PUGAGALAIRA TAI APOSTEL 27

1Kele arateuake kuei kai ka Italia, segeakerangan si Paulus samba sabagei sipenjaraakenen kai Yulius, kapiten tentera sipuoni "Pasukan Kaisar". 2Kele akutujanang kai ka kapal ka Adramitium sioba muririk ka tobbou Asia, pulajomaian. Ai leu si Aristarkhus tai Makedonia sibara ka Tesalonika masipaalei kai. 3Pato jolou kai ka Sidon. Manuntu bagania si Yulius kai Paulus, samba iobaake iei masibalou saaleinia, bule rapuuku nia. 4Baramai sedda pulajomaian muririk ka Siprus, kalulut sasaket le rusa. 5Kele akutalipoki kai koat ipot Kilikia samba Pampilia, sege kai ka Mira ka tobbou Likia. 6Sedda sesenangan kapiten tentera sara kapal sibara ka Aleksandria sioba mulajo ka Italia, kaunangan kai ka kapal nenda. 7Piga ngagogoi pa simoilemoile le akupulajo kai, siagai ka baga le sege kai ka Knidus. Ta poi iobaake kai rusa, puririkmaian ka Kreta ipot tunang Salmone. 8Siagai ka baga akuriringi kai tunang nenda, sege kai ka sara kudduat sipuoni Pusaoat Simaeru, ka legeret laggai Lasea. 9Kalulut amaigingan tetere amalimai samba amakataian puabangan, apasatnan poi puaso bagei, pangantomannangan sia si Paulus, kuanangan, 10"Ale sasaraina, kuitco nia puabanganta nene makokope le besi samba babara le rugi sabeu, ta sarat abangen samba kapal, tapoi beri enganta leu." 11Tapoi si kapiten tentera kai jurumuri samba ka sibakkat kapal pei le makatonem bagania bele pei ka tiboiet Paulus. 12Kalulut pusaoat nene ta maeru tukuddu teret pasat laggo simaleppet, oto maigi sia sioba turiuriuake mulajo, baleu moi tuailiake Feniks bule tukuddu sedda ujut laggo simaleppet. Feniks ia te pusaoat ka nusa Kreta, simattai isit sikaolak samba usutbuggei. 13Kele aiboroiake rusat kaiaman simamoile, ka bagadangan le momoian iei ka kiddiet bagada, tiktikrangan sao, mulajo muririk ka nusa Kreta. 14Tapoi ta amauju buraakenangan talabari, oniakenen "Sikalaut Bare" sibara ka nusa nenda. 15Boroinangan leu kapal, taan momoi isasa rusa, obaakemaian maraggai. 16Maraggaimaian pat aili ka teitei sara nusa sigoiso sipuoni Klauda; sedda bulat mabesi akupasikeli kai sikoci kapal. 17Lepa arasakaiake sikoci ka kapal, paappararangan tali ka tubut kapal masiparon. Lotora bui itusaggat ka paddarai Sirtis, beleakerangan lajo, tenan le obaake kapal imaraggai. 18Kopet besit ka tubumai iboroi kai talabari, pato aimapato, paribbairangan abangen ka koat. 19Ka gogoi sikatelunia kabeirangan le tatogat kapal amasiparibbai galajet kapal ka koat. 20Kele ta aimakoinong sulu samba panyanyat piga ngagogoi pa samba rusa pei itibbala kai, taan akukaroni kai murimanua. 21Kalulut amaujungan ta arapukom, purionangan si Paulus ka talagada kuanangan, "Ale sasaraina, nureddet bai kam ngangangku bui tatuitui ka Kreta, ta taoorik gejat baga samba rugi nene! 22Tapoi kutiddou ka kam, bui imakarat bagamui; beri sara ka kam malilimai enga, sarat kapal nene le malilimai. 23Aipoi soibo amurio ka bebeku sara malaikat Taikamanua sibakkat aku samba panindogietku 24masikua, 'Ba maloloto Paulus! Ta moi ta nupurio ka matat Kaisar; samba kalulut kiliu bagat Taikamanua ka tubum, sangamberi saaleinu ka kapal nene muririmanua le sia kalulut ekeu.' 25Oto sasaraina, bui imakarat bagamui! Aipoi matonem bagaku ka Taikamanua, sangamberi siniboinia ka mataku muaaili. 26Tapoi ta isosoppi tatusaggat ka sara nusa." 27Kele aiaili soibo sikapuluepatnia akumaraggai kai ka koat Adria, tengamoi ka bagada le te tatogat kapal amalegerengan ka kapi. 28Lepa belerangan jujuujuu, agairangan rua pulu ngarepa kerunia; ritsi goiso, juujuurangan minca, agairangan pulu lima ngarepa kerunia. 29Karat bagada baleu tusaggat kapal ka uddut bukku, belerangan epat sao ka murit kapal, tiddourangan imaruei imapato. 30Ia geti besiakerangan mutuitui tatogat kapal. Beleakerangan sikoci ka koat, pakaurangan tubuda kele masibele sao ka utet kapal. 31Kuanangan si Paulus ka matat kapiten tentera samba ka tai tentera, "Ke ta mukuddu sia ka kapal, ta muririmanua kam." 32Lepa saggirirangan seseret sikoci tai tentera, bele ka koat raggai. 33Ka legeret pato, nananangan si Paulus sangamberida rapukom, kuanangan, "Teret kineneiget aiailingan pulu epat ngagogoi sarat masingena le kam, nuomake kam laje ta nukom kam apa pa. 34Kalulut nene kunana kam, bule nupukom kam boiki, kan nene poi ituppai ron tubumui. Aipoi beri sangantaili alai ka utemui ta bebele." 35Lepa aikua nene, alanangan roti, kuanangan sura ka Taikamanua ka matada sangamberida, paabbonangan nia, taddaakenangan mukom. 36Maaraunangan bagada sangamberida pukomrangan leu. 37Igimai sangamberimai ka kapal rua ngotu pitu pulu enem kai. 38Kele aramaektek mukom, paribbairangan bera ka koat imatekbuk kapal. 39Kele aimapato, ta araagai laggai nene. Itcorangan guggung sibara buggei, ke momoi bai sedda rateuake rajolouake kapal. 40Saggirirangan talit sao, bele ka koat, rugutrangan talit pumuriat, karaiakerangan lajo ka ute ilajoake nia rusa ka kapi. 41Tapoi amaraggai le ka paddarai, tusaggatnangan utet kapal, taan aturitsi nia sedda, murinia ragat aibetu nia onu sabeu. 42Isiakerangan leu tai tentera masimateiake sangamberi sipenjaraakenen bui rapulalak ratuitui. 43Tapoi aikera le kapiten tentera isiatda, kalulut ioba le ipurimanua si Paulus. Kuanangan ka siagai mulalak raputeipu raei muboiki ka kapi; 44sabagei masitut, ai siala lappiri, ai siala karagatat kapal purangoira. Kisedda te galainia sangamberimai sege ka kapi murimanua.

will be added

X\