imatei si Yosep, parepdepnangan pagalaiat kabebelada tai Israel samba ipatone galaiakenenda ka pagalaiat tolatnia. 23Kalulut tonem baga, kele aipututu matat Mose, lipputnakerangan nia saeppunia telu ngalaggo burunia, kalulut raitco laingen tubunia samba ta rakalotoake parentat rimata. 24Kalulut tonem baga, kele aimabeunan si Mose, ta ioba ituoniake nia toga ka togat Parao sinanalep, 25aipoi masiorik paoreat sambada bangsat Taikamanua pei le ioba bele pei muangka baga goiso sibara ka jo. 26Aipoi katuloloiat kalulut Kristus le iaddeake pukayoat sabeu bele pei le sangamberi bibiletda tai Misir; upa ka gogoi sibabara le poi imamattai. 27Kalulut tonem baga, kaddiuakenangan Misir, ta aikalotoake golut rimata; iriuriuake le, aipoi Taikamanua sitaimaiitco kele aiitcoan le. 28Kalulut tonem baga, galainangan si Mose Paska samba pasisosokat logau, bui ilangoake togada sikebbukat malaika sipasilalango. 29Kalulut tonem baga, talipokirangan Koat Simabonan tai Israel samba le kele masitalipoki polak simagarak; tai Misir geti kele arasibo nia ka sia, maloulourangan. 30Kalulut tonem baga, maragatnangan gelit Yeriko, kele arabokko nia tai Israel pitu ngagogoi ujunia. 31Kalulut tonem baga, si Rahab, sinanalep sijo, ta amasubu nia pasamba sia simakela paatuat, aisilo poi tai Israel sipananaiko ka bagat aban. 32Apangan le bagei kuanenku? Aipoi ta iaaili tetere kununuake pagalaiat si Gideon, si Barak, si Simson, si Yepta, si David samba si Samuel samba tai nabi. 33Sia nenda kalulut tonem baga, arakalaakean purimataat, ragalaiake puroipoat, rasilo sinibalaakenen, rapetpet ngungun singa, 34rapeake api sipujujuluu. Abelangan ka son lanjau, simagulai tubu sia amaronan, amagegengan sia ka pasaggangan samba arasabuakean tenterada tai saggak. 35Saina masisilo minca saeppuda simamatei, atusuruakean poi sia. Sabagei geti raobaake tubuda rapaorei sia, ta raoba rabelaake sia, bule rasilo katusuruat simakope eru. 36Sabagei raorik paloloiat samba rabobo, rakabe pei samba rapenjaraake. 37Rabaijungi bukku, ragaji, ramateiake sinete; muekpak sia muleppei kulit biribiri samba kulit kambing; raorik pei geba, gejat baga samba paoreat. 38Polak nene ta mateu kudduatda. Muekpak le sia ka simatangeu samba ka leleu, ka bagat ngaliu samba ka lobok polak. 39Sangamberitda nene, kenanen atuumunakean sia kalulut tonem bagatda, tapoi tapei arasilo sinibalaakenen. 40Aipoi aitarekngakean Taikamanua simakope eru akenennia ka sita; ta rasisilo simasun eru ke ta sambata.

will be added

X\