PUGAGALAIRA TAI APOSTEL 14

1Ka Ikonium kisedda leu et, ei si Paulus samba si Barnabas ka uma parurukatda tai Yahudi; pangantomanrangan sia, bailiu maigi tai Yahudi samba tai Grika mutonem baga. 2Tapoi tai Yahudi sitaimatonem baga, ratubbui le bagada sipuarat sabulungan imangoingoi bagada ka sasaraina. 3Oto mauju goiso arakuddu sedda tai apostel. Pungantomanrangan ka bagat eme kalulut tonem bagada kai Tuhan. Panguruatnakenangan si Tuhan ka sia ioi rabaraake kerek samba kiseiet masironake tiboiet pagalaiat pukatekat bagania. 4Tapoi bailiu rubei rua le sia sirimanua simigi ka laggai nenda: sabagei masitut tai Yahudi, sabagei masitut tai apostel. 5Lepa pakerenangan bagada sipuarat sabulungan samba tai Yahudi sambada sautera masibesiki samba masibaijuk tai apostel bukku. 6Kele araagai nia tai apostel, tui sia ei sia ka Listra samba ka Derbe, ia te laggai ka Likaonia samba laggai ka riringannia. 7Paareprangan sedda Katuareman Simaeru. 8Ka Listra ai sara sirimanua sarat mukuddu le nia, taimaron rerenia, masakit nia baranangan ka pusulekatnia, beri pei pueenung nia. 9Kuddu nia iarepmake ipanibo si Paulus. Kinerenangan nia si Paulus, itconangan ai tonem bagania, momoi imale. 10Kuanangan si Paulus sabeu nganga, "Rioake ekeu sipulelelek!" Puattatnangan leu ipurio, puenungnangan. 11Kele araitco sigalai Paulus sirimanua simigi pugereirangan kuarangan ka ngangan Likaonia, "Amakerean ka sirimanua taikamanua, atugorosotnan nia ka sita." 12Oniakerangan si Barnabas Zeus, samba si Paulus raoniake Hermes, aipoi nia le sipaninibo. 13Lepa oi sikerei sabulungan Zeus sikuddu ka bebet laggai masiambit jaui samba ogo ka matatbaliu laggai masibuluake buluakenen sambada sirimanua simigi ka tai apostel. 14Kele araarep nia tai apostel si Barnabas samba si Paulus, pabiritrangan leppeira, pabalaurangan raei ka talagat sirimanua simigi pugereirangan kuarangan, 15"Ale, angoi nugagalai kam nene? Sirimanua le kai kele kam. Masipaarep Katuareman Simaeru ka kam le akuoi kai se, bule nugalakngake kam galajet siboboi nutoili kam ka Taikamanua sipuririmanua sibaraake manua samba polak, koat samba sangamberi sibabara ka bagania. 16Ka tetere siburu aiobaake Taikamanua ragalai siobara tai bangsa; 17kenanen kisedda, mariuriu le ipakoinong tubunia ka bagat sene ngamata galajet simaeru, ia te iake urat ka kam sibara ka manua samba rura pubuaiat kan; iake kan ka kam masiangkaake bagamui." 18Kenanen rakua kisedda tai apostel, tapoi siagai ka baga le rakera sirimanua simigi bui rabuluji sia. 19Kele araoi tai Yahudi sibara ka Antiokia samba ka Ikonium, pakatairangan nganga ka sirimanua simigi; pabaijungirangan bukku si Paulus, giritrangan nia ka bebet laggai, ka bagada poi amateian nia. 20Tapoi kele aragoilik nia sipasiului tusurunangan, ei nia minca ka laggai. Pato, tui sia ruada si Barnabas ei sia ka Derbe. 21Paareprangan leu Katuareman Simaeru ka laggai Derbe nene si Paulus samba si Barnabas samba maigi abara sipasiului. Lepa toili sia ka Listra, Ikonium samba ka Antiokia. 22Ronakerangan paatuatda sipasiului, pangantomanrangan sia ramariuriu ka bagat tonem baga, samba rakua, buita taorik le maigi gejat baga tatuguru ka purimataat Taikamanua. 23Ka senen paamian rarioake tai baja garejada, lepa segeakerangan sia ka panindogat samba puaso kai Tuhan katonemietda. 24Silajirangan sangalio Pisidia sege sia ka Pampilia. 25Lepa arapaarep tiboiet Taikamanua ka Perga, ei sia ka Atalia. 26Barada sedda pulajorangan ratoili ka Antiokia, ia te kudduat arasegeake sia siburu ka pukatekat bagat Taikamanua masigalai galajet sikappuluakenenda kineneiget. 27Kele arasege sedda, ruruakerangan paamian, nunuakerangan sangamberi sigalai Taikamanua kalulut tubuda, samba bubukaakena enungan ka sipuarat sabulungan raputonem baga. 28Pukuddurangan sedda mauju goiso rapaalei sapaamian.

will be added

X\