GALATIA 2

1Pasat pulu epat ngarura, ei aku minca ka Yerusalem pasamba si Barnabas, kuambit leu si Titus. 2Eeiku nene siripot pamoilianan Taikamanua. Nganangakekungan ka matada paaarepku Katuareman Simaeru ka talagada bangsa bagei -- tapoi ka patiboat sikokoiakenen ka sia saute le --, bui imasibbu pababalauku kineneiget ele ka silelepa. 3Tapoi si Titus aleiku, kenanen tai Grika nia, ta atupaksa nia ipusunat. 4Ai tedda sibesiakenia, ia te sasaraina sipatataju, situguguru ka simalipput, siusuake tubunia ka baga masitaiko puujaatta ka bagat Kristus Yesus, bule rakau sita minca ka pupagugulenan. 5Tapoi beri goiso ta amusum kai ka tubuda, bule imariuriu pubulanan Katuareman Simaeru ka kam. 6Pagalaiat sia oniakenen saute -- kenanen kipa tiboi tubuda siburu, ta anai galainia kaku, aipoi Taikamanua ta iitco matat sirimanua -- kenanen kipa pa, sia oniakenen saute, ta momoi ratuppai apa pa bagei kaku. 7Tapoi bailoknia le, itcorangan sesegeakena Taikamanua ka tubuku masipaarep Katuareman Simaeru ka sia sitaipususunat, kele kai Petrus ka sia sipususunat. 8Aipoi nia sipasikakau gege kai Petrus muapostel ka sia sipususunat, nia leu amasiake gege kaku muapostel ka sitaipususunat. 9Samba kele araitco kiliu baga sinegeakenen kaku, si Yakobus, si Petrus samba si Yohannes, oniakenen sautet paamian, salamrangan aku samba si Barnabas, toggaiat pasambaat, bule kai mei ka sitaipususunat, sia geti ka sipususunat. 10Sarat kau le imariuriu kurepdep kai simageba; samba kirenangan nene te siobat bagaku kugalaiake. 11Tapoi kele aioi si Petrus ka Antiokia, susuikungan matania, kalulut ai selenia. 12Aipoi enan ta momoi sikoiniakenen Yakobus, amukoman nia sambada saalei sitaipususunat; tapoi kele araoi, siksiknangan tubunia, areuakenangan tubunia kalulut lotonia ka saalei sipususunat. 13Samba tai Yahudi sabagei leu ratutnake nia masipataju tubu, pat beri si Barnabas leu ratiktik masitutnake patajuatda. 14Tapoi kele akuitco galai tubuda ta siripot pubulanan Katuareman Simaeru, kuakungan kai Kepas ka matada sangamberida, "Ke ekeu sara tai Yahudi, murimanua kele sipuarat sabulungan samba ta siripot tai Yahudi, kipa iooi nupaksa saalei sitaipususunat murimanua siripot Yahudi?" 15Siripot pututukat mata, kirenangan tai Yahudi le kai, ta sirimanua sijo sibara ka bangsa bagei. 16Tapoi kuagai ta maroroipo sirimanua kalulut pasigagalaiake Surukat, sarat kalulut tonem baga ka Kristus Yesus le. Ia te lulunia ka kai leu amatoneman bagamai ka Kristus Yesus, bule tuparoipo kai kalulut tonem baga ka Kristus, ta kalulut pasigagalaiake Surukat. Aipoi ta anai kasei pa momoi tuparoipo kalulut pasigagalaiake Surukat. 17Tapoi ke bai kai sibesiake tuparoipo ka bagat Kristus toila sirimanua sijo le, oto siromake jo pa Kristus? Bulat ta kisedda. 18Aipoi ke kurioake bai minca nenda siragatku, akubailiuakean tubuku sipasabau Surukat. 19Amateian poi aku ka Surukat kalulut Surukat, bule kupurimanua ka Taikamanua. Atusiliktengaakean aku pasamba Kristus; 20kineneiget taan aku muririmanua, Kristus-an le sipuririmanua ka bagat tubuku. Samba puririmanuangku kineneiget ka bagat akkula, ka tonem baga ka Togat Taikamanuangan le sipununtuki aku baga samba sibuluake tubunia punu tubuku. 21Ta kupasisibbu kiliu bagat Taikamanua. Aipoi ke ka Surukat bai ibara puroipoat, siboboian le kamamatei Kristus.

will be added

X\