3 YOHANNES 1

1Sibara kaku paneinei paamian, masiailiake si Gayus kilibet baga, bulat kanuntuat bagaku. 2Ale kilibet baga, panindogatku bule ai le ekeu maririuriu tubu samba maron ka bagat sangamberinia, kele riuriunia ketsatnu. 3Aipoi bulat maangka bagaku, kele araoi sasaraina samba ramunengake puririmanuam ka bagat pubulanan, kirenangan poi mariuriu le ekeu ka bagat pubulanan. 4Ta anai sisaliu angkat bagaku ke kuarep puririmanuanda tatogaku ka bagat pubulanan. 5Ale kilibet baga, bulat maeru sigalaiakenennu ka tubuda saalei tai Kristen kenanen sasareu le sia. 6Aramunengakean ka matat paamian se pagalaiat nuntut bagam. Samba tuppai minca erunia sigalainu ke nuromake sia rariuriuake puenungananda siripot simateu ka matat Taikamanua. 7Aipoi kalulut onin Tuhan le araei, ta anai arasilo apa pa sibara ka sipuarat sabulungan. 8Oto mateu le tasilo sirimanua kele nene, bule ibailiu sita aleira ka bagat pubulanan. 9Akukauan goiso surat ka paamian, tapoi si Diotrepes sioba muute ka talagada ta aisilo kai. 10Oto amoian geti aku, tiboikungan sangamberi sigalainia, ia te sangamberi tiboiet sikatai sikuania pagalaiat kai. Tapei sesege bagania nenda, ta sarat tubunia ta ioba masisilo saalei siooi, ikera pei le sabagei sioba masisilo sia samba ibelaake sia ka paamian. 11sarainangku kilibet baga, bui nuului sikatai, simaeru le ului. Sipasigagalai simaeru, sibara ka Taikamanua le nia, tapoi sipasigagalai sikatai, ta iitco Taikamanua. 12Si Demeterius geti sangamberi le masimunengake simaeru pagalaiat nia, beri pubulanan leu masimunengake kisedda. Kai leu masimunengake simaeru pagalaiat nia, samba nuagai, sibulatnia le pasimunenganmai. 13Maigi pei leu kuanenku kekeu, tapoi taan leu kususuratnake nia tinta samba pena. 14Kukaroni maruei tapaaili samba tapatibo sipatutuggut mata. 15Aban le masipaalei ekeu! Salam kekeu sibara ka saaleinu. Segeake salamku ka saalei senenda.

will be added

X\