2 TIMOTEUS 3

1Agaietnu leu et ia te ka gogoi sikateitei, babara te tetere pugejaat baga. 2Aipoi sirimanua sarat mununtu baga ka tubudangan le, maalau baga ka bulagat, musosot titiboat samba mubuak paatuat, bailiu simaasa, ta masireddet eppu, taiagai musura baga, taipuuku arat, 3taiagai mununtu baga, taioba paaban, raoba masipakatai nganga, taiagai masiatuake, maoddoi, ta raoba simaeru, 4raoba masipajo, ta mananta rapaatu, masipaumun siagai, masitutnake pubotbonan tubu pei le raoba bele pei masitutnake Taikamanua. 5Ka uddut tuitco sia kele simasuru arat, tapoi pulelengannia geti, geget puaranan raputata le. Areuake tubum ka tubuda! 6Ka talagada poi ai sia sisenei lalep sirimanua samba masikau paalakat bagada tainanalep simagulai tubu, sisun jo, samba pinaambit sene ngamata pubotbonan, 7kenanen mariuriu rapasigelai, tapoi beri pei raagai pubulanan. 8Makere kele si Yannes samba si Yambres masilawan si Mose, kisedda te sia masilawan pubulanan. Sirimanua nene amakataian paatuatda, ta matom tonem bagada. 9Taan leu momoi ramariuriu, aipoi taiagaira paatuat, matotoila le ka matada sangamberi sirimanua, kele kai Yannes samba Yambres. 10Tapoi ekeu geti anututnakean ngantomanku, paraboatku, isiatku, tonem bagaku, om bagaku, nuntut bagaku samba ron paatuatku. 11Anututnakean masiorik pangukurat samba paoreat kele siorikku ka Antiokia, ka Ikonium samba Listra. Sangamberi pangukurat akuorikngan, tapoi aibelaakean aku si Tuhan ka sangamberinia. 12Kirenangan sangamberi sioba muarat ka bagat Kristus Yesus raoorik pangukurat. 13Tapoi sirimanua sikatai samba sipatataju itutuppai pei le kataira, masipepeake samba mapepe. 14Ekeu geti kau le numariuriu ka bagat pubulanan sigelainu samba sikatonemim, nuagai poi kasei sigelaiake ekeu. 15Repdep leu ka sulenu pei le anuagaian Surat Sipunenan sipasoppit samba sipalulu ekeu ka puaragat kalulut tonem baga ka Kristus Yesus. 16Sangamberi surat ka Surat Sipunenan sibara ka engan Taikamanua le, samba pakeiet pasinganturu, pasiase simasele, pasipaeru paraboat samba pasipalulu ka puroipoat; 17bule imamuine sirimanuan Taikamanua, simatarek ka senen galajet simaeru.

will be added

X\