EPESUS 3

1Ia te lulunia aku, Paulus tupenjaraake kalulut Kristus Yesus punu tubumui sipuarat sabulungan. 2Kirenangan anuarepman kam pagalaiat galajet masipasikeli panguruat Taikamanua, sinegeakenennia kaku kalulut kam, 3ia te patotoilana kaku pakeleatnia ka bagat pamoilianan, kele sinuratnakenen goiso ka pata. 4Ke nubasa kam nia, sedda agaimuian pasiaagaiku pakeleat Kristus, 5sitaipaaremen pei le ka tatogat sirimanua ka reddenan siburu, tapoi kineneiget atupoiliatnan nia ka bagat Ketsat ka tai apostel samba tai nabinia sipunenan; 6ia te sia bangsa bagei kalulut Katuareman Simaeru aibailiuan sia sipasiikep, muladdou ka tubu simakere samba murubeiat ka bagat palelengan ka bagat Kristus Yesus. 7Ka bagat Katuareman Simaeru nenda bailiu aku sipasikeli nia siripot kiliu bagat Taikamanua sipanguruatnakennia kaku siripot ron gegenia. 8Oto kaku, bulat simakope goiso ka talagada sangamberi sipunenan, aipanguruatnakean kiliu baga nene Taikamanua masipaarep ka sabangsa ta Yahudi pukayoat Kristus sitaioi tukireki, 9samba masipatoila bagania pasikelat pakeleat situlilipput muotu ngarura ka Taikamanua sipasibabaraake sangamberinia, 10bule itupaagai kineneiget kalulut paamian sene ngamata sikut paatuat Taikamanua ka sapamarenta samba sibara gege ka manua, 11siripot isiatnia siburunangan, sigalaiakenennia ka bagat Kristus Yesus, Tuhanta. 12Ka bagat Kristus samba kalulut tonem baga ka tubunia bara ka sita eme samba enungan tuguru ka Taikamanua ka ron tonem baga. 13Kalulut nene kutiddou, bui imabele bagamui nuitco kam paoreat ka tubuku kalulut kam, aipoi katulatsananmui le. 14Ia te kupurerekkuk ka matat Ukkui, 15kabaraiat oni ka sangamberi reddenan ka sorga samba ka polak. 16Manindou aku, bule kalulut kayot pulatsanannia iake ka kam ron ka bagat tubumui masipangetnget kam kalulut Ketsatnia, 17bule ipukuddu Kristus ka bagat paatuatmui kalulut tonem baga, nupuungat samba nupubongen kam ka bagat nuntut baga. 18Manindou aku, bule ioi nusinogi kam sambamui sangamberi sirimanua sipunenan kipa lionia, nantania, buaknia samba kerunia nuntut bagat Kristus, 19samba nuagai kam nia nuntut baga nenda, kenanen sisaliu sangamberi sikut paatuat, bule itusutnake kam ka sangamberi pususun Taikamanua. 20Ka tubunia siooi masigalai sisaliu pei le ka sinindouta ele sipaatuta siripot ron sipugagalai ka bagata, 21ka tubunia le pulatsanan ka bagat paamian samba ka bagat Kristus Yesus mungareddenan teret buruburu. Amen.

will be added

X\