PUGAGALAIRA TAI APOSTEL 19

1Ka teteret ai si Apollos ka Korintus ai si Paulus masigejengi laggai ka tirinia jatjalat sege nia ka Epesus. Sesenangan sedda piga pa sipasiului. 2Nounounangan sia, "Anusiloan leu kam Ketsat Sipunenan ka teteret aimatonem bagamui?" Alegirangan nia, "Beri pei akuarep kai ai Ketsat Sipunenan." 3Kuanangan minca ka matada, "Oto pasiraukat apa le aiturau kam?" Alegirangan nia, "Pasiraukat Yohannes." 4Kuanangan si Paulus, "Pasiraukat Yohannes geti, ia te pasiraukat katubabau paatuat sirimanua; samba ka bagat nene isegeake ka bangsa Israel bule rakatonemi siooi kuruk teiteinia, ia te Yesus." 5Arep araarep nene, turaurangan ka onin Tuhan Yesus. 6Kele aitonemake kabeinia si Paulus ka utera, sopsopnangan sia Ketsat Sipunenan; paniborangan leu et ka nganga bagei samba pasipoiliatrangan. 7Taddera sangamberida pulu rua sia. 8Ia geti ei nia ka uma parurukat pungantomannangan ka bagat eme telu ngalaggo burunia, masipatiboiji samba masikolouake isaksak ka bagada pagalaiat Purimataat Taikamanua. 9Tapoi kele arakelaake paatuatda sabagei samba ta raoba masikatonemi, rapaloloi pei le arat Tuhan ka matat simigi, kaddiuakenangan sia si Paulus, saraakenangan sipasiului; ka sikola Tiranus-an le ipungantoman senen gogoi. 10Rua ngarura ujunia aigalai nene, pat sangamberida sikuddu ka Asia tai Yahudi samba tai Grika masiarep tiboiet Tuhan. 11Bulat ta magulai kerek aibaraake Taikamanua aigalaiake kabei Paulus. 12Beringan poposat attinang ele apparat tenga sibara ka tubut Paulus rakau ka tubuda simabesi, tata besira samba ketsat sikatai tui ka tubuda. 13Ai leu piga pa tai kerei tai Yahudi sipueekpak masisibo masitiboi onin Tuhan Yesus ka tubuda pinasaileu sanitu, kuarangan, "Ka onin Yesus sinegeakenen Paulus kuusiake kam ka tubuda." 14Sigalaiake nene ia te pitu sia tatogat Skewa imam sabeu ka tai Yahudi. 15Kuanangan sanitu ialegi sia, "Kuagai le Yesus, si Paulus leu kuagai; tapoi kam, kasei kam?" 16Burutinangan sia sirimanua pinasaileu sanitu nenda, labanangan sia sangamberida, pat taiomrangan nia, tuituirangan leu ka lalep nenda simabulutut samba sibara mauju. 17Sibabara nene maarep ka sangamberi tai Yahudi samba tai Grika sikuddu ka Epesus; malotorangan sangamberida, samba onin Tuhan Yesus memei tuumunake. 18Maigi sia siputotonem baga amoi masiseseake joda samba ratiboi sia leu aragalaiake kele nenda. 19Maigi leu sia sigalai kerei siburu, oi sia ruruakerangan bukoda, laborangan nia ka matat simigi. Adderangan nuntut sakinia, iaili lima pulu ribu perak. 20Kalulut kise gegenia memei marararat samba maroron tiboiet Tuhan. 21Pasat sibabara nene teuakenangan paatuatnia si Paulus mei ka Yerusalem masisabau Makedonia samba Akhaya, aipoi aikua, "Baraku sedda, buita kuitco leu Roma." 22Koiniakenangan rua sipasiroromnia, ia te si Timoteus samba si Erastus rapuboiki mei ka Makedonia, nia geti mukuddu pei le nia goiso ka Asia. 23Tapoi ka teteret nenda bara pugaugapat sabeu kalulut arat Tuhan. 24Aipoi ai sara tukang perak sipuoni si Demeterius, sipasigagalai uman sabulungan Artemis ka perak, samba bulat ta magulai uktuk ka tai tukangnia kalulut galajet nene. 25Ruruakenangan sia sangamberida tai tukangnia samba tai tukang perak sabagei, kuanangan, "Ale sasaraina, anuagaian kam, ka galajet nene le ibabara uktukta! 26Kineneiget anuitcoan samba anuarepman kam, sigalai Paulus nene. Ta sarat se ka Epesus tapoi tusasaluan le Asia ipakatai nganga masipepeake sirimanua simigi, aipoi aikua sangamberi sigalai kabei sirimanua ta taikamanua. 27Kalulut nene, ta sarat galajetta ipakatai, tapoi ia leu et uman Artemis sabulungan sabeu nenda rapaloloi sirimanua, samba pulatsanannia limai, kenanen sangalio Asia samba sangalio polak masisuru nia." 28Kele araarep nene magolunangan bagada, pugereirangan kuarangan, "Abeu le Artemisra tai Epesus!" 29Gau le sangalio laggai; giritrangan si Gayus samba si Aristarkhus tai Makedonia alei Paulus ka puenunganan, pagururangan sangamberida ka kudduat paikbungan. 30Ioba mei si Paulus ka talagat sirimanua, tapoi ta araobaake nia sipasiului. 31Ia leu et piga pa sia saute sibara ka Asia sipususuruak kai Paulus, rakoiniake sieei masikua ka matania bui iei ka paikbungan. 32Sia siparuru ka paikbungan geti tenan le sia mugerei; sabagei masikua kisee, sabagei masikua kisedda, aipuinengan sia, samba maigi sia ta raagai apa lulunia raparuru. 33Ka bagada le te sabagei lulut si Aleksander le aibara nene, aratukkuluake poi nia tai Yahudi ka mata. Lepa totoiakenangan kabeinia si Aleksander itiddou manibo masikolouake ka matada sirimanua simigi tatat selenia. 34Tapoi kele araagai tai Yahudi le nia, pugereirangan sikere sangamberida iaili sangajam ujunia: "Abeu le Artemisra tai Epesus!" 35Kele aimengmengake sia jurutulis laggai, kuanangan, "Kam tai Epesus! Kasei te sirimanua sitaiagai laggai Epesus nene le sipasikeli uman sabulungan Artemis samba tularatnia sibebele ka manua? 36Ta anai kasei pa silikkuru nia; oto mengmengakean kam, bui matulut nugalai kam apa pa. 37Anuambitnan poi kam sene tainene, ta kalulut araraurau uman sabulunganta ele rapaloloi oninia. 38Oto ke ai pakaronia si Demeterius samba tai tukangnia ka tubut kasei pa, ai le pamarenta, samba sipasiukum ai sia, sedda te raeei mangandu. 39Tapoi ke ai pei le besiakenenmui, kau itukolouake nia ka purapanan sipulelelek. 40Aipoi mageja bagata ranganduake sita kalulut pugaugapat sibabara kineneiget; ta anai apa pa kuanenta paluluatnia masiseseake pugaugapat nene." 41Lepa aikua nene jurutulis laggai, tuituiakenangan sia siparururu sedda.

will be added

X\