2 TIMOTEUS 4

1Ka matat Taikamanua samba Kristus Yesus sipasiuukumake geti sipuririmanua samba simamatei, samba kalulut momoi nia masipatoila Puririmatania, kupatone simaron kekeu: 2Paarep tiboiet Taikamanua, tugguruake ka tetere simaeru ele sitaimaeru, ase, tekaake simasele samba nganturu ka bagat om baga samba panganturat. 3Babara poi teterenia taan raoba sirimanua masisilo nganturat simaeru, tapoi raruruake le saguru siobat bagada masigelaiake sia siobat talinganda. 4Pisikngakerangan talinganda ka pubulanan, ka pumumuan siburuan le ratongiake talinganda. 5Kekeu geti kau numasikeli ka bagat sangamberinia, omake masiorik, galaiake galajet masipaarep Katuareman Simaeru, lettuake galajet pasikelatnu. 6Pagalaiat tubuku kaku geti, amatarekngan tubuluake, samba tetere katatakatku aiailingan. 7Akupatakaiakean patakaiat simaeru, akukappuluakean ailiakenen, akupasikelingan tonem baga. 8Kineneiget, amatarekngan kaku kirit puroipoat akenen Tuhan Sipasiukum simaroipo kaku ka gogoi sialu; ta sarat kaku, tapoi samba leu ka sangamberi sipungeleiji katutoilakatnia. 9Besiake imaola nuoi masibalou aku; 10aipoi si Demas aikaddiuakean aku, lulut masipununtuki baga polak nene. Ameian nia ka Tesalonika. Si Kreskes ameian ka Galatia samba si Titus ka Dalmatia. 11Sarat si Lukas-an le amulegei aleiku. Ala si Markus ambit nia aleinu; aipoi bulat karonanku le nia ka galajet. 12Si Tikhikus akukoiniakean nia ka Epesus. 13Ke moi ekeu ambit mantel sigalakku ka Troas ka lalep Karpus samba leu pabukobukoku, sara pei nenda buko kulit. 14Si Aleksander, tukang tembaga nenda, amaigingan sikatai aigalai ka tubuku; ai leu isiliake nia si Tuhan siripot sigalainia. 15Jago leu tubum ka tubunia, aipoi makope ilawan nganturatta. 16Ka teteret pasialegiatku siboiki, beri sara siromake aku, sangamberida masikaddiuake aku (kepei ta iaddeake Taikamanua ka tubuda pagalaiat nene). 17Tapoi aipaaleian aku si Tuhan samba aiparonan aku, bule ioi kupaarep simasun Katuareman Simaeru samba sangamberi sipuarat sabulungan masiarep. Ia te akubela ka ngungun singa. 18Samba ibebelaake aku si Tuhan ka senen galajet sikatai, iaarauake aku tuguru ka Purimataatnia ka sorga. Ka tubunia le pulatsanan teret buruburu. Amen. 19Salamku kai Priska samba Akwila samba ka sia ka lalep Onesiporus. 20Si Erastus ai nia ka Korintus samba si Tropimus kukaddiuake aimubebesi ka Miletus. 21Besiake nuoi se enan ta babara tetere simaleppet. Salam kekeu sibara kai Ebulus, Pudes, Linus, Klaudia samba sibara ka sangamberi sarainanta. 22Si Tuhan le masipaalei ketsatnu. Kiliu bagania masipaalei kam!

will be added

X\