GALATIA 5

1Bule tapuuja sipulelelek, ujaakenangan sita Kristus. Oto kau imaron nupurio kam, buian nuoba kam minca ibailiu kam pagugulet. 2Arep kam, aku Paulus masikua ka kam: ke musunat pei le bai kam, taan anai kaumui nia Kristus. 3Kumunengake nia minca ka senen sirimanua sioba musunat, buita igalaiake sangamberi aturan Surukat. 4Ke nukaroni kam puroipoat kalulut Surukat, abelangan kam ka Kristus, taan anai kam ka bagat kiliu baga. 5Aipoi ka bagat Ketsat le samba kalulut tonem baga tangenaake kam puroipoat karonietta. 6Aipoi ka bagat Kristus Yesus, musunat ele ta musunat, ta anai pagalaiatnia, sarat tonem baga simakokoinong ka bagat nuntut baga le. 7Siburu amaeruan patatakaimui. Kaseian le amasisaila kam, bui nureddet kam pubulanan? 8Patubbuiat ta mureddet nene, ta te sibara ka Taikamanua sipasisosogai kam. 9Goiso le sioman, siop sangatatappa tapung galajet roti. 10Ka bagat Tuhan matonem bagaku pagalaiat kam, ta aisili pinaatumui ka pinaatuku. Tapoi kasei masipageugeu kam, ai leu ibairat ukumannia, kenanen kasei pa nia. 11Aku kaku geti sasaraina, ke kunganturuake pei le bai pagalaiat pususunat, rakukukuru pei le kodda aku? Ke kunganturuake pei le bai, oto loina siliktenga taan sibailiu katusoksongan. 12Kauan le rapalau tubuda sia sipageugeu kam! 13Aipoi ka kam sasaraina, bule nupuuja kam le aitusogai kam. Tapoi bui nupakei kam puujaat nenda masiputului tubu mugalai siobat akkula, tapoi parom le kam pasasambamui ka bagat nuntut baga. 14Aipoi sangamberi Surukat, atulopuruakean ka bagat sara tiboiet, ia te, "Pununtuki baga aleinu sirimanua kele nuntut bagam ka tubum!" 15Tapoi ke pason samba pagung le kam, paan te ka kam, masubumuian. 16Nene le kuanenku: Puparaboat kam siripot siobat Ketsat, baan tututnake kam siobat akkula! 17Aipoi siobat akkula ta ioba Ketsat samba siobat Ketsat ta ioba akkula, ruania poi ai le pasasaggak, bule ta ioi nugalai kam siobat bagamui. 18Tapoi ke Ketsat ipalulu kam, taan kupkumen Surukat kam. 19Galajet akkula amatoilaan, ia te: puumunan, pulolinan, botbot, 20pasibubuluji buluat, pukekerei, pasasaggak, pajoggolat, tutut baga, golu, alau baga, pasaraat, pupapartei, 21sisit baga, pupupuineng, pasieemu samba pabageibagei. Ka pagalaiat sangamberinia nene kukua ka matamui kele sikuaku siboiki, sia sigalaiake nene, ta raiikepmake Purimataat Taikamanua. 22Buat Ketsat geti ia te: nuntut baga, angkat baga, aban, om baga, anggai baga, erut baga, topit, 23leppet baga, surut tubu. Ta anai surukat sisaggangi sangamberinia nene. 24Sia sibailiu bakkat Kristus Yesus, arasiliktengaakean akkulara samba sangamberi pubotbonannia samba obaketnia. 25Ke amurimanuangan sita ka bagat Ketsat, kau leu tapuparaboat ka bagat Ketsat. 26Bui tapubeunan tubuta siboboi, paaggara pasasambata samba pasisi pasasambata.

will be added

X\