PUGAGALAIRA TAI APOSTEL 4

1Ai pei le maninibo si Petrus samba si Yohannes ka simigi, tagetnakerangan sia tai imam samba utet sipasijajago Uman Taikamanua samba tai Saduse. 2Magolu poi bagada rapangantoman sirimanua simigi samba rapaarep ka onin Yesus ai katusuruat tubu simamatei. 3Labarangan sia kaurangan sia ka penjara pangenan imapato, amasoiboan poi sulu. 4Tapoi ka talagada sipasiaarep ngantoman maigi sia simatonem baga, bailiu ituppai igida iaili lima ribu taimanteu. 5Kele aimapato sangamberi sautera tai Israel, samba tai baja samba siagaisurat paruru ka Yerusalem 6samba Imam Sabeu Hannas, si Kayafas, si Yohannes samba si Aleksander samba piga pa sabagei ka muntogat Imam Sabeu. 7Lepa rioakerangan si Petrus samba si Yohannes ka matat rapat, nounourangan sia, "Ka geget kasei ele ka onin kasei anugalai kam nene?" 8Ia geti sun Ketsat Sipunenan ka tubut Petrus kuanangan ka matada, "Kam sautet bangsa samba tai baja, 9ke tupakaroake kai kineneiget kalulut gagalaimai simaeru ka sirimanua sisakit ka geget kasei aimale, 10oto kau nuagai kam nia sangamberimui samba sangamberi bangsa Israel, ia te ka onin Yesus Kristus tai Natsaret siniliktengaakenenmui, tapoi sisuruakenen Taikamanua ka simamatei, ka oninia te aipurio sinene aimaron tubu ka matamui. 11Yesus nene te kuanennia ka Surat Sipunenan, 'Bukku sipasibbumui tai tukang, aibailiuan nia bukkut inan arigi.' 12Oto ta anai kasei pa sabagei kabaraiat puaragat, ta anai poi oni bagei aikau Taikamanua ka sirimanua ka tei manua nene siooi masiarauake sita." 13Tenan le kisei ka bagada sipurarapat raitco emenia si Petrus samba si Yohannes, araagaian bagei sirimanua sitaipusisikola samba sitaiagai surat le sia; samba raagai alei Yesus le sia siburu. 14Tapoi ta anai momoi rakua apa pa aipoi araitcoan sirimanua sialeakenen nenda murio ka bebera tai apostel. 15Kele arabelaake sia ka purapanan, patiborangan pasasambada, 16kuarangan, "Kipa tagagalai ka tubuda sirimanua nene? Aipoi kerek kiseiakenen le sigalaira, amatoilaan ka sangamberi sipulaggai ka Yerusalem, taan iagai tapakele nia. 17Tapoi bui imararat nene ka sirimanua simigi tapaneinei le sia buian rapanibo minca ka sirimanua kasei pa ka oni nene." 18Lepa sogairangan sia paneineirangan sia, buian rapanibo ele rapungantoman ka onin Yesus. 19Kuana le si Petrus samba si Yohannes masialegi sia, "Kam le ipaatu nia, ele mateu pa ka matat Taikamanua, kureddet kai kam bele pei Taikamanua? 20Ta momoi poi ta kutiboi kai siitcomai samba siarepmai." 21Paneineirangan sia simakope, belaakerangan sia ratuitui, ta anai poi arasese paluluatnia ituukumake sia, kalulut sirimanua simigi sangamberida masiumun Taikamanua kalulut sibabara nene. 22Aipoi sirimanua sialeakenen kerek nenda, epat pulu ngarurangan legei beunannia. 23Kele arabelaake sia, ei sia ka saaleira, nunuakerangan sangamberi sikuada tai imam sabeu samba tai baja ka matada. 24Arep araarep nene saaleira, pakerenangan bagada manindou ka Taikamanua kuarangan, "Tuhan, ekeu le sibaraake manua, polak, koat samba sangamberi sibabara ka bagania. 25Samba ka bagat Ketsat Sipunenan ka ngangan taikebbukatmai paguguletnu si David anutiboi, 'Mugagaugau kodda sia sipuarat sabulungan, rapaatu kodda sia tai bangsa si ta galai? 26Tai rimata ka polak amutarekngan sia, samba saute amaruruan sia masisaggangi si Tuhan samba Rimata Sinulajinia.' 27Bulatnia aparuruan ka laggai nene si Herodes samba si Pontius Pilatus samba sipuarat sabulungan samba bangsa Israel masisaggangi Yesus, Paguguletnu Sipunenan, sinulajim, 28bule ragalai sangamberinia ipuaili sineuakenennu ka panandaatnia pei le kalulut gegem samba teu bagam. 29Oto kineneiget Tuhan, itco palotokatda samba ake ka sapaguguletnu eme masipaarep tiboietnu. 30Totoiake kabeinu masialeake sirimanua; samba baraake patuaggaiat samba kerek ka onin Yesus, Paguguletnu Sipunenan." 31Kele ailepa rapanindou, pueggeunangan kudduat parururukatda, sopsopnagan sia Ketsat Sipunenan sangamberida, maemerangan masitiboi tiboiet Taikamanua. 32Sangamberida siputotonem baga, sikere baga samba sisara paatuat le sia. Ta anai beri sara siaddeake bibilet sibabara ka tubunia bakkatnia sarania, tapoi sangamberi bibilet sangamberida le sibakkatnia. 33Magegerangan simakope tai apostel masimunengake pagalaiat katusuruat Tuhan Yesus, makiliunangan bagat Taikamanua ka tubuda sangamberida. 34Ta anai ka talagada simagulai apa pa; aipoi piga pa sia sibara mone ele lalep, sakiakerangan nia, bulagat sakinia raambit 35kaurangan nia ka tai apostel, lepa rubeirangan nia ka senen simagulai. 36Kise te kai Yosep, sara tai Lepi sibara ka Siprus, oniakenenda tai apostel si Barnabas (tibonannia: Pusuibiat baga). 37Sakiakenangan monenia, ambitnangan bulagatnia, kaunangan nia ka tai apostel.

will be added

X\