GALATIA 3

1Ale kam tai Galatia sitaiagai paatuat! Kasei te amasipasaileu kam? Amakolouan atutularatnake ka matamui Yesus Kristus siniliktengaakenen. 2Sarat nene le koba kuagai sibara ka kam: Kalulut pasigagalaiake Surukat pa anusilo kam Ketsat, ele ka pasiaarep Katuareman Simaeru ka tonem baga? 3Ia ne taiagaimui paatuat? Anutaddaakean kam ka bagat Ketsat, noba kam kineneiget masilepaake nia ka bagat akkula? 4Siboboi le pa sangamberi siorikmui simigi? Kipa te ipusisiboboi! 5Oto nia sipasiaake Ketsat ka kam samba sigalai kerek ka talagamui, kalulut pasigagalaiakemui Surukat pa aigalai nene, ele ka pasiaarep Katuareman Simaeru ka tonem baga? 6Kele kisedda leu kai Abraham aikatonemi Taikamanua, oto tonem bagania nenda iaddeake Taikamanua puroipoatnia. 7Oto bule nuagai kam nia, sia siputotonem baga, sia te tatogat Abraham. 8Samba Surat Sipunenan sipasiaagai kirenangan paroroipona bangsa bagei Taikamanua kalulut tonem baga, amuboikian aisegeake Katuareman Simaeru kai Abraham, "Kalulut ekeu tupanukani sangamberi bangsa." 9Oto sia siputotonem baga, sia te tupanunukani sambada si Abraham simatonem baga. 10Sangamberi sikaroake pasigagalaiake Surukat, ai le sia ka tei pateleiat. Atusuratnakean poi, "Teleiet le senen sitaimariuriu masigalaiake sitususurat ka buko Surukat." 11Samba taiooina ramaroipo sirimanua ka matat Taikamanua kalulut pasigagalaiake Surukat amakolouan, aipoi ka Surat Sipunenan aikua, "Kalulut tonem baga le rapuririmanua sia simaroipo baga." 12Surukat geti ta sipubobongen ka tonem baga, kele sikuania ka Surat Sipunenan, "Kasei sigalaiake Surukat, ia te muririmanua kalulut Surukat." 13Aitebuian sita Kristus ka pateleiat Surukat kababailiuna nia pateleiat punu tubuta, atusuratnan poi, "Teleiet le senen siputotoak ka loina siliktenga." 14Nene aigalaian Yesus Kristus, bule kalulut nia panukanan kai Abraham sege ka sabangsa bagei, samba bule kalulut tonem baga tasilo Ketsat sinibalaakenen Taikamanua. 15Sasaraina, kutiboi pei kele ka puririmanuan sirimanua. Ai bai pakerekat baga sironakenen, kenanen sibara ka sirimanua le ta momoi tuputata ele ratuppai nia kasei pa. 16Oto kai Abraham aitiboian Taikamanua sangamberi palelengan samba ka punuteteunia. Ta aikua "ka sapunuteteunia" masikua maigi sia, tapoi ka sara sirimanua le, "samba ka punuteteunu," ia te Kristus. 17Nene le sikuaku: Palelengan sironakenen Taikamanua siburu, ta momoi itataake nia Surukat, siooi pasat epat ngotu telu pulu ngarura, bailiu itataake ronnia palelengan. 18Aipoi ke ka Surukat bai ibara ikepmakenen, taan te sibara ka palelengan; tapoi bulat sibara ka palelengan le aipanguruatnake kiliu bagania kai Abraham Taikamanua. 19Oto apangan le isiatnia Surukat? Situppai le kalulut pasipasasabau, teret ioi punuteteu siniboi ka palelengan, samba Surukat nenda rasegeake samalaika ka kabei sipatalaga. 20Sipatalaga, ta sarat sangasila ipasisikeli, buita ai rua ngasila; Taikamanua geti sara le. 21Ke kise bai nia, masisaggangi palelengan Taikamanua le pa Surukat? Ta kisedda. Aipoi ke sibailiu masirimanuaake bai aituake Surukat, kirenangan sibara ka Surukat le pubulanan. 22Tapoi Surat Sipunenan masikua sangamberinia aian ka kupkumen jo, bule kalulut tonem baga ka Yesus Kristus le itukau palelengan ka sia simatonem baga. 23Ujut tapei amoi tonem baga ai le sita ka kupkumen Surukat, kele sipatpatnakenen teret tupatoila tonem baga. 24Oto Surukat, kele sipanunungka sita le teret ioi Kristus, bule kalulut tonem baga le tuparoipo sita. 25Kineneiget amoian tetere putoneman baga, oto taan anai sita ka kupkumen sipanunungka. 26Tatogat Taikamanuangan le poi kam sangamberimui kalulut tonem baga ka Kristus Yesus. 27Aipoi sangamberimui siturarau ka bagat Kristus, anupuleppeian kam Kristus. 28Ka bagat nene taan anai pabaggeiatnia Yahudi ele Grika, pagugulet ele sipuuja, simanteu ele sinanalep; sarangan le poi kam sangamberimui ka bagat Kristus Yesus. 29Samba ke Kristus sibakkat kam, oto punuteteu Abraham le kam, sipasiikep palelengan Taikamanua.

will be added

X\