EPESUS 5

1Oto kau ibailiu kam sipasitutut Taikamanua, kele tatoga kanuntuat baga, 2samba murimanua ka bagat nuntut baga kele punununtukina kam baga Kristus samba bubuluakena tubunia punu tubuta bailiu pusurakat samba buluakenen simasingin ka Taikamanua. 3Tapoi puumunan samba sene ngamata pulolinan ele alau baga, beringan masikua oninia buian ibara ka talagamui siripot simateu ka sirimanua sipunenan. 4Kisedda leu et tiboiet simalolit, tiboiet si ta galai samba si ta paraboat -- sangamberinia nene ta pasese --, bailoknia pusurakat le kuanen. 5Aipoi repdep kam nene: Senen sipuuumun ele sigalai pulolinan ele simaalau baga (sipanindogi buluat le poi nia), ta anai ikemennia ka Purimataat Kristus samba Taikamanua. 6Bui rapepeake kam kasei pa kalulut tiboiet si ta galai, kalulut nenda poi ibabara golut Taikamanua ka tubuda tatoga sitaimareddet. 7Oto bui nupaaleiake kam sia. 8Siburu simagepgep le kam, kineneiget geti patoan le ka bagat Tuhan. Oto kau siripot tatogat pato nupuparaboat kam, 9aipoi buat pato ia te sangamberi puerukat samba puroipoat samba pubulanan; 10samba sibo le kam apa siobat bagat Tuhan. 11Bui nututnake kam mugalai galajet pugepgeman siboboi, bailoknia aseake le kam. 12Aipoi sangamberi sigalaira ka simalipput, beringan masitiboi bulat kailaakenen. 13Tapoi sangamberi sinoroijit pato bailiu matoila; 14aipoi sangamberi simatotoila ia te pato. Ia te lulunia aikua, "Pumatangan ekeu simauuneng, suruakean ekeu ka simamatei, ia geti toroijinangan ekeu Kristus." 15Pagaba kam sipulelelek puririmanuamui, bui kele sitaiagai paatuat, tapoi kele siagai paatuat le, 16samba bui nupasibbu kam tetere, aipoi tetere kineneiget tetere sikatai le. 17Oto bui ibailiu kam taiagai paatuat, tapoi besiake le kam nuagai kam siobat bagat Tuhan. 18Samba bui ipapuineng kam anggur, sikau kam makatai le poi; tapoi kau le isutnake kam Ketsat Sipunenan, 19samba patibo kam pasasambamui ka bagat ngangan psalmen, urai pasiumun samba puketsanan. Uraiji samba umunake kam si Tuhan ka sangamuinet paatuatmui. 20Kau imariuriu nusuraki kam Taikamanua Ukkuita kalulut sangamberinia, ka onin Tuhanta Yesus Kristus! 21Kau nupaepe kam tubu pasasambamui ka bagat loto ka Kristus. 22Kam tainanalep, pusum kam ka taimanteumui kele kai Tuhan, 23simanteu poi ute ka sinanalep, kele Kristus ute ka paamian; samba nia leu Sipaarau paamian, ia te tubunia. 24Kalulut nene kele purereddet paamian ka Kristus, kisedda leu et sinanalep ka simanteu ka bagat sangamberinia. 25Kam taimanteu, pununtuki kam baga tainanalepmui, kele punununtukina baga paamiannia Kristus samba bubuluakena tubunia punu tubuda, 26samba masipuneni nia, lepa aipalina nia ka pasirarauake oinan sialei tiboiet, 27bule simalatsat le paamian irioake nia ka matania, si ta lolit ele ngutsut ele apa pa bagei, tapoi bule sipunenan le samba si ta loloiet. 28Kisedda leu simanteu buita ipununtuki baga sinanalepnia kele tubunia. Sipununtuki baga sinanalepnia, tubunia le aipununtuki baga. 29Aipoi beri sara sirimanua sipulagaki baga tubunia, tapoi iurau le samba ipasikeli, keleu Kristus ka paamian, 30aipoi laddou tubunia le sita. 31Ia te lulunia ikakaddiuake ukkui samba inania simanteu, iloplopmake tubunia ka sinanalepnia bailiunangan sia sangaakkula. 32Bulat abeu le pakeleat nene, tapoi pagalaiat patabbarat Kristus ka paamian le kuanenku nene. 33Tapoi ka kam leu et senemui, kau ipununtuki baga sinanalepnia kele tubunia, samba sinanalep kau leu isuru simanteunia.

will be added

X\