PUGAGALAIRA TAI APOSTEL 1

1Teopilus tuan sabeu, Ka bukoku siboiki akutiboian sangamberi sigalai Yesus samba ngantomannia barania ka panandaatnia, 2teret ka gogoi katusakaiatnia ka sorga, lepa aikau surukatnia ka geget Ketsat Sipunenan ka tubuda tai apostel sipilinia. 3Lepa aiorik pangoringan, pakoinongnangan tubunia ka matada, samba maigi katuaggaiat aipatoila masibulatnake puririmanuania. Epat pulu ngagogoi ujunia aipatoila tubunia ka matada samba masitiboi pagalaiat Purimataat Taikamanua. 4Kele araparuru sambada paneineinangan sia, "Bui nukaddiuake kam Yerusalem, tapoi ngena le kam sedda sinibalaakenen Ukkui, ia te sikuaku ka matamui. 5Aipoi kai Yohannes oinan le aikau masirau, tapoi kam geti Ketsat Sipunenan le turarau kam; taan mauuju gogoinia." 6Ia geti nounourangan nia siparururu sedda kuarangan, "Tuhan, ia ne teterenia nurioake minca purimataatda tai Israel?" 7Kuanangan ka matada, "Ta puukuketmui masiagai tetere samba gogoinia siteuakenen Ukkui siripot gegenia. 8Tapoi nusisilo le kam ron, ke amoian Ketsat Sipunenan isopsop ka tubumui, bailiunangan kam simunengake aku ka Yerusalem samba ka sangalio Yudea samba Samaria pat aili ka tutut polak." 9Lepa aitiboi nene tuakkatnangan ka matada, tabbonangan nia tanairusa, agou ka matada. 10Airateteila manua katusakaiatnia, tulut rio ka bebera rua taimanteu sipuleleppei simabulau 11sipasikukua, "Kam tai Galilea, muririo kodda kam masiteila manua? Yesus nene, siala ka tubumui tusakai ka sorga, momoi le nia minca keleu siitcomui nia tusakai ka sorga." 12Lepa toili sia sipasiului ka Yerusalem barada ka leleu sipuoni leleu Tula, simalegere ka Yerusalem; sioi tuenungi gogoi Sabbat reunannia. 13Sege sia, ei sia ka bilik ka pata kudduatda simareirei. Sia nene ia te si Petrus, si Yohannes, si Yakobus samba si Andreas, si Pilipus samba si Tomas, Bartolomeus samba si Mateus, si Yakobus togat Alpeus, si Simon Selotes samba si Yudas togat Yakobus. 14Sia sangamberida amusarangan paatuatda manindou sambada tainanalep samba si Maria inan Yesus, samba sasarainan Yesus. 15Ka sara gogoi purionangan si Petrus ka talagada sasaraina -- ai sangotu rua pulu igida siparururu sedda -- kuanangan, 16"Ale sasaraina, ta moi ta ipuaili siniboi Surat Sipunenan sinibalaakenen Ketsat Sipunenan ka ngangan David pagalaiat si Yudas, sibailiu utera sipasilalaba Yesus. 17Atuaddeakean poi nia ka tubuta, aisiloan galajet pasikelat nene sambata." 18Si Yudas nene aisakingan sangamata mone upat jonia, lepa bele nia sitululukke, pukpuknangan balugunia, marugutnangan tinanainia. 19Sangamberi sikuddu ka Yerusalem le masiagai nene, ia te araoniake mone nenda ka nganganda Akeldama, tibonannia "Polak Logau". 20"Atusuratnakean poi ka buko Psalmen kise, 'Buita imatangeu lalepnia; bui ibara sikudduji nia.' Atusurat leu et, 'Sabageian le isisilo pasikelatnia.' 21Oto buita ibara sara silinia aleimai, ia te sibara ka talagat sirimanua sipaalei kai sanganantania ai pei le Tuhan Yesus masipaalei sita, 22barania ka pasiraukat Yohannes teret ka gogoi aituakkatnake nia ka sorga masikaddiuake sita, ibailiu nia sipasimumuneng sambamai pagalaiat katusuruatnia." 23Lepa rioakerangan rua sia, ia te si Yosep sipuoni si Barsabas, oniakenenda leu Yustus samba si Matias. 24Ia geti panindourangan kise, "Tuhan, ekeu le siagai paatuat sirimanua. Bule nusausau ka sirua nene kasei anupili 25masisilo galajet pasikelat, samba puaapostel sikaddiuakenen Yudas situtuitui mei ka kudduatnia." 26Lepa kaurangan ka tubuda surat kauktungan, kereknangan si Matias; lepa addeakerangan nia ka tai apostel sipulusara.

will be added

X\