EPESUS 4

1Oto kutiddou ka kam -- aku sipenjaraakenen kalulut Tuhan -- bule nupuparaboat kam simateu siripot sirimanua sinogai Taikamanua. 2Kau le muepe paatuat kam, muleppe baga, muom baga samba pakoinong kam nuntut bagamui ka bagat parom pasasambamui! 3Besiake kam masipasikeli pusaraat Ketsat ka bagat patabbarat aban: 4sara tubu samba sara Ketsat, keleu katusosogaimui ka sara karonan siripot bagat pasogaiat ka kam; 5sara Tuhan, sara tonem baga, sara pasiraukat, 6sara Taikamanua samba Ukkui ka sangamberi, Taikamanua ka uddut sangamberi, sipaalei sangamberi samba sikudduji sangamberi. 7Tapoi ka senenta aipanguruatnakean panukanan siripot kirekat panguruat Kristus. 8Ia te lulunia aikua ka Surat Sipunenan, "Ka teteret aitusakai ka pata, ambitnangan maigi silaba ka pasaggangan; kaunangan panguruat ka sirimanua." 9Ke ikua "Atusakai nia" ta pa katukolobatnia atugorosotnan leu nia ka polak nene bulat ka baga? 10Nia situgogorosot, nia leu situsasakai saliu pei le sangamberi manua, bule isutnake sangamberi. 11Samba nia le amasikau sabagei bailiu apostel, sabagei nabi, sabagei epanggeli, sabagei pandita, sabagei guru, 12masipatarek sia sipunenan kaunen ka galajet pasikelat pasiriot tubut Kristus, 13teret tasege sangamberita ka pusaraat tonem baga samba pasiaagai sipulelelek pagalaiat Togat Taikamanua, bailiu sirimanua sikebbukat, memei mauju memei masusun siripot pususut Kristus, 14bule taan kele tatoga sita, pinauttai samba pinaambit sene ngamata rusat nganturat, patajuat sirimanua, ka bagat pajoatda masipapepe. 15Bailoknia pubulanan le taoometnake ka bagat nuntut baga, tapuurau ka bagat sangamberinia ka tubunia, Uteta, ia te Kristus. 16Sibara ka tubunia le sangamuinet tubu tupagalak samba tuappara bailiu sara ipatabbarania senen pauilakat, siripot galajetda senenda, bailiu muurau sangalio tubu samba ipaeru tubunia ka bagat nuntut baga. 17Oto kukua samba kumunengake nene ka kam ka bagat Tuhan: Buian nupuparaboat kam kele sipuarat sabulungan, sipaatu si ta galai; 18simagepgep pupaatuanan, situaareu ka purimanuaiat Taikamanua, kalulut taiagaira paatuat samba kalulut kelat paatuatda. 19Taan anai ailada, segeakerangan tubuda ka pubotbonan tubu samba masigalaiake sene ngamata pulolinan ka bagat alau baga. 20Kam geti ta kisedda. Anugelaian kam masiagai Kristus. 21Anuarepman kam pagalaiat nia samba anusiloan kam nganturat ka tubunia siripot pubulanan ka bagat Yesus. 22Kau nuutsu kam sirimanua siburu, ia te paraboatmui siburu pinakatai pajoat pubotbonan, 23bule itubauake kam ka bagat ketsat samba paatuatmui 24samba nupakei kam sirimanua sibau sibaraakenen siripot ka Taikamanua ka bagat puroipoat samba pulinakat sibulatnia. 25Oto galakngake kam paboboko, pubulanan le tiboi kam ka pasasambamui, laddou le poi sita sambata. 26Ke mugolu kam, bui nugalai kam jo; bui bele sulu, tapei atata golumui, 27bui nukau kam oggak ka Sanitu. 28Sipananangkou, buian ipanangkou minca, kau le imomoake tubunia masigalaiake kabeinia ka galajet simaeru, ibara pauruakenennia ka sirimanua simagulai. 29Bui te ibela nganga sikatai ka ngangamui, tiboiet simaeru le tiboi kam sibailiu masipaeru, bule ramauktuk sipasiaarep. 30Samba bui nupareureu kam bagat Ketsat Sipunenan Taikamanua, ka bagania poi aitutoggaiji kam masiaili gogoi puaragat. 31Sangamberi pongit baga, ngoingoi baga, golu, pajoggolat samba paloloiat ribbaiake kam, kisedda leu et sangamberi katai. 32Tapoi kau le paleppe kam baga pasasambamui, pakate baga samba paappe jo pasasambamui, kele aappeakena kam Taikamanua ka bagat Kristus.

will be added

X\