EPESUS 1

1Sibara kai Paulus, apostel Kristus Yesus kalulut teu bagat Taikamanua, masiailiake sia sipunenan ka Epesus, simatonem baga ka Kristus Yesus. 2Kiliu baga samba aban ka kam sibara ka Taikamanua Ukkuita samba sibara kai Tuhan Yesus Kristus masipaalei kam. 3Tuumunake le Taikamanua, Ukkui Tuhanta Yesus Kristus sipanguruatnake ka sita sene ngamata panukanan puketsanan sibara ka sorga ka bagat Kristus. 4Aipoi enan tapei abara polak aipilingan sita Taikamanua ka bagat Kristus, bule ibailiu sita sipunenan samba si ta loloiet ka matania. Ka bagat nuntut bagania, 5kirenangan aiteuakean ka bagat Yesus Kristus ibailiu sita tatogania, siripot siobat bagania, 6bule tuumunake beunan kiliu bagania sipanguruatnakenennia ka sita ka bagat Togania kilibet bagania. 7Ka bagat Kristus poi kalulut logaunia aibara ka sita panebuiat, ia te katuappekat jo, siripot kayot kiliu bagania, 8siuruakenennia ka sita ka bagat sangamberi sikut paatuat samba puaagai kolou. 9Aipaagaian poi ka sita keleat isiatnia, siripot siteuakenennia kappuluakenennia ka bagat Kristus. 10Isiat nene kappuluakenen Taikamanua ke aiailingan teterenia, ia te masiruruake sangamberi sikuddu ka sorga samba sikuddu ka polak muute ka Kristus. 11Ka bagat Kristus leu ikau sita mueneu ka sangamberi palelengan, sita sikokoiakenen ka panandaatnia pei le manilo rubeiat siripot isiat Taikamanua sigalaiake sangamberinia siripot teu bagania, 12bule sita, sipukakaronan ka Kristus ka panandaatnia pei le, ibailiu katuumunan pulatsanannia. 13Kam leu, amatoneman bagamui ka Kristus ka teteret anuarep kam tiboiet pubulanan, ia te Katuareman Simaeru puaragatmui, oto aitoggaijingan kam Taikamanua Ketsat Sipunenan sinibalaakenennia. 14Ketsat Sipunenan ia te sibulatnake pururubeiatta, teret tasilo sangamberinia, ia te panebuiat sibailiuake sita bakkatiet Taikamanua, pasiumun pulatsanannia. 15Ia te lulunia, kele akuarep pagalaiat tonem bagamui kai Tuhan Yesus samba pagalaiat nuntut bagamui ka sangamberi sipunenan, 16taan amuari kukua sura kalulut kam. Samba sarat kurepdep le kam ka panindogatku, 17kutiddou ka Taikamanuan Tuhanta Yesus Kristus, Ukkui simalatsat, bule iake ka kam Ketsat pusikuat samba pamoilianan masiagai nia simakolou. 18Samba bule ipatoake matat paatuatmui, ioi nuagai kam aponia karoniet ka bagat pasogaiatnia, kipa kayot pulatsanan kaunennia ikepmakenenda sia sipunenan, 19samba kopet beunan gegenia ka sita simatonem baga, siripot ron gegenia, 20sigalaiakenennia ka bagat Kristus aisuruake nia ka simamatei samba aiuddetnake nia kai kattoetnia ka sorga, 21sisaliu buakra sangamberi pamarenta samba simagege samba saute samba tai tuan samba senen oni siooi tukua, ta sarat ka polak nene, tapoi samba leu ka polak sibabara geti. 22Samba sangamberinia aikauan Taikamanua ka tei reret Kristus, samba aikauan nia bailiu ute ka sangamberinia ka paamian. 23Paamian ia te tubunia, katusunannia, sisutnake sangamberinia ka bagat sangamberi.

will be added

X\