PUGAGALAIRA TAI APOSTEL 22

1"Ale sasaraina samba saukkui, arep kam kualegi ngangamui!" 2Kele araarep ipanibo ka ngangan Ibrani pumengmengrangan; kuanangan, 3"Tai Yahudi le aku, siputututu mata ka Tarsus ka tobbou Kilikia, tapoi sipuurau ka laggai nene; sinikolaakenen Gamaliel sipulelelek pagalaiat surukat taikebbukatta, bailiu aku simangamang masigalai galajet Taikamanua keleu kam sangamberimui kineneiget. 4Kupaoreji sia pat matei situtnake arat Tuhan; taimanteu samba tainanalep kukabe kukau sia ka bagat penjara. 5Tubut Imam Sabeu sambada tai baja ibailiu sipasimumuneng pagalaiat nene. Sibara ka sia poi akusilo surat ambinen ka saalei ka Damaskus, eikungan leu masilaba sia sikuddu sedda samba masiambit sia situkakabe ka Yerusalem, ituukum sia." 6"Ai aku mueenung malelegerengan le ka Damaskus tugge sulu, tulut putoronangan pato simakirisau sibara ka manua masitoroiji sangalio tubuku. 7Bele aku ka polak, lepa arepkungan nganga sipasikukua ka mataku, 'Saulus, Saulus, nukukukuru kodda aku?' 8Alegikungan nia, 'Kasei ekeu Tuhan?' Kuanangan ka mataku, 'Aku te Yesus tai Natsaret, sikukurum.' 9Saaleiku geti araitco leu pato, nganga sipaninibo ka mataku geti ta araarep. 10Lepa kuakungan, 'Kipangan le kugagalai Tuhan?' Kuanangan ka mataku si Tuhan, 'Suruake ekeu, kenan ka Damaskus, sedda geti tusegeake ka matam sangamberi galaiakenennu.' 11Taan poi akuitco mata kalulut toronia pato nenda, palulurangan aku saaleiku mei ka Damaskus. 12Ka laggai nenda ai sara sirimanua sipuoni si Ananias, simasuru ka Surukat; sangamberi tai Yahudi sikuddu sedda le masimunengake pagalaiat tubunia. 13Oi nia ibalou aku, purionangan ka bebeku kuanangan, 'Saraina Saulus, kau imaitco minca matam!' Ia leu et jamnia maitconangan minca mataku, itcokungan nia. 14Kuanangan, 'Taikamanuanda taikebbukatta le aipili ekeu bule nuagai siobat bagania, samba bule nuitco Simaroipo baga samba nuarep tiboiet sibara ka ngangania. 15Bailiu ekeu sipasimumunengnia ka sangamberi sirimanua pagalaiat sangamberi siitconu samba siarepnu. 16Oto kineneiget apangan le imagogoa bagam? Suruake ekeu iturau ekeu, samba nusogai onin Tuhan, bule itubui jom.' " 17"Kele akutoili ka Yerusalem, ai aku maninindou ka Uman Taikamanua sopsopnangan aku Ketsat Taikamanua, 18itcokungan si Tuhan sipasikukua ka mataku, 'Olaake nutuitui ka Yerusalem, aipoi ta rasisilo pasimunengannu pagalaiat tubuku.' 19Kuakungan, 'Araagaian tebai eeiku ka senen uma parurukat masipenjaraake samba masibobo sangamberi sikatonemi ekeu. 20Samba ka teteret aitupiliake logau Stefanus, sipasimumuneng ekeu, ai leu aku sedda, samba ioba le bagaku aimatei samba aku le amasijago leppeira sipasimamateiake nia.' 21Kuanangan minca si Tuhan ka mataku, 'Kenan le, aipoi ka bangsa bagei ka sareunan le kukokoiniake ekeu.' " 22Teret ka tiboiet nene le araarep ngangan Paulus; pasat pugereirangan seget rotda kuarangan, "Areuake le sirimanua nene ka polak nene! Ta mateu ipurimanua!" 23Ai sia mugegerei, paribbairangan leppeira samba ratadduake abu ka pata. 24Kuanangan utera tai tentera ituambit si Paulus ka markas samba itubobo nia, bule iturere nia, ituagai apa lulu ragegereiji nia kele nene. 25Kele arakabe nia, bule rabobo nia, kuanangan si Paulus ka matat kapiten tentera sipuririo sedda, "Momoi poi nubobo tai Roma enan tapei tulelekngake siripot ukum?" 26Kele aiarep nia kapiten tentera ei nia masisegeake ka utera, kuanangan, "Kipa ne nugagalai? Tai Roma le sirimanua nene." 27Ei aiei utera tai tentera kuanangan ka matat Paulus, "Kua pei ka mataku, bulatnia tai Roma le ekeu?" Kuanangan si Paulus, "Oo." 28Kuanangan utera tai tentera, "Simaigi le bulagat akukau masisaki puwarga negara nene." Kuanangan si Paulus, "Kaku geti tutunangan mataku warga negara Roma." 29Siksikrangan leu tubuda tai tentera sioba masirere nia; malotonangan leu ka sia utera tai tentera kele aiagai tai Roma le nia samba kalulut aikabe nia. 30Kalulut ibesiake poi utera tai tentera iagai katukolobat apa lulu rajoake si Paulus tai Yahudi, pato belaakenangan nia, kuanangan raparuru tai Imam Sabeu samba sangamberi sipurarapat. Lepa ambitnangan si Paulus kaunangan ipurio ka matada.

will be added

X\