PUGAGALAIRA TAI APOSTEL 15

1Ai piga pa siooi ka Antiokia sibara ka Yudea, pangantomanrangan saalei kuarangan, "Ke ta tusunat kam siripot sitoneakenen Mose, ta momoi numaarau kam." 2Ta magulai pajoggolat samba paukelat Paulus samba Barnabas ka tubuda. Kalepakatnia, teuakerangan iei si Paulus samba si Barnabas samba piga pa ka talagada sapaamian masitagetnake tai apostel samba tai baja ka Yerusalem, masitiboi pagalaiat nene. 3Taroakerangan sia sapaamian ka enungan tui sia, silajirangan Penisia samba Samaria, nunuakerangan sedda katubabauna paatuatda sipuarat sabulungan; bailiu maangka bagada saalei sedda. 4Kele arasege ka Yerusalem, roroirangan sia sapaamian samba tai apostel samba tai baja, nunuakerangan leu sangamberi sigalai Taikamanua kalulut tubuda. 5Ia geti rio piga pa tai Kristen sibara ka rubeiat Parise siburu kuarangan, "Buita tusunat le sia samba ratut surukat Mose." 6Lepa purapatrangan tai apostel samba tai baja masipatiboiji pagalaiat nene. 7Kele aimauju arapaukele, rio si Petrus, kuanangan ka matada, "Ale sasaraina, anuagaian kam ka panandaatnia pei le aipili aku Taikamanua ka talagamui, bule kupaarep Katuareman Simaeru ka sabangsa bagei, ramatonem baga. 8Taikamanua leu siagai paatuat sirimanua aimunengakean sisilona sia, ka bagat kakauna ka sia Ketsat Sipunenan keleu ka sita, 9samba ta iiggat sita ka sia, lepa ailinaake paatuatda kalulut tonem baga. 10Oto angoi nusibo kam Taikamanua kineneiget nukau kam bairatet ka tetekatda sipasiului, beringan taikebbukatta ele sita ta momoi tabairat nia? 11Tapoi matonem bagata, kalulut katet bagat Tuhan Yesus le iooi tamaarau, kisedda leu sia." 12Pumengmengrangan sangamberi siparururu, arepirangan si Barnabas samba si Paulus ranunuake sangamberi kerek samba kiseiet sigalai Taikamanua ka talagat bangsa bagei kalulut tubuda. 13Lepa arapanibo, kuanangan si Yakobus, "Ale sasaraina, arepmake kam kaku! 14Aikolouakean si Simon, ka panandaatnia pei le aipakoinongan katet bagania Taikamanua ka bangsa bagei, iala ka talagada bailiu bangsania. 15Sangamberinia nene pasese le ka siniboira tai nabi kele sitususurat, 16'Pasat nene momoi aku minca kurioake minca sapou David simabubukkat, samba simararagat kupaeru samba kuparon minca, 17bule sangamberi sirimanua sabagei masigaba si Tuhan, samba bangsa bagei sinogaiku bailiu bangsaku. Kise te ngangan Tuhan, sigalai sangamberinia nene, 18simaaagai barania ka siburu pei le.' 19Oto siripot ka paatuatku, ta tugegejaake bagada bangsa bagei sitotoili ka Taikamanua. 20Tapoi suratnan le takakau ka sia, tanganturu sia bui rakom komen sibuluakenen ka buluat; raareuake tubuda ka puumunan; samba bui rakom tarimeu sipetsut, ele mukom logau. 21Aipoi Surukat Mose barania ka siburu pei le atungantomanakean ka senen laggai, samba tubasaake senen gogoi Sabbat ka uma parurukat." 22Ia geti teuakerangan tai apostel samba tai baja samba sangalio paamian rapili piga pa ka talagada koiniakenen ka Antiokia alei Paulus samba Barnabas. Pilirangan si Yudas sipuoni Barsabas samba si Silas. Ruada nene ia te sikebbukat ka talagat saalei. 23Kaurangan raambit surat, kise ngangania, "Salam sibara ka tai apostel samba tai baja samba sasarainamui ka kam sasaraina ka Antiokia, Siria samba Klikia sibara ka bangsa bagei. 24Akuarepman kai, ai piga pa sibara ka kai masigejaake bagamui samba masipageugeu paatuatmui kalulut nganturatda; nene ta sibara ka ngangamai. 25Ia te akuteuake kai ka keret baga kupili kai piga pa sia koiniakenen ka kam masipaalei kilibet bagamai si Barnabas samba si Paulus, 26ia te sirimanua sipasikakau engania kalulut onin Tuhanta Yesus Kristus. 27Oto kukoiniake kai si Yudas samba si Silas bule sia leu masisegeake tiboietmai ka kam. 28Aiteuakean poi Ketsat Sipunenan samba kai leu masiteuake, bui kutuppai kai sanenia bairatetmui, sarat nene le besiakenenmai: 29bui nukom kam komen sibuluakenen ka buluat, bui nukom kam logau, bui nukom kam tarimeu sipetsut samba masiareuake tubu ka puumunan. Ke nujago kam tubumui ka sangamberi nene, anugalaiakean kam simaeru. Bule maron kam!" 30Lepa araparoro, tui si Yudas samba si Silas raei ka Antiokia. Ruruakerangan paamian sedda, segeakerangan surat ka tubuda. 31Kele arabasa surat nenda, maangkanangan bagada kalulut pusuibiat ka bagania. 32Si Yudas samba si Silas, nabi le poi sia, maigi arakau tiboiet masipangantoman saalei samba masironake paatuatda. 33Kele aimauju goiso arakuddu sedda, obaakerangan saalei ratoili ka erut baga ka sipasikokoiniake sia. [ 34Si Silas geti ioba le mukuddu ka Antiokia.] 35Tapoi si Paulus samba si Barnabas mukuddu pei le sia ka Antiokia, samba maigi sabagei, masigelaiake samba masisegeake tiboiet Tuhan. 36Pasat piga ngagogoi pa kuanangan si Paulus ka matat Barnabas, "Sita kam tabalou kam saalei ka senen laggai ka sipaarepta tiboiet Tuhan, bule taitco kipa galai tubuda." 37Oto si Barnabas ioba iambit si Yohannes sipuoni si Markus; 38si Paulus geti ta pasese ka bagania ituambit si Markus, aikaddiuake poi sia ka Pampilia samba ta ioba masipaalei sia ka galajet. 39Kalulut nene pagolurangan simakope, pat pasararangan; alanangan si Markus aleinia si Barnabas, ei sia mulajo ka Siprus. 40Pilinangan si Silas ka sia si Paulus, tui sia lepa arasegeake sia sapaamian ka katet bagat Tuhan. 41Gejengirangan Siria samba Klikia, paronrangan paatuatda sapaamian sedda.

will be added

X\