KOLOSE 3

1Oto ke atusuruakean kam pasamba Kristus, sibabara ka pata le gaba kam, ka pukudduat Kristus, kai kattoet Taikamanua. 2Sibabara ka patangan le paatu kam, buian sibabara ka polak. 3Aipoi amateian kam samba purimanuaiatmui atulipputnan pasamba Kristus ka bagat Taikamanua. 4Ke aipatoilaan geti tubunia Kristus ia te purimanuaiatta, kam leu nupatotoila leu kam tubumui pasamba nia ka bagat pulatsanan. 5Oto mateiake kam sangamberi siobat polak ka bagat tubumui, ia te puumunan, pulolinan, pubotbonan, botbot ka sikatai samba leu alau baga (aipoi alau baga makere ka pasibubuluji buluat). 6Sangamberinia nene masibaraake pugolukat Taikamanua ka sirimanua sitaimareddet. 7Siburu kam leu anugalaiakean kam kele nenda ka teteret ai pei le kam muririmanua ka bagania. 8Tapoi kineneiget ribbaiake kam sangamberinia nene ia te: golu, ngoingoi baga, katai, asa samba nganga sikatai sibebela ka ngungumui. 9Buian nupaboko kam pasasambamui, anugolokngan poi kam sirimanua siburu pasamba puparaboanannia, 10anupakeian kam sirimanua sibau riuriuakenen tubauake masisese puaagai sipulelelek siripot tularat Sipasibabaraake nia. 11Ka bagat nene taan anai Grika ele Yahudi, sipususunat ele sitaipususunat, sasareu ele bangsa bagei, pagugulet ele sipuuja, tapoi Kristus-an le sangamberinia samba ka bagat sangamberinia. 12Kalulut nene, siripot sipilit Taikamanua, sipuneni samba pukatekietnia baga, pakei kam pukatekat baga, puaanggai, epet paatuat, leppet baga samba om baga. 13Paom kam baga pasasambamui, samba paappe kam jo pasasambamui ke ai sitaipasese sigalai sisara ka sabagei, kele aappeakena kam si Tuhan, kisedda leu nugagalai kam. 14Samba ka uddut sangamberi nenda pakei kam nuntut baga, pasiappara sikau musara samba masisutnake. 15Samba aban Kristus masipaneinei paatuatmui, kalulut nenda poi aitusogai kam ibailiu sara tubu. Samba kau imasura bagamui. 16Kau ikuddu tiboiet Kristus simasun ka bagamui, bailiu ka bagat sangamberi sikut paatuat nupanganturu samba nupaase kam pasasambamui samba sialei urai psalmen, urai pasiumun samba urai puketsanan nusuraki kam Taikamanua ka bagat paatuatmui. 17Samba apa apa nugalai kam ka bagat titiboat ele galajet, ka onin Tuhan Yesus le galai kam nia, samba suraki kam Taikamanua Ukkui kalulut nia. 18Kam tainanalep pusum kam ka taimanteumui, kele simateu kai Tuhan. 19Kam taimanteu pununtuki kam baga tainanalepmui, bui nupugoluki kam sia. 20Kam tatoga, reddet kam saeppumui ka bagat sangamberinia, ia poi obaket bagat Tuhan. 21Kam saukkui, bui nupabesi kam paatuatda tatogamui, mabebele bagada. 22Kam sapagugulet, ka bagat sangamberinia reddet kam sia tai tuanmui ka polak, bui sarat itcoket kele paalakat baga; ka linat paatuat le kalulut pasikakalotoake si Tuhan. 23Aipoi apa nugalai kam, bulat sibara ka paatuat nugalai kam nia kele kai Tuhan, bui kele ka sirimanua. 24Nuagai poi kam sibara kai Tuhan le nusisilo kam upa ikepmakenenmui. Kai Tuhan Kristus le nupupapagugulet kam. 25Sipasigagalaiake sitaimaroipo isisilo leu geti siripot taimaroipot sigalainia, ta poi iiggat sirimanua si Tuhan.

will be added

X\