PUGAGALAIRA TAI APOSTEL 9

1Si Saulus geti riuriu le ikukuru samba imateiake sipasiului Tuhan Yesus. Ei nia kai Imam Sabeu, 2tiddounangan surat pugege kaunen ka parurukatda tai Yahudi ka Damaskus, bule kasei isese siului arat Tuhan, taimanteu ele tainanalep, kabenangan sia ambit ka Yerusalem. 3Ka tengan enungan, amalegerengan nia ka Damaskus, tulut toroinangan nia pato sibara ka manua. 4Bele nia ka polak, arepnangan nganga sipasikukua ka matania, "Saulus, Saulus, nukukukuru kodda aku?" 5Kuanangan si Saulus, "Kasei ekeu Tuhan?" Kuanangan, "Aku te Yesus sikukurum. 6Tapoi suruake ekeu, kenan ka laggai, ai leu itukua ka matam galaiakenennu." 7Saaleinia geti tenan le sia rio, meng, araarep poi nganga, tapoi ta anai araitco kasei pa. 8Tusurunangan si Saulus, mataakenangan matania, tapoi taan aiitco apa pa; ukkaakerangan kabeinia rapalulu nia ka Damaskus. 9Telu ngagogoi burunia ta aimaitco matania, samba taipukokom taipulolo le nia. 10Ka Damaskus ai sara sipasiului sipuoni si Ananias. Pakoinongnangan tubunia si Tuhan ka matania kuanangan, "Ananias!" Aleginangan nia, "Aikoi aku Tuhan!" 11Kuanangan ka matania si Tuhan, "Suruake ekeu, kenan ka enungan sipuoni Simaroipo, gabanungan ka lalep Yudas, sara sipuoni si Saulus sibara ka Tarsus. Kineneiget ai nia maninindou, 12samba ka bagat paitcokat aiitcoan moi sara sirimanua sipuoni si Ananias masirape utenia, bule imaitco minca matania." 13Aleginangan nia si Ananias, "Tuhan, amaigingan sia akuarep masikua pagalaiat sirimanua nene, igit jo aigalai ka tubuda sipunenannu ka Yerusalem. 14Samba aioi sene aialaan gege ka tai imam sabeu masikabe sangamberi sipasisosogai onim." 15Tapoi kuanangan ka matania si Tuhan, "Kenan le, aipoi pugalai sipiliku le nia masipaarep oningku ka matada sipuarat sabulungan samba tai rimata samba leu ka bangsa Israel. 16Ai leu kupaitco ka matania kipa igit bairatetnia kalulut oningku." 17Lepa ei si Ananias, guru nia ka lalep, tonemakenangan kabeinia ka utenia kuanangan, "Saraina Saulus, aikoiniake le aku si Tuhan, ia te Yesus sipakoinong tubunia kekeu ka enungan anuoi se, bule imaitco minca matam, samba isopsop ekeu Ketsat Sipunenan." 18Ia geti bele aibele ka matania kele susuru, maitconangan minca matania. Suru nia, raunangan nia. 19Lepa aipukom maronnangan minca tubunia. 19Tapoi mukuddu pei le si Saulus piga ngagogoi pa ka Damaskus masipaalei sipasiului. 20Taddaakenangan leu mungantoman ka uma parurukat masimunengake pagalaiat Yesus Togat Taikamanua le nia. 21Sangamberi sipasiaarep makisei ka bagada, kuarangan, "Ta ia ne sipasimamateiake sipasisosogai onin Yesus ka Yerusalem samba leu amoian nia se masikabe sia itaroake sia ka tai imam sabeu?" 22Tapoi memei le itutuppai ronnia si Saulus, pat puinengnangan sia tai Yahudi sikuddu ka Damaskus, kalulut ipatoila ka matada Yesus nene ia te Kristus. 23Pasat piga ngagogoi pa isiakerangan tai Yahudi masimateiake si Saulus. 24Tapoi isiatda nene aiagai le si Saulus. Jagorangan leu sangamberi matatbaliu laggai sinago samba sinoibo, bule ramateiake nia. 25Tapoi sinoibo alarangan nia sipasiuluinia, gorosotnakerangan nia ka bagat garaga ka teitei gelit laggai. 26Sege nia ka Yerusalem, sibonangan masipaalei sipasiului, tapoi amaloto le sia sangamberida ka tubunia, aipoi ta matonem bagada babailiuna nia sipasiului. 27Si Barnabas le aiala nia, paambitnangan nia ka tai apostel, nunuakenangan ka matada iitcona si Tuhan si Saulus ka enungan, samba patitiboakena nia si Tuhan samba emenia mungantoman ka onin Yesus ka Damaskus. 28Paaleinangan sia si Saulus mugejek sambada ka Yerusalem, samba ka bagat eme le ipungantoman ka onin Tuhan. 29Samba tai Yahudi sipunganga ngangan Grika leu ipatiboake samba ipaukeleake; tapoi besiakerangan ramateiake nia. 30Kele araagai nene sapaamian, ambitrangan nia ka Kaisarea, lepa koiniakerangan nia ka Tarsus. 31Ka teterenia nene marokdang le paamian ka sangalio Yudea, Galilea samba Samaria. Paamian memei maroron samba muparaboat ka bagat loto kai Tuhan, samba muurau igida kalulut paroman Ketsat Sipunenan. 32Pasat nene gejenginangan si Petrus sangalio laggai, samba ibalou leu sia sipunenan sikuddu ka Lidda. 33Sedda sesenangan sara sirimanua sipuoni si Eneas simasakit, balu ngarurangan taitususuru ka peremannia. 34Kuanangan ka matania si Petrus, "Eneas, ialeake ekeu Yesus Kristus; suruake ekeu, purutnake peremannu!" Tusurunangan leu si Eneas. 35Sangamberi sipulaggai ka Lidda samba ka Saron masiitco nia, matonemnangan bagada kai Tuhan. 36Ka Yoppe ai sara sipasiului sinanalep sipuoni Tabita (ka ngangan Grika Dorkas, tibonannia simatsura). Bulat maigi galajet simaeru aigalai samba maigi aikau panguruat ka simageba. 37Tapoi ka gogoi nenda bara oringennia, matei nia. Lepa arabui tubunia galakngakerangan nia ka bilik ka pata. 38Laggai Lidda malegere le ka Yoppe. Kele araarep sipasiului kababarat Petrus ka Lidda, koiniakerangan rua taimanteu masisogai nia, manindou, "Konan simaola ka kai!" 39Suru si Petrus ei nia paaleiakenangan sia. Sege sia sedda ambitrangan nia ka bilik ka pata; oi araoi ka matania tainanalep silumang, ai sia musosou paitcorangan ka matania leppei samba komang sigalai Dorkas ai pei le nia muririmanua. 40Kuanangan si Petrus rabela sangamberida, lepa purekkuknangan manindou. Lepa beliuakenangan tubunia ka simamatei, kuanangan, "Tabita, suruake ekeu!" Mataakenangan matania, kele aiitco si Petrus, putukkunangan. 41Ukkaakenangan kabeinia si Petrus isuruake nia. Lepa sogainangan sangamberi sipunenan samba tainanalep silumang, rioakenangan nia ka matada sipuririmanua. 42Maarepnangan sibabara nene ka sangalio laggai Yoppe, maigirangan simatonem baga kai Tuhan. 43Pasat nene kuddu pei le si Petrus ka Yoppe piga ngagogoi pa ka lalep Simon tukang kulit.

will be added

X\