PUGAGALAIRA TAI APOSTEL 24

1Pasat lima ngagogoi ei Imam Sabeu Ananias sambada tai bajara tai Yahudi samba siagai mutitiboat sipuoni si Tertullus kai gubernur masisegeake panganduatda pagalaiat si Paulus. 2Kele arasogai si Paulus ka mata, taddaakenangan si Tertullus masinganduake si Paulus kuanangan: "Gubernur Feliks siabeu! Kalulut erut paneineiatnu bulat amariuriuan aban ka kai, samba kalulut topitnu amaigingan katuerukat abara ka bangsamai. 3Sangamberinia nene, kaipa kaipa ka bagat pusurakat le kusilo kai nia. 4Tapoi buian imauju imalimai teterem, kutiddou bule nuarepmake panganduatmai goiso nene ka bagat om bagam. 5Aipoi akusese kai sirimanua nene sibaraake oringen samba sibaraake pugaugapat ka sangamberi tai Yahudi ka sangalio polak, samba utet aratda tai Natsaret le nia. 6Isibo pei bagei masipalolit Uman Taikamanua, ia te akulaba kai nia, kei kuukum kai nia siripot aratmai. 7Tapoi amoi le utet tentera Lisias masiala nia ka kabeimai ka bagat gege, 8samba iguguluake sipasinganganduake nia raoi ka matam. Anurerean geti nia, againungan sangamberi panganduatmai ka tubunia." 9Sangamberi tai Yahudi leu masironake panganduat nene samba rakua bulat sibulatnia. 10Kele aiteuake si gubernur ipanibo si Paulus, panibonangan kuanangan, "Akuagaian, amaigingan rura aibailiu ekeu sipasiukum ka bangsa nene. Ia te imaeeme bagaku kualegi pakaroku nene ka matam. 11Aipoi momoi leu nulelekngake nia, tapei aisaliu pulu rua ngagogoi silelepa, amei aku ka Yerusalem manindou. 12Ta anai araaili aku pajoggolo ka kasei pa, ele masibaraake pugaugapat ka Uman Taikamanua ele ka uma parurukat ele kaipa pa ka bagat laggai. 13Ia leu et ta momoi ramunengake nia kineneiget panganduatda pagalaiat tubuku. 14Tapoi kumunengake le nene ka matam, masipanindogi Taikamanuanda taikebbukatmai le aku, siripot arat Tuhan, kuanenda arat simasele. Kukatonemi le sangamberi sinuratnakenen ka Surukat samba ka suratda tai nabi. 15Keleu sia leu, kukaroni le Taikamanua, kababarat katusuruatda simamatei, ele simaroipo ele sijo. 16Ia te kuuubui tubuku murimanua simalina paatuat ka matat Taikamanua samba ka matat sangamberi sirimanua. 17Pasat piga ngarura pa oi aku minca ka Yerusalem masiambit bulagat panguruat ka bangsaku samba buluakenen. 18Ka bagat aikugagalai nene, ailirangan aku ka Uman Taikamanua, lepat akupusuru. Ta anai sirimanua simigi, samba ta anai pugaugapat. 19Sarat piga le pa tai Yahudi sibara ka Asia ai sedda; sia le siripokatnia momoi se ka matam masingandu, ke ai bai panganduatda pagalaiat tubuku. 20Ele sia tubuda tainene itiboi nia apa joku arasese ka teteret akupurio ka matat Rapat Sabeu. 21Ele kalulut sara tiboiet pa sigereiakenenku akupurio ka matada ia te: Kalulut katusuruat simamatei nuukum kam aku gogoi nene." 22Kele aiarep nene si Feliks, maigingan poi aiagai arat Tuhan, ariakenangan boiki rapatda kuanangan, "Amoian geti si Lisias utet tentera sene, ai leu kutakkiake pakaromui nene." 23Lepa kuanangan kai kapiten tentera ijago si Paulus, tapoi bui mabesi ka tubunia, samba ta momoi tukera saaleinia raoi masipuuku ele masibalou nia. 24Pasat piga ngagogoi pa oi si Feliks ruada sinanalepnia sipuoni si Drusilla tai Yahudi; kuanangan rasogai si Paulus, arepmakenangan pagalaiat tonem baga ka Kristus Yesus sibara kai Paulus. 25Kele aitiboi si Paulus pagalaiat puroipoat, surut tubu samba pagalaiat ukuman ka gogoi sialu, malotonangan si Feliks, kuanangan, "Kenanan boiki kineneiget, kaipangan geti ibara oggak, ai leu kusogai ekeu minca." 26Ka bagat nene, ai le ikikiddi ikau bulagat si Paulus ka tubunia, ia te imarereirei isogai nia patibo. 27Kele aiaili rua ngarura, silinangan si Feliks si Perkius Festus. Kalulut ioba iala bagada tai Yahudi si Feliks riuriuakenangan ikuddu si Paulus ka bagat penjara.

will be added

X\