2 TIMOTEUS 2

1Oto ale togaku, kau numaron kalulut kiliu baga sibara ka Kristus Yesus. 2Apa siarepnu kaku ka matada maigi sipasimumuneng, ia te nusesegeake ka sia siooi tukatonemi, simaagai leu masipangantoman sabagei. 3Tutnake masiorik gejat baga siripot tenterat Kristus Yesus simatopit. 4Ta anai kasei pa tentera sipasasaggak sipabikbing paatuatnia ka pagalaiat purimanuaiatnia, bule ioba nia siuteake nia. 5Sipatatakai, kenanen apatakaian nia, ta te tukikirini nia, ke ta siripot aturan patatakainia. 6Sipumomone, simamomomo tubu mugalai, buita nia le boiki masinananam buat siuremannia. 7Paatu sikuaku nene; aipoi iaake kekeu Taikamanua puaagai ka bagat sangamberinia. 8Repdep Yesus Kristus, sitususuru ka simamatei, sibara ka punuteteu David, ia te sipaarepku ka Katuareman Simaeru. 9Kalulut pasipaarep Katuareman Simaeru nene te akupasiorik, pat tukabe, kele sirimanua sipananae; tapoi tiboiet Taikamanua ta tukakabe. 10Ia te kuoomake masiorik sangamberinia puuktunganda sia sipilit Taikamanua, bule rasilo leu puaragat ka bagat Kristus Yesus samba pulatsanan sitaitatata. 11Bulat sibulatnia le tiboiet nene, "Ke amateian sita pasamba nia, muririmanua leu sita pasamba nia. 12Ke maom bagata, puparentatangan leu pasamba nia. Ke tapakele nia, pakelenangan leu sita. 13Ke ta matopit sita, nia geti riuriu le matopit, aipoi ta momoi ipakele tubunia." 14Parepdep samba toneake sangamberinia nene ka sia ka matat Taikamanua, buian ragalai paukele tiboiet, si ta galai le poi, masipaingo sia sipasiaarep le. 15Besiake numateu ka matat Taikamanua, kele sara sipugagalai sitaimaila ka pagalaiat galajetnia, simakolou masipaarep tiboiet pubulanan. 16Tapoi tiboiet si ta baga samba simalolit, katsiliake le, aipoi sikau sirimanua memei makatai le. 17Samba tiboietda mararat le kele bogbong. Ka talagada ia te si Himeneus samba si Piletus, 18sia nene amapepengan sia ka pubulanan, arakua poi katusuruatta amuriuriuan; oto paguilaknangan tonem bagada sabagei. 19Tapoi bongen simaron sigalakngakenen Taikamanua nyung le, toggaiatnia ia te, "Iagai si Tuhan sia bakkatnia" samba "Senen sipasikukua onin Tuhan, kau iariake tubunia ka sikatai." 20Ka bagat lalep sabeu ta sarat bibilet sigalai ka mas samba perak, tapoi samba sibara ka loina samba polak leu; siboiki nenda tupakei ka simalatsat samba bagei tupakei ka sitaimalatsat. 21Ke kasei pa masipalina tubunia ka sikatai, bailiu nia bibilet lalep pakeiet ka simalatsat, tupalina, tuaddeake nia mateu pakeiet tuannia samba tutarekngake ka senen galajet simalatsat. 22Kalulut nene areuake tubum ka pubotbonanda sibau tubu, kukuruake puroipoat, tonem baga, nuntut baga samba aban sambamui sia sipusosoga kai Tuhan sibara ka paatuat simalina. 23Katsiliake paukelatda taiagai paatuat samba sitaimateu, nuagai poi sibaraake pajoggolat le nenda. 24Pagugulet Tuhan geti ta momoi pajoggolo, simaeru baga le ka sangamberi sirimanua, iagai masinganturu, maom baga, 25maleppe baga masinganturu simalawan, baleu ipanguruatnake Taikamanua ka sia katubaugat paatuat sikau sia masiagai pubulanan, 26bule raseseake nia rabela ka seseret Sanitu siappara sia masitutnake nia.

will be added

X\