PUGAGALAIRA TAI APOSTEL 23

1Ia geti kinerenangan sipurarapat si Paulus kuanangan, "Ale sasaraina, teret kineneiget siripot paatuat simalina le akupuparaboat ka matat Taikamanua." 2Guguluakenangan Imam Sabeu Ananias sipuririo ka bebet Paulus itepa ngungun Paulus. 3Kuanangan ka matania si Paulus, "Ai leu itepa ekeu Taikamanua, ekeu rupi sikapu! Muuddet ekeu sene masiukum aku siripot Surukat, lepa guguluakenungan tutepa aku masipasabau Surukat." 4Kuanangan sipuririo ka bebenia, "Nuaasa koi Imam Sabeu Taikamanua?" 5Aleginangan nia si Paulus, "Ta kuagai ale sasaraina Imam Sabeu le nia. Kirenangan atusuratnan ka Surat Sipunenan, 'Bui nuasa sipaneinei bangsam.' " 6Kele aiagai si Paulus, ka talagada sipurarapat, iretalaga tai Saduse, iretalaga tai Parise, sogaakenangan ka matada sipurarapat, "Ale sasaraina! Tai Parise le aku, togat tai Parise. Kalulut tonem baga ka katusuruat tubu simamatei le aranganduake aku." 7Kele aikua nene, pajoggolorangan tai Parise samba tai Saduse bailiu rubei rua parurukat nene. 8Aipoi tai Saduse masikua, ta anai katusuruat simamatei, ta anai malaika ele ketsat; tai Parise geti rakatonemi le ruania. 9Baranangan pugaugapat sabeu. Puriorangan leu siagaisurat ka rubeiatda tai Parise pajoggolorangan kuarangan, "Ta anai kusese kai sele ka tubut sirimanua nene! Ele ai pa ketsat ele malaika sipaninibo ka tubunia!" 10Memei makokope beu le pajoggolatda; maseddenangan utera tai tentera baleu rapabirit si Paulus. Sogainangan tai tentera ratugorosot raala si Paulus ka talagada, raambit nia ka markas. 11Ka soibonia nenda, purionangan si Tuhan ka bebenia kuanangan, "Bui imakarat bagam! Aipoi kele mumunengakenu aku ka Yerusalem, buita kisedda geti numunengake aku ka Roma." 12Kele aimapato pukererangan baga piga pa tai Yahudi, supparangan tubuda ta mukom, ta mulo, ke tapei ramateiake si Paulus. 13Igida sipukekere baga nene ai epat pulu sia legei. 14Lepa ei sia ka tai imam sabeu samba ka tai bajara tai Yahudi kuarangan, "Akusuppangan kai tubumai ta kukokom kai apa pa ke tapei kumateiake kai si Paulus. 15Oto kineneiget tiddou kam sangamberimui sipurarapat ka utera tai tentera, bule iambit si Paulus mancep ka matamui, kuamui le bule nulelekngake kam pakaronia bulat sipulelelek; oto kai amatarekngan kai kumateiake kai nia enan tapei sesege nia se." 16Tapoi pukerekat bagada nene aiarep le buat Paulus, einangan leu et ka markas masisegeake nia kai Paulus. 17Lepa sogainangan si Paulus sara kapiten tentera kuanangan ka matania, "Ambit pei silainge nene ka utet tentera ai segeakenennia ka matania." 18Alanangan nia si kapiten, ambitnangan nia ka utet tentera kuanangan, "Aisogai aku si Paulus sipenjaraakenen nenda, aitiddou kuambit silainge nene ka matam, aipoi ai kuanennia ka matam." 19Alanangan kabeinia utera tai tentera, ambitnangan nia ka bebe, nounounangan nia, "Aponia segeakenennu ka mataku?" 20Aleginangan nia silainge, "Apakerean bagada tai Yahudi, bule ratiddou ka matam nuambit si Paulus mancep ka purapanan, rapakau tubuda masilelekngake sipulelelek pagalaiat pakaronia. 21Tapoi bui nureddet nganganda, aipoi ai epat pulu sia legei silekeni nia. Arasuppangan tubuda ta mukom, ta mulo, ke tapei ramateiake si Paulus; kineneiget amatarekngan sia, tiboietnungan le rangengena." 22Lepa kuanangan utera tai tentera itoili silainge, paneineinangan nia, "Bui nukua nia ka kasei pa sesegeakenu nene ka mataku." 23Lepa sogainangan utera tai tentera rua kapiten tentera kuanangan, "Tarekngake kam rua ngotu tentera samba pitu pulu sipukukuro samba rua ngotu sibara sosoat, raei bobo siba soibo nene ka Kaisarea. 24Tarekngake leu kam kuro kai Paulus, taroakemuian nia sipulelelek kai gubernur Feliks." 25Suratnakenangan leu surat kise ngangania: 26"Salam sibara kaku Klaudius Lisias masiailiake gubernur siabeu! 27Sirimanua nene aralaba nia tai Yahudi, kei ramamateiakean le nia ke ta mei aku samba tai tentera masibelaake nia; akuarep poi tai Roma le nia. 28Kalulut kubesiake kuagai apa lulu ranganduake nia ambitkungan nia ka matat rapatda. 29Sese akusese nia, sarat kalulut pagalaiat Surukatda le aranganduake nia, ta anai panganduat simateu tumateiake ele tupenjaraake nia. 30Kele arasegeake ka mataku iisiakera tai Yahudi ralekeni nia, teuakekungan leu kukoiniake nia ka tubum. Akukuangan leu ka matada sipasingangandu nia raoi masisegeake nia ka matam." 31Alarangan si Paulus tai tentera siripot siparentaakenen ka matada, ambitrangan nia soibo nenda leu et ka Antipatris. 32Pato, sipukukuroan le arakau masiriuriuake puenunganan masiambit si Paulus; sia sabagei geti toili sia ka markas. 33Sege sia ka Kaisarea, kaurangan surat kai gubernur, segeakerangan leu si Paulus ka tubunia. 34Lepa aibasa surat si gubernur, nounounangan si Paulus ka laggai kaipa aibara. Kele aiagai sibara ka Kilikia le nia, 35kuanangan, "Ai leu kuarep pakarom abarangan geti sia singanduake ekeu." Lepa kuanangan rajago si Paulus ka lalep pasiukuman rimata Herodes.

will be added

X\