IBRANI 1

1Siburu mareirei samba ka sene ngamata enungan aipatiboake taikebbukatta Taikamanua ka ngungunda tai nabi. 2Tapoi ka tetere sikateitei nene, patiboakenangan sita ka bagat Togania, sikokoiakenennia bailiu sipasiikep sangamberi sibabara. Kalulut nia leu aibaraake polak nene Taikamanua. 3Torot pulatsanan Taikamanua le nia samba tularat putubuat Taikamanua samba ibairat sangamberi sibabara kalulut tiboietnia simasun gege. Samba lepa aigalai pulinakat jo, puuddetnangan kai kattoet Sipulubeunan, ka pata. 4Toga nene saliu beunanda samalaika, kele oni sipanguruatnakenen ka tubunia saliu pei le laingen oninda samalaika. 5Ka matat malaika kasei poi aikua Taikamanua, "Ekeu te Togaku! Gogoi nene kututuake matam?" samba minca, "Bailiunangan aku Ukkuinia, samba bailiu nia Togaku?" 6Samba minca ka teteret aikoiniake Togania sikebbukat ka polak, kuanangan, "Sangamberi malaikat Taikamanua buita murappo ka matania." 7Samba ka pagalaiat malaika aikua, "Sibailiuake samalaikania bailiu rusa samba sapaguguletnia bailiu juluu api." 8Ka pagalaiat Toga geti aikua, "Uddenan purimataatnu Taikamanua, riuriu le teret buruburu, samba tuturat purimataatnu tuturat puroipoat le." 9"Nupununtuki baga puroipoat samba nupulagaki baga pukataikat; ia te lulunia aitulaji ekeu Taikamanua, Taikamanuam tula puangkakat baga, bele pei saaleinu." 10Samba, "Ka panandaatnia pei le, ekeu le, Tuhan aibaraake polak, samba pamanuamanua sigalai kabeinu le. 11Sangamberinia nenda tatata le, ekeu geti riuriu le, samba sangamberinia nenda makakatai le kele leppei; 12kele mantel le nupurutnake sia, samba kele leppei tusisili le sia, ekeu geti ia leu ne nia, samba ruram ta anai kalepakat." 13Samba ka matat malaika kasei poi aikua, "Uddetnake ekeu kai kattoetku, teret kukau saggaknu bailiu kalak rerem?" 14Samalaika geti ia te ketsat pagugulet Taikamanua, koiniakenen masirom sia sipasiikep puaragat.

will be added

X\