2 TESALONIKA 3

1Kalepakatnia ale sasaraina, tiddouake kam kai, bule imararat tiboiet Tuhan samba itulatsatnake, kele ka kam leu, 2bule kubela kai ka kabeira sibaraake pulamagat samba sirimanua sikatai, aipoi ta sangamberi sirimanua ioba mutonem baga. 3Tapoi simatopit le si Tuhan; iparoron le paatuatmui samba ipasisikeli kam ka sikatai. 4Samba matonem bagamai ka bagat Tuhan, pagalaiat sitoneakenenmai ka kam ainugagalaiake kam samba nugagalaiake kam simariuriu. 5Bule si Tuhan masiipoake paatuatmui masiagai simakolou nuntut bagat Taikamanua samba puoman bagat Kristus. 6Tapoi kupatone kai kam ale sasaraina, ka onin Tuhan Yesus Kristus, bule nuareuake kam tubumui ka senen saraina sitaigalai galajetna samba sitaireddet nganturat sinilomui sibara ka kai. 7Aipoi anuagaian kam, kipa nuului kam kai, aipoi ta akuoreake kai mugalai ka talagamui, 8samba leu ta akukom kai katda kasei pa taisasakiet; tapoi kugaba le kai samba kumomoake kai tubumai sinago sinoibo, bui ibailiu kai pugejaat bagada kasei pa ka talagamui. 9Ta te lulut tatat gegemai masitiddou paromanmui, tapoi kukau le kai tubumai uluietmui, bule nutut kam nia. 10Aipoi ai pei le kai ka talagamui, akupatonean kai nene ka kam: Kasei sitaioba mugalai, buian ipukom. 11Akuarep poi kai ai piga pa ka talagamui sitaimakolou puririmanua samba sitaipugagalai, sarat si ta galai le ratuturi. 12Sirimanua kele nene kunganturu samba kujigi kai sia ka bagat Tuhan Yesus Kristus, bule rapugalai simemengmeng samba rakom katda sigabada sarada. 13Kam geti sasaraina, bui ingau kam mugalai simaeru. 14Ke ai kasei pa sitaireddet siniboimai ka surat nene, toggaiji kam nia, samba ba alei kam nia, bule imaila. 15Tapoi bui nuaddeake kam nia kele saggak, nganturu le kam nia kele saraina. 16Samba nia le, Tuhan sipaaban sita, masipanguruatnake ka kam aban simariuriu ka bagat sangamberinia. Si Tuhan le masipaalei kam sangamberimui. 17Salam sibara kaku, Paulus. Salam nene sinurat kabeiku. Ia te toggaiat ka senen surat: kise te suratku. 18Kiliu bagat Tuhanta Yesus Kristus, masipaalei kam sangamberimui!

will be added

X\