GALATIA 6

1Ale sasaraina, ke ai tusese sara sirimanua sigalai sele, oto kam sinopsop Ketsat masipalulu nia ka enungan puroipoat ka bagat leppet baga; jago leu tubum kekeu, bui iorak ekeu pasisiboat. 2Parom kam masibairat bairanenmui, kisedda le poi nusutnake kam surukat Kristus. 3Aipoi ke ai kasei pa siumunake tubunia, oto ta anai apa pa sibabara ka tubunia, aipatajungan tubunia. 4Kau le senen sirimanua masisibo sigalainia; ia geti momoi iumunake tubunia sarania iitco sigalainia, ta sigalaira sabagei. 5Senen sirimanua le poi masibabairat bairanennia. 6Sirimanua sigelaiakenen tiboiet Taikamanua, kau irubeiake sibabara ka tubunia ka sipasigegelaiake nia. 7Bui isele kam! Ta paguileakenen Taikamanua. Apa poi ikaramake sirimanua, ia leu te imomonei. 8Aipoi sipangangaram ka akkulania, pulangokat le imomonei sibara ka akkulania, tapoi sipangangaram ka Ketsat, purimanuaiat sitaitatata le imomonei sibara ka Ketsat. 9Bui tamagela masigalai simaeru, aipoi ke aiailingan teterenia pasimoneitangan, ke ta bai masaggo sita. 10Oto ujut ai pei le oggak ka sita, kau tagalai simaeru ka sangamberi sirimanua, sara pei ka saaleita sikere tonem baga. 11Itco pei kam, beunannia takat surat sinurat kabeiku ka kam. 12Sia sioba masipaumun tubu ka uddut, sia te sibesiake nupusunat kam, sarat bule ta itukukuru sia kalulut siliktengan Kristus. 13Beringan poi sia sipususunat, ta leu ragagalaiake Surukat; obara le nupusunat kam, bule ramaumun ka pagalaiat akkulamui. 14Tapoi kaku geti bulat ta koba kuumunake tubuku, sarat ka bagat siliktengan Tuhanta Yesus Kristus le. Kalulunia poi aitusiliktengaake polak nene kaku, samba aku tusiliktengaake iaddeake polak nene. 15Aipoi musunat ele ta musunat, ta anai pagalaiatnia, katubabailiu sibaraakenen sibau le abeu. 16Bule aban samba katet baga le ka sia siparaboatnake aturan nene, samba ka Israel Taikamanua. 17Barania kineneiget, buian ibara kasei pa sigejaake bagaku, kalulut ai le kupaambit ka tubuku toggaiat pagugulet Yesus aku. 18Bule kiliu bagat Tuhanta Yesus Kristus masipaalei ketsatmui sasaraina! Amen.

will be added

X\