IBRANI 10

1Aipoi ka Surukat sarat ailiggou pagalaiat simaeru ka gogoi sibabara le, ta bulat tubut puaragat. Ia te lulunia ka bagat buluakenen simakere sibuluakenen senen rura, Surukat ta momoi masipaeru sia siooi masipanindogi Taikamanua. 2Ke momoi bai ipaeru sia, taan leu maoole rabuluake buluakenen, aipoi sia sipanindogi Taikamanua taan iagai tubuda joda, atulinaakean sia sangaminca, lina teret buruburu. 3Tapoi ka bagat pasibubulu buluakenen senen rura, sedda te masiparepdep sirimanua kababarat joda. 4Aipoi ta momoi logau jaui simanteu samba logau kambing simanteu masiposa jo. 5Ia te lulunia kele aioi Kristus ka polak, kuanangan, "Buluakenen samba panguruat ta nukikiddi, tubu le anutarekngake kaku. 6Buluakenen tarimeu rarangen samba buluakenen pasiposat jo ta nuoba. 7Lepa kuanangan, 'Bulatnia, amoian aku, ka bagat buko sipurutnakenen atusuratnakean pagalaiat aku masigalaiake siobat bagam, Taikamanuangku.' " 8Ka pata aikua, "Buluakenen samba panguruat, buluakenen tarimeu rarangen samba buluakenen pasiposat jo ta nukikiddi samba ta noba nenda" -- kenanen tubuluake siripot Surukat --. 9Lepa nenda kuanangan, "Bulatnia amoian aku masigalaiake siobat bagam." Tataakenangan siboiki, bule irioake sikarua. 10Ka bagat teu bagania nene te aipalina sita kalulut katububulut tubut Kristus Yesus sisangaminca teret buruburu. 11Samba senen imam masigalaiake pasikelatda senen gogoi samba paoleole masibuluake buluakenen simakere, sangamberinia nenda ta momoi masiposa jo. 12Tapoi Kristus geti kele aibuluake sara le buluakenen kalulut jo, pukuddunangan teret buruburu kai kattoet Taikamanua, 13kineneiget masingena teterengan le itukau saggaknia bailiu kalak rerenia. 14Aipoi lulut sara buluakenen le aibailiuake simasun eru teret buruburu sia sipuneninia. 15Pagalaiat nene Ketsat Sipunenan leu masimunengake ka sita, aipoi lepa aikua, 16"Nean le pakerekat baga baraakenenku ka sia pasat oggak nene," kuanangan minca, "Ka bagadangan le kukakau Surukatku, ka paatuatdangan le kususurat nia, 17sangamberi joda samba seleda taan kurerepdep." 18Kaipa poi ai katuappekat sangamberinia nene, taan leu tububuluake buluakenen kalulut jo. 19Oto sasaraina, kalulut logau Yesus, amaemengan sita masiguruki sipunenan simakope, 20aibukaakean poi ka sita enungan sibau samba sipuririmanua masitebek kekere, ia te tubunia, 21samba aian ka sita Imam Sabeu sikupkup Uman Taikamanua. 22Oto talegeringan kam nia Taikamanua ka paatuat simalina samba ka tonem baga simaron, atupalinaan poi paatuatta ka pubabagai baga sikatai, samba tubuta atubuian oinan simalina. 23Kau imaron taukkaake pukakaronanta munengakenenta, simatopit le poi nia sipusisibala. 24Pajigi le kam sita pasasambata mununtu baga samba mugalai simaeru. 25Bui tamaore moi ka parurukat kele galai tubuda sabagei. Panganturu le kam sita pasasambata, sara pei itutangari, anuitcoan poi kam gogoi Tuhan aian malelegere. 26Aipoi ke tapali bai mugalai jo, lepat atasilo puaagai pubulanan, taan te anai minca buluakenen pasiposat jo. 27Sarat ukum sikatai besian le ngenaakenen samba api golut baga sisubuake sipasilalawan. 28Ai bai sipasabau surukat Mose, tumateiake le nia ta tuiinou, ke aian rua ele telu sipasimumuneng. 29Sara pei kopet sanenia ukuman simateu orakngakenen ka sipaperaki Togat Taikamanua, siaddeake simalolit logau pakerekat baga sipuneni nia, samba sipaloloi Ketsat siake kiliu baga. 30Aipoi ataagaian nia sipasikukua, "Kaku le pasiukuman. Aku le masilulumunake." Samba minca, "Iuukum le bangsania si Tuhan. 31Bulat kalotoakenen te ke iorak sita kabei Taikamanua sipuririmanua. 32Repdep kam ka tetere situsasabau. Lepa aitutoroiji kam, maigi anuorik kam, kalulut nuomake kam pasaggangan simaron. 33Sabagei rabailiuake ikbungen paloloiat samba pugejaat baga, sabagei isappo masiorik oringenda sipasioorik kisedda. 34Aipoi anututnan kam masiorik oringenda sipenjaraakenen, samba ka teteret raraurau bibiletmui, maangka le bagamui masisilo nia, nuagai poi kam, ai pei le ka kam bibilet simakope eru samba simatom. 35Oto bui nugikgikngake kam tonem bagamui, abeu poi upania. 36Aipoi besiakenen le nupuom kam baga, bule ioi nugalaiake kam obaket Taikamanua samba nusilo kam sangamberi palelengannia. 37"Aipoi ai le goiso, bulat taan mauuju, momoian le nia, nia siooi, taan ipauuju kaooinia. 38Sirimanuangku simaroipo geti muririmanua sia kalulut tonem baga, tapoi ke isiksik teiteinia, taan kuooba nia." 39Sita geti ta sirimanua sisiksik teitei, sieei ka pulangokat, simatonem baga le, sieei ka puaragat.

will be added

X\