PUGAGALAIRA TAI APOSTEL 12

1Ka teterenia nenda taddaakenangan rimata Herodes masipaoreji laddou paamian. 2Koiniakenangan ramateiake si Yakobus sarainan Yohannes ratete nia lanjau. 3Kele aiitco iooba le bagada tai Yahudi, ia pei ikauake nia; labanangan leu si Petrus, ia te ka teteret Punen Roti Sitasioman. 4Kele ailaba si Petrus, kaunangan nia ka bagat penjara, segeakenangan rajago nia epat ngarubeiat tai tentera, senen rubeiat epat tentera. Paatuatnia poi lepat Punen Paska, ambitnangan nia ka matada sirimanua simigi. 5Oto atuguruan si Petrus ka bagat penjara. Tapoi sapaamian geti mariuriu le ratiddouake nia ka Taikamanua. 6Sinoibo, pangenan imapato iambit si Petrus si Herodes ka matada sirimanua simigi, perep si Petrus ka talagat rua tentera, ai nia kakakabekat rua palenggui. Matatbaliu penjara leu ai sipasijajago. 7Sinulut rio sara malaikat Tuhan sedda, toroinangan pato bagat penjara. Geugeunangan si Petrus isuruake nia kuanangan, "Suru, olaake!" Rugut aimarugut palenggui ka kabeinia. 8Kuanangan ka matania malaika, "Appara tengam samba pakei tarangainu!" Galainangan leu nia. Lepa kuanangan ka matania malaika, "Pakei leppeinu, tut aku." 9Bela nia tutnangan malaika, tapoi ta iagai ele sibulatnia sigalai malaika nene; ka bagania ka bagat ketsatnia le aiitco nene. 10Sabaurangan pujagoat siboiki samba sikarua sege sia ka matatbaliu laba sieei ka laggai. Matatbaliu nene tenan le buka, bela sia, puenungrangan ruada ka sara enungan, lepa tulut kaddiuakenangan si Petrus malaika. 11Kele aiagai nia si Petrus kuanangan, "Ia pei akuagai bulatnia aikoiniake malaikania si Tuhan masibelaake aku ka kabei Herodes samba ka kiddiet bagada tai Yahudi." 12Kele aiagai kolou, ei nia ka lalep Maria inan Yohannes sipuoni leu si Markus. Maigi sia sedda paruru samba manindou. 13Kele ailuuluu si Petrus matatbaliu gerat, oi sara pagugulet sinanalep sipuoni si Rode masiarepi kasei sipasiluluuluu. 14Kele aiagai ngangan Petrus le, taibukanangan matatbaliu angkat bagania, ka baga le aiei masisegeake kababarat Petrus ka matatbaliu. 15Kuarangan ka matania, "Airoroan ekeu." Tapoi ironake le masikua bulatnia le nene. Kuarangan, "Malaikania le nenda." 16Tapoi ta iariake si Petrus masiluuluu. Kele arabuka matatbaliu samba araitco si Petrus, tenan le kisei ka bagada. 17Maimaiakenangan kabeinia si Petrus rapumengmeng, lepa nunuakenangan kipa aibelaake nia si Tuhan ka penjara. Kuanangan, "Segeake kam nene kai Yakobus samba ka saaleita sabagei." Lepa bela nia ei nia ka kudduat bagei. 18Kele aimapato, gau le sia tai tentera; keppu le ka bagada pagalaiat sibabara kai Petrus. 19Koiniakenangan si Herodes ragaba si Petrus, tapoi ta arasese nia. Oto kuanangan raukum sipasijajago, ramateiake sia. Lepa tui nia ka Yudea ei nia ka Kaisarea, pukuddunangan sedda. 20Makope le golut bagania si Herodes ka tai Tirus samba tai Sidon. Ka keret bagada ei sia masitagetnake nia. Patiboijirangan boiki bagat Blastus, sipasijajago lalep rimata bule iromake sia, lepa tiddourangan paaban, kalulut ka polak rimata le ibabara kan ka laggaira. 21Ka sara gogoi silepa tiboi, pakeinangan leppei purimataatnia si Herodes, puuddetnangan ka uddenan purimataat, panibonangan ka matada tai rakyat. 22Pugereirangan tai rakyat kuarangan, "Ngangan taikamanua le nene, ta ngangan sirimanua." 23Ia leu ne teterenia tepanangan nia malaikat Tuhan, kalulut taisusuruna Taikamanua; gutgutnangan nia leiti, matei nia. 24Tapoi tiboiet Taikamanua geti, memei le muuurau samba marararat. 25Oto ka sia si Barnabas samba si Saulus lepa aragalai galajetda ka Yerusalem, toili sia. Ambitrangan si Yohannes sipuoni leu si Markus.

will be added

X\