PUGAGALAIRA TAI APOSTEL 25

1Telu ngagogoi burunia aisege si Festus ka laggai nene, ei nia ka Yerusalem barania ka Kaisarea. 2Eirangan leu sedda tai imam sabeu samba sautera tai Yahudi masisegeake panganduatda ka matania pagalaiat si Paulus. 3Pusumirangan si Festus ratiddou bule ka erut bagania ikoiniake si Paulus ka Yerusalem; apakerean poi bagada ramateiake nia ka enungan. 4Aleginangan nia si Festus, "Ai le rajajago si Paulus ka Kaisarea, taan leu mauuju kuei sedda. 5Oto kau raoi siabeu ka kam kuei kai sambamai ranganduake nia sedda, ke bulatnia ai selenia." 6Pasat balu ele pulu ngagogoi aikuddu ka Yerusalem si Festus, toili nia ka Kaisarea. Pato baraakenangan rapat pasiukuman, kuanangan leu raambit si Paulus ka matania. 7Kele aioi si Paulus, sangamberida tai Yahudi sibara ka Yerusalem rio rabokko nia, kaurangan maigi panganduat simasane ka tubunia; tapoi ta amoi rajoake nia. 8Tapoi isakkala le si Paulus kuanangan, "Ta anai apa pa jo akugalai ka Surukatda tai Yahudi, ele ka Uman Taikamanua, ele kai Kaisar." 9Kuanangan si Festus kai Paulus pasialat bagada tai Yahudi, "Noba leu mei ka Yerusalem, bule sedda kulelekngake pakarom?" 10Kuana le si Paulus, "Aian aku muririo ka pasiukuman Kaisar; buita se le tulelekngake pakaroku. Kele siagainungan leu ta anai joku ka tai Yahudi. 11Ke ai bai akugalai apa pa jo simateu tumateiake, ta kukekera tubuku matei. Tapoi ke ta sibulatnia panganduatda pagalaiat tubuku, ta anai siooi masisegeake aku ka sia. Pasiukuman Kaisar le kuloulogi!" 12Lepa arapatibo sambada saaleinia sipurarapat, kuanangan si Festus, "Kaisar poi anuloulogi, oto buita nuei kai Kaisar." 13Pasat piga ngagogoi pa, oi rimata Agrippa samba si Bernike ka Kaisarea masiroroi si Festus. 14Kele arakuddu sedda piga ngagogoi pa, tiboinangan si Festus ka matat rimata pagalaiat si Paulus, kuanangan, "Ai se sara sirimanua sipenjaraakenen sigalak Feliks. 15Ka teteret ai aku ka Yerusalem, nganduakerangan nia ka mataku tai imam sabeu samba tai bajara tai Yahudi ratiddou bule kuukum nia. 16Kuakungan masialegi sia, ta amuarat ka kai tai Roma, obat baga le masimateiake sirimanua, enan tapei patuggut mata sia singanduakenen samba sipasingangandu samba tukau oggak ialegi panganduat. 17Oto kele araparuru se, ta akupauju, patona le baraakekungan rapat pasiukuman, kuakungan rasogai nia. 18Tapoi kele arapurio sipangangandu, ta anai apa pa arasusuake jonia kele sikuat paatuatku. 19Sarat pagalaiat aratda le rapaukele ka tubunia, samba pagalaiat sara sirimanua simamatei sipuoni Yesus, tapoi si Paulus masikua murimanua le nia. 20Kalulut kepput ka bagaku masipagaba paukelat nene, nounoukungan nia baleu ioba mei ka Yerusalem, bule sedda tulelekngake pakaronia. 21Tapoi ailoulogi le si Paulus pasiukuman Kaisar. Tidounangan ikuddu se pangenan itakkiake pakaronia si Kaisar. Kalulut nene kuakungan rajago nia, teret kukoiniake nia kai Kaisar." 22Kuanangan si Agrippa ka matat Festus, "Koba leu kaku kuarep sirimanua nenda." Kuanangan si Festus, "Mancep geti nuarep nia." 23Mancep oi aioi si Agrippa ruada si Bernike sibara pulaingeat simalatsat, tugururangan ka purapanan samba sautera tai tentera samba sangamberi siabeu tiboi tubu ka laggai nene. Lepa kuanangan si Festus raambit si Paulus. 24Kuanangan si Festus, "Rimata Agrippa samba kam sangamberi siparururu se! Se nuitco kam sirimanua singanduakenenda sangamberi tai Yahudi sikuddu ka Yerusalem samba sikuddu se. Ragereiake masikua taan mateu ipurimanua. 25Tapoi ta anai akusese jo sigalainia simateu tuukum nia ukuman matei; samba ailoulogi poi pasiukuman Kaisar, oto teuakekungan tukoiniake nia kai Kaisar. 26Tapoi ta anai simakolou suratnakenenku kai Kaisar pagalaiat tubunia. Ia te akuambit nia ka matamui, sara pei ka matam rimata Agrippa, bule lepa itulelekngake ibara suratnakenenku. 27Aipoi kupaatu ta pasese tukoiniake sara sipenjaraakenen ke ta tutiboi simakolou panganduat ka tubunia."

will be added

X\