EPESUS 2

1Kam leu siburu amateian kam kalulut pasisasabau samba jomui, 2ia te pupaparaboatmui ka teteret nenda nututnake kam enungan polak nene, lulut nureddet kam rimata sipaneinei tanairusa, ia te ketsat sipugagalai kineneiget ka talagada sirimanua sitaimareddet. 3Beri sita leu siburu sangamberita makere kele sia ai pei le sita mupaparaboat ka bagat botbot akkula samba paatuat sikatai. Pugolukiet le sita siripokatnia, makere kele sia sabagei. 4Tapoi Taikamanua sipulukatet baga, ka beunan nuntut bagania ipununtuki sita, 5airimanuaakean sita pasamba Kristus, kenanen amateian sita kalulut seleta -- kalulut kiliu baga le anutuarau kam -- 6samba airimanuaakean sita ka bagat Kristus Yesus samba ikau sita mukuddu pasamba nia ka sorga, 7bule ipatoila ka tetere sibabara kayot kiliu bagania sitaimagulai, siripot erut bagania ka sita ka bagat Kristus Yesus. 8Sibara ka kiliu baga le aituarauake kam, lulut tonem baga, ta sibaraakenenmui, panguruat Taikamanua le; 9ta buat sigalaimui, bui iumun tubunia kasei pa. 10Sigalai Taikamanua le poi sita nene, sibaraakenennia ka bagat Kristus Yesus masigalaiake galajet simaeru, sinarekngakenen Taikamanua kirenangan, bule tapuparaboat ka bagania. 11Oto repdep kam, siburu sipuarat sabulungan le kam siripot akkula, oniakenen sitaipususunat rakua kam sia sioniake tubuda "sunat," ia te sunat akkula sigalai kabei sirimanua, -- 12ka teteret nenda sitaipuki -- Kristus le kam, ta tuaddeake kam warganegara Israel samba ta mueneu kam ka palelengan sinibalaakenen, si ta anai karonan samba si ta Taikamanua le kam ka polak nene. 13Kineneiget geti ka bagat Kristus Yesus, kam "simareunan" siburu, aibailiuan "malegere" kalulut logau Kristus. 14Kristus poi paabananta, sikau sita bangsa Yahudi samba bangsa bagei bailiu musara samba siragatnake kekere pasaraat, ia te pasaggangan. 15Aipoi ka bagat kamateiatnia ka pusisirimanuania aitataakean Surukat samba sangamberi patonekat samba aturan, masibailiuake sirua bangsa nene bailiu sara sirimanua sibau ka bagat tubunia, ibaraake paabanan, 16samba ipaeru sirua bangsa nene ka bagat sara tubu ka Taikamanua kalulut loina siliktenga; ka siliktenga nenda poi aitataake pasaggangan. 17Samba moi leu nia masipaarep aban ka kam "simareunan" samba aban ka sia "simalegere"; 18kalulut nia poi sita rua ngasilania (Yahudi samba ta Yahudi) ka bagat sara Ketsat oi tatagetnake Ukkui. 19Oto taan sitoi ele siooiake kam, taikalaggaiatdangan le sipunenan samba sikauman Taikamanua, 20sirioakenen ka bongenda tai apostel samba tai nabi; bukkut taiming geti ia te Kristus Yesus. 21Ka bagat tubunia muurau sangalio lalep, tupalakke bailiu uma sipunenan ka bagat Tuhan. 22Kam leu ka bagat tubunia le aiturioake bailiu pukudduat Taikamanua ka bagat Ketsat.

will be added

X\