KOLOSE 1

1Sibara kai Paulus, apostel Kristus Yesus, kalulut teu bagat Taikamanua samba Timoteus sarainanta, 2masiailiake sasaraina sipunenan samba simatonem baga ka bagat Kristus ka Kolose. Kiliu baga samba aban sibara ka Taikamanua Ukkuita, masipaalei kam. 3Sarat kukua kai sura ka Taikamanua, Ukkui Tuhanta Yesus Kristus, senen kutiddouake kai kam, 4kalulut aarepmai pagalaiat tonem bagamui ka Kristus Yesus samba pagalaiat nuntut bagamui ka tubuda sipunenan, 5kalulut masikaroni sinarekngakenen ka kam ka sorga. Pagalaiat nenda anuarepman kam panandaatnia ka bagat tiboiet pubulanan, ia te Katuareman Simaeru, 6sisesege ka kam. Katuareman Simaeru nenda amubuangan samba amuurauan ka sangalio polak, kisedda leu ka kam ka teteret anuarep kam nia samba anuagai kam kiliu bagat Taikamanua sibulatnia. 7Sangamberinia nene anugelaian kam kai Epapras, alei mugalai kilibet bagamai, pagugulet Kristus simatopit masipasikeli kam. 8Nia leu amasinunuake ka matamai nuntut bagamui ka bagat Ketsat. 9Kalulut nene barania ka teteret akuarep kai nia, ta anai ari kutiddouake kai kam. Kutiddou kai bule nusilo kam sikut paatuat samba puaagai simakolou sibara ka Ketsat nuagai kam obaket Tuhan sipulelelek, 10imateu nupurimanua kam ka matania samba ioba bagania ka bagat sangamberinia samba mubua kam ka sangamberi galajet simaeru, samba muurau ka bagat puaagai pagalaiat Taikamanua, 11bailiu maronmuian simakope siripot gegenia simalatsat masibairat sangamberinia ka bagat om baga, 12samba masikua sura ka angkat baga ka Ukkui, sipateu kam masisilo rubeiat ikemenda sipunenan ka purimataat simapato. 13Aibelaakean sita ka geget pugepgeman, aikauan sita ka bagat Purimataat Togania kilibet bagania; 14ka tubunia atabakkatingan panebuiatta, ia te katuappekat jo. 15Kristus ia te tularat Taikamanua sitaimatotoila, sikebbukat ka sangamberi sibaraakenen. 16Aipoi kalulut nia le aitubaraake sangamberinia ka sorga samba ka polak, simaiitco samba sitaimaiitco, uddenan purimataat ele purimataat, sipupaparenta ele sibara gege; sangamberinia nia le aibaraake nia samba sibakkatnia. 17Nia le siboiki abara ka sangamberinia samba sangamberinia ai le ka tubunia. 18Samba nia le utet tubu, ia te paamian. Nia le sikebbukat, sitususuru siboiki ka simamatei, bailiu nia le sipuuddutat ka sangamberi. 19Taikamanua le poi aiteuake nia bule sangamberi sibabara ka tubut Taikamanua, sun le ikuddu ka tubut Togania, 20samba kalulut nia le aiabanake sangamberinia ka tubunia Taikamanua, sibabara ka polak ele sibabara ka sorga, lepa aibaraake paabanan kalulut logau siliktengan Kristus. 21Kam leu simareunan ka Taikamanua siburu samba sipasisasaggangi nia ka paatuat, simatotoila ka galai tubumui sikatai, 22kineneiget aiabanakean ka bagat tubut Kristus, kalulut kamateiatnia, masikau kam musipunenan, si ta loloiet samba si ta sele ka matania. 23Kau le numariuriu kam ka bagat tonem baga, nyung le ta ipaguguilak, samba ba oba kam turitsi ka pukakaronan siarepmui ka Katuareman Simaeru, sikakaraakenen ka sangamberi sipuririmanua ka tei polak, samba sibailiu aku nene, Paulus sipasikeli nia. 24Kineneiget maangka le bagaku ka bagat pangoringanku kalulut kam, samba masisutnake ka bagat akkulaku simagulai pei le ka pangoringan Kristus, punu tubunia, ia te paamian. 25Aibailiuan aku sipasikeli paamian siripot galajet sinegeakenen Taikamanua kaku masisutnake tiboietnia ka kam, 26ia te pakeleat situlilipput barania ka sialu, ka senen reddenan, tapoi kineneiget atupatoilaan ka sangamberi sipunenannia. 27Ioba Taikamanua ipaagai nia ka tubuda kipa kayo samba latsatnia pakeleat nene ka talagat bangsa bagei, ia te: Kristus aian ka talagamui, karoniet masisilo pulatsanan. 28Nia te kupaarep kai, ke kunganturu kai senen sirimanua samba kugelai kai senen sirimanua ka bagat sangamberi sikut paatuat, masipalulu senen sirimanua simasun eru ka bagat Kristus. 29Ia te kumomomoake tubuku samba kupauukeleake seget ron, siripot ron sibara ka Kristus sipugagalai simaron ka bagat tubuku.

will be added

X\