EPESUS 6

1Kam tatoga, reddet kam eppumui ka bagat Tuhan; kisedda poi siripokatnia. 2"Suru ukkuinu samba inam" ia te surukat siboiki sibara palelengan, 3"Bule numauktuk samba imauju nupurimanua ka polak." 4Samba kam saukkui, bui nupangoingoi kam bagada tatogamui, urau le kam sia ka bagat pajigiat samba nganturat Tuhan. 5Kam sapagugulet, reddet kam sia tai tuanmui ka polak ka bagat loto samba geret tubu samba ka linat paatuat kele ka tubut Kristus, 6bui sarat itcoket paalakat baga, tapoi kele pagugulet Kristus le sigalaiake siobat bagat Taikamanua sibara ka paatuat, 7samba simaoba mugalai kele ka tubut Tuhan, ta kele ka sirimanua. 8Nuagai kam, senen sirimanua ele pagugulet, ele sipuuja, ke igalai apa pa simaeru, isisilo silinia sibara kai Tuhan. 9Samba kam tai tuan, galai kam kisedda ka tubuda samba ariake kam patetenan; nuagai poi kam sia sambamui ai Tuhanmui ka sorga, samba ta iiggat sirimanua. 10Pasilepania, kau numaron kam ka bagat Tuhan, samba ka bagat ron gegenia. 11Pakei kam sangamberi pamatei Taikamanua, bule nuom kam masisaggangi pajoat Sanitu. 12Aipoi pasagganganta ta masisaggangi sirimanua, tapoi masisaggangi sapamarenta, masisaggangi sibara gege, masisaggangi sautet polak simagepgep nene, masisaggangi paketsatketsat sikatai ka tanairusa ka pata. 13Ia te lulunia ala kam sangamberi pamatei Taikamanua, bule nuom kam pasaggak ka gogoi sikatai nenda samba nyung le nupurio kam, lepa nukalaake kam sangamberinia. 14Oto purio kam, muakkiktenga pubulanan samba muleppei laba puroipoat, 15reremui mukasu ngamang masipaarep Katuareman Simaeru pagalaiat paabanan. 16Ka sangamberi sibabara pakei kam tonem baga korabbimui, kalulut korabbi nenda poi momoi nupeake kam silogui sibara api sipanaakenen Sanitu. 17Samba silo kam tutu laba puaragat samba lanjau Ketsat, ia te tiboiet Taikamanua. 18Sangamberinia galaiake kam ka bagat panindogat masitiddou paroman Taikamanua. Panindou kam senen tetere ka bagat Ketsat, samba mumata ka bagat panindogatmui sitaitetektek masitiddouake sia sipunenan. 19Samba aku leu tiddouake kam, bule ke kubuka ngungungku, panguruatnakenangan Taikamanua kaku tiboiet simaipo, samba ka bagat eme kupaarep keleat Katuareman Simaeru; 20ka bagat masipasikeli nenda te aibailiu aku pakoiniet sipenjaraakenen. Tiddouake kam aku, bule kumaeme masitiboake nia kipa simateu. 21Tapoi bule nuagai kam pagalaiat sibabara ka tubuku samba galajetku, sangamberinia ai leu isegeake nia si Tikhikus, sarainanta kilibet baga samba sipugagalai simatopit ka bagat Tuhan. 22Ia te akukoiniake nia ka kam, bule nuagai kam sibabara ka kai samba ipusuibi bagamui. 23Aban le ka sangamberi sasaraina, samba nuntut baga sialei tonem baga sibara ka Taikamanua Ukkui samba sibara kai Tuhan Yesus Kristus. 24Kiliu baga masipaalei sangamberi sipununtuki baga Tuhanta Yesus Kristus, nuntut baga sitaitatata.

will be added

X\